Zakari 13 - Bible

¹ “Maa ɣêlei tí ya-tôŋ-ma láa a pâi ƃôi Deeƃé ŋɔpɛ́rɛi mu-ƃelai da Zerusâlɛŋ-ƃelai mɛni ma a gɛɛ é dísɔnyɔ̂ŋ waa dîa da m̀ɛni-ŋai dímaa fé waa nii.

² Maa ɣêlei tí ŋa pâi zɛŋ da kpɛ́ni-ŋai láa kulâi ǹɔii ma nyii ǹûai da zìɣe a díɣâlai, a gɛɛ núu fé pâi ŋɔ́nɔ gíli ŋá siâi é pîlaŋ dîa. Ŋa pâi ŋɔ́nɔ Ɣâla-ŋɔlóno-kɛ-ƃelai kulâi ǹɔii ma da diai nyînaŋ nyɔ́mɔɔ káa díkponôi.

³ Núu à pá ŋɔ́nɔ a gɛɛ gáa a Ɣâla ŋɔlóno-kɛ́-nuu, ǹâŋ da ǹee da pâi môi mà, ‘Ya pâi saâi, kpɛ́ni fêi, íkaa lɛ́ɛ kɛ̂i a Yâwɛɛ láa.’ Ǹyaŋ ǹâŋ da ǹee da pâi zɔɔ̂i a ƃóa à kɛ̀ a Ɣâla-woo ƃôi.

⁴ Maa ɣêlei tí, Ɣâla ŋɔlóno kɛ́-nuu kélee a pâi ŋumɛ̂i ŋɔzĩ̂ai mɛni ma è gàai, à kɛ̀ a Ɣâla-woo ƃôi, vé pâi sua-lêɣa yɛkɛ toôi ma a gɛɛ é núu pɛ́lɛ,

⁵ kɛ́lɛ a pâi môi ǹyɛɛ, ‘Ḿve a Ɣâla ŋɔlóno kɛ́-nuu, ŋ́gaa a kpâlaŋ ŋá-tii kɛ́-nuu. Kpɛ́ni fêi, ǹɔii a wɔ́lɔ kɛ́ a ŋ́gɔri-sɛŋ é síɣe naɣa-tãi ma.’

⁶ À kɛ̀ núu da a m̀arê kɛ̀, ‘Lé pala-ŋa ƃé tí ípôlui?’ A pâi môi ǹyɛɛi, ‘Ŋá bala-ŋai ŋí kùla ḿarâai dípɛrɛi mu!’ ”

Ɣâla ŋɔƃála-mɛi-kaa-nuui paa mɛ̂ni

⁷ Yâwɛɛ Ŋ̀wála-wâla kélee Ɣalai è mò ǹyɛɛi, “Óo ƃóa-sɔ̂kpɔ, ímu siɣe í tɔ́ɔ ŋáƃala-mɛni-kaa-nuui ma da núui ma gáa tɔɔ̂ni Ŋ́gɔlɛi. Pɛ́lɛ m̀ála-mɛi-kaa-nuui ma a gɛɛ m̀ála-ŋai dítaa-tâa. Ŋá pâi ńyee kulâi diai mu dí fíi kpɛɛ̂i.”

⁸ Kúnuu-namui è mò ǹyɛɛi, “Ǹûai dámaa da pâi saâi ǹɔii gwaa kélee, núu kpûlu-loŋ nɔ́ ƃé pâi lɛɛ̂i ɣele ma.

⁹ Ŋa pâi ǹɛɛ-pôlu-ƃelai ŋí waâi yɛ̂ɛ berei núu a káne wàa la a ŋɔŋ, ŋá dímaa kpɛ́ɛ yɛ̂ɛ berei núu a gôo maa kpɛ̂ɛ la a ŋɔŋ. Ǹyaŋ da pâi ńdôlii, ǹyaŋ ŋa pâi díwoo su toôi. Ŋa pâi môi a gɛɛ díkaa a ŋánûa. Ǹyaŋ da pâi môi dîyɛɛ, ‘Yâwɛɛ ƃa Kúɣâlai.’ ”