Zakari 10 - Bible

Yâwɛɛ è ŋuŋ-maa-ƃô kono-tee kɛ̀

¹ Yâwɛɛ marê kɛ́ tuna mɛ̂ni ma a fólo-laa-ƃoɔɔ, ǹúui a gɛ̀ tuna kpîni é tóo gɛ́ gɛ̀ ya-kpôloŋ kɛ́ tɛ̀ɛ núu kélee ŋɔkpâlaŋ ŋá.

² Tɛli kpɛ́-ƃela da ƃoo lôno kɛ̀, ǹyaŋ mɛni ƃóɔɔ nàa-tuɛ-ƃelai díkɛ lɛ́ɛ kɛ̀. Zee-wôo ƃó-ƃelai díkɛ lɛ́ɛ see-woo ƃò, díkɛ núu ŋánɛnɛ-woo ƃò kpɛ́ni-kpɛni. M̀ɛni ma ǹûai da pù lɔ̂ɔi yɛ̂ɛ ƃála-ŋa dímaa tée-têeɛ, kpɛ́ni fêi, dímɛi-káa-nuu fé ma.

³ Yâwɛɛ è mò ǹyɛɛi, “Ńii ŋwânai m̀ála-mɛi-káa-ƃelai dîa, ǹyaŋ ŋá pâi tɔ̂ŋ kpɛ̂i ǹúu-ŋuŋ-tuɛ-ƃelai dîa kpɛ́ni fêi, Ńyãai a Ŋ̀wála-wâla kélee Yâwɛɛi, ŋ́gbaaŋɔ̂ɔi ŋáƃala-ŋai mɛni ma Zuda lɔii su, ǹyaŋ ŋa pâi díkɛ̂i yɛ̂ɛ ŋákɔkɔ-sôo-ŋa.

⁴ Bɛ́rɛi zônoŋ-su-kɔni a pâi kulâi dísama, kêre-pîlaŋ-wuru da kɔ́kɔ́-keraŋ, núu-mɛi-ƃela kélee da pâi kulâi dísama.

⁵ Díkelee púɔɔ gîe ma, da pâi kɛ̂i yɛ̂ɛ kɔ́kɔ-ƃela támaa, díkɛ ƃɔ̀rɔŋ díkpɔara-ƃelai mɛi gɔ́li-ŋai loai bârai su. Da pâi kɔ́ kɔ̂i, kpɛ́ni fêi, Yâwɛɛ káa dípôlu, ǹyaŋ da pâi diai yée mɛi ɣâlei díkaa gɔ́kɔ-sôo-ŋai mɛi.

⁶ “Ŋa pâi Zuda-ƃelai su kpânanîi, ŋá Zosɛ ŋɔpɛ́rɛi mu-ƃelai ƃálo. Ŋa pâi pâi a dîa pôlu, kpɛ́ni fêi, ŋá dímalôŋ kàa. Ǹyaŋ da pâi kɛ̂i yɛ̂ɛ ǹyaa ƃe fé ńyee kula ní dímu. Ńyãa ƃa Yâwɛɛ Díɣâlai, ǹyaŋ ŋa pâi díwoo su toôi.

⁷ Ǹyaŋ Ifiraŋ a pâi kɛ̀i yɛ̂ɛ kɔ́-kuluƃa wála-wâla, ǹyaŋ dílii a pâi nɛ̃ɛ̂i yɛ̂ɛ berei núu líi a nɛ̃̂ɛ la ŋwã̂ai mai. Mɛnii ŋí a pâi lɛɛ̂i dílônii kíli ŋá, ǹyaŋ dílii a pâi nɛ̃ɛ̂i Yâwɛɛ ŋɔkpɔŋ-mâai mɛni ma.

⁸ “Ŋa pâi dítôli, ŋá pá a dia. Ŋa díŋuŋ maa ƃôi, ǹyaŋ da pâi kɛ̂i a dítamaa yɛ̂ɛ berei dí kɛ̀ la a bɔlɔi.

⁹ Berei máŋ ŋá dítàa-taa la ǹɔii ŋûŋ-ŋai sui, berei máŋ díkaa ǹɔii kôya-ŋai sui, da pâi díkili ŋá siâi é pîlaŋ ḿâ. Ǹyaŋ da pâi lɛɛ̂i a dífulu dí léne pôlu da dílônii.

¹⁰ Ŋa pâi díkulâi Ize da Asiria ŋá pá a dia dípɔ-taai, ŋá dísee Gilia-lɔii su da Lɛƃanɔŋ-lɔii su máŋ. Ǹɔii láa a pâi fɛɛ̂i núu-kpune é lɛ́ɛ la zu núu-seêi fa ŋɔ́nɔ kɛ̀ naa.

¹¹ Da pâi tɛɛ̂i dímɛni kpɔ̂lu ya-leei su. Ǹyái ŋɔzigɛ-zigɛi ŋá a pâi yenîi. Ǹâai Ya-leei zinîi kélee a pâi kpâlai. Asiria ŋɔyoŋka-téei ŋá a pâi yenîi, ǹyaŋ Ize ŋɔwála-wâla-laai a pâi kpɛɛ̂i.

¹² Ŋa pâi díkponôi kpananîi, ǹyaŋ dífolo-laai maa a pâi tɛ̂i ńaai su.” Yâwɛɛ ƃé mò.