Zakari 12 - Bible

Zerusâlɛŋ ŋuŋ-maa a pâi ƃôi

¹ Yâwɛɛ ŋɔwóoi nyíi bîlaŋɔɔi Eezuɛ mai: Yâwɛɛ nyíi ǹyée sã̀a é ŋ̀elei kpɛtɛ da ǹɔii é tela núu-kpune ŋɔmɔ̂leŋ kpɛtɛ gbonôi, è mò ǹyɛɛi,

² “Ƃɛ́ káa, ŋa pâi nâa Zerusâlɛŋ kɛ̂i yɛ̂ɛ ŋwã̂ai kpele kɔɛi núu kélee mɛni díkaa gɔlɛ mai. A pâi kɛ̂i Zuda lɔii mɛni ma máŋ tãi Zerusâlɛŋ kpɔara-ƃelai da pâi kɔ́ pɛlɛ̂i la mai.

³ Maa ɣêlei tí ŋa pâi Zerusâlɛŋ kɛ̂i a kɔni wuyɛɛ ǹûai kélee mɛni ma. Diai kélee pâi mù siɣêi da pâi sɛŋ sôlii díkpîŋ dîa. Ǹɔii-ŋuŋ-ŋai kélee ŋ̀éniɛi sui da pâi pâi kwaa tɔnɔ ma dí kɔ́ pɛ́lɛ ma.

⁴ Maa ɣêlei tí ŋa pâi gɔ́kɔ-soo-ŋai kɛ̂i dí yao díkɛ wúlee, diai dímɛi dia máŋ díkɛ wúlee. Kɛ́lɛ ŋa pâi ŋ́ɛi lá ƃôi Zuda ŋɔpɛ́rɛi mu-ƃelai mɛni ma, kpɛ́ni fêi, ŋa pâi díkpɔara-ƃelai díkɔ-kɔ-soo-ŋai ŋɛ́i pûi.

⁵ À kɛ̀ tí Zuda-lɔii-kpiniŋ su-ƃelai da pâi môi dîyɛɛ, ‘Wála-wâla-laa káa Zerusâlɛŋ-ƃelai yêei Yâwɛɛ Ŋ̀wála-wâla kélee Ɣalai sârai nyii gáa a Díɣâlai.’

⁶ “Maa ɣêlei tí, Zuda-lɔii-kpiniŋ su-ƃelai kélee da pâi kɛ̂i yɛɛ leɣi à kɛ̀ nɛ́nîi ŋɔŋ ŋá wolâ su, yɛ̂ɛ ŋɔ́nɔ kpáleŋ a kɛ̀ lénîi kala kpâla su. Ǹyaŋ da pâi ǹûai kélee kêrenii laa-mii-yee-mɛi da kɔɔ-yee-mɛi. Kɛ́lɛ Zerusâlɛŋ taa-leei a pâi lɛɛ̂i nɔ́ dɔɔ̂i da zu-ƃelai kélee mɛni da fé pâi kɛ̂i a dia.

⁷ “Ǹyaŋ Yâwɛɛ è mò a gɛɛ a pâi gɔ́ nɛ̃ɛ̂i Zuda-ƃelai dîa a maa-ŋuŋ a gɛɛ Deeƃé ŋɔpɛ́rɛi mu-ƃelai da Zerusâlɛŋ-ƃelai dífe yoŋka tèe Zuda-ƃelai mɛi.

⁸ Maa ɣêlei tí, Yâwɛɛ a pâi Zerusâlɛŋ-ƃelai maa tínanîi yɛ̂ɛ siyãŋ a gɛɛ diai pɔri fé dîɛi da pâi kɛ̂i yɛ̂ɛ Deeƃé, ǹyaŋ Deeƃé ŋɔpɛ́rɛi-mu-ƃelai da pâi kɛ̂i dítuɛ yɛ̂ɛ Ɣâla, yɛ̂ɛ Ɣâla-taa-kela.

⁹ Ǹyaŋ maa ɣêlei tí, ŋa pâi ǹɔii-ŋûŋ-ŋai kélee su karâi dítɔɔ̂i Zerusâlɛŋ mai.

¹⁰ “Ǹyaŋ ŋa pâi Deeƃé ŋɔpɛ́rɛi mu-ƃelai da Zerusâlɛŋ-ƃelai láa fɛ̂ɛi a maloŋ-kâa-mɔleŋ da Ɣâla fɛliɛ, a gɛɛ da núu kàa nyii da bàai, dí wɔ́lɔ mɛni ma yɛ̂ɛ berei núu a wɔ̂lɔ la ŋɔlóŋ tɔnɔ kpéŋ saa mɛni ma, dí gbêɣei tóo mɛni ma yɛ̂ɛ berei núu a wɔ̂lɔ la ǹóŋ-surɔŋ maa-ŋuŋ saa mɛ̂ni mai.

¹¹ Maa ɣêlei tí ŋ̀ɔ́lɔ-wooi su a pâi kɛ̂tɛi Zerusâlɛŋ yɛ̂ɛ berei ŋ̀ɔ́lɔ-wooi è kɛ̀ la Adarimoŋ Mɛgido-perei ma ŋ̀olâ-puŋ sui.

^12-14 Ǹûai da pâi wɔ̂lɔi ǹɔii su, núu-suu tɛi-tɛ́i kélee a pâi wɔ̂lɔi gbîŋ mɛni ma: Deeƃé ŋɔsuui su-ƃelai, Netɔŋ ŋɔsuui su-ƃelai, Leevi ŋɔsuui su-ƃelai, Siimɛi ŋɔsuui su-ƃelai. Ǹyaŋ ǹúu-suui kélee lɛ̀ɛ pôlui tɛi-tɛi è wɔ̀lɔ gbîŋ mɛini ma, dínɛyâai dí wɔ́lɔ díkpîŋ mɛni ma.