Taitɔ 3 - Bible

Kôrai-nuu tûa-pere

¹ Doo díkili ŋá a gɛɛ dí kɛ́ dímɛi-ƃelai mû da ŋwála-wala-ƃelai, dí kɛ́ a wóo-mɛni-ƃela. Dí kɛ́ a díkpɛtɛɛ tíi lɛ́lɛɛ kélee mɛni ma.

² Dífe mɛni nyɔ́mɔɔ ƃò é pîlaŋ núu da kélee ma. Dífe díyee pìli laa-saa-mɛni su. Dí kɛ́ a núu sɔŋ lɛ́lɛɛ-ŋa. Dí ƃaa-kɛ-maa lɛ́lɛɛ lɛ́ núu kélee ma.

³ Kpɛ́ni fêi, kûa kpîŋ kú kɛ̀ a ƃoo-ƃela a tãi da. Kúfe kɛ́ ní a woo-mɛni-ƃela. Kú pɔ̀ara berei mâ. Kú kɛ̀ a mɛni nyɔ́mɔɔ-sii támaa wɛ́liɛɛ ŋɔluɛ-ŋa da ǹîa-kɛ. Kúkɛ̀ kúɣele-ŋai tɛɛ̂i lii-ŋwâna su da tólo. Nûa dí kúkpɔara, kúkɛ kúkîe-ni kpɔara.

⁴ Kɛ́lɛ, tãi Kúƃalo-nuui Ɣâla ŋɔmɛni lɛ́lɛɛi da ŋɔwɛli-kɛ-maai gáa núu-kpune mɛni mai dí pa lai,

⁵ è kúƃalo a kúwaa mì a gɛɛ kú kɛ́ a núu nina da M̀ɔlêŋ Maa Waai kɛ́ɛ a nina kúkponôi. Kútii lɛ́lɛɛ kɛ́ɛ fêi nyíi kwa gɛ́i, kɛ́lɛ, ŋɔƃɛlɛ-sêei su ƃe.

⁶ È M̀ɔlêŋ Maa Waai pù kúkponôi a dámaa Kúƃalo-nuui Zîsɛ Kôrai sârai,

⁷ a gɛɛ é kúkɛ a tɔ̃yâ-ƃela a ŋɔƃɛlɛ-sêei kú kɛ́ a pɔɔ-sɛŋ mɛi-ƃela yɛ̂ɛ berei ŋwɔlɔ-wɔlɔ fúlu-laai ŋɔkili-kɛ-zui káa lai.

⁸ Ŋ̀óo-ŋai ŋí díkaa a tɔ̃yâ. Ŋa ŋ̀wɛ̂lii a gɛɛ í ŋ̀óo-ŋai ŋí lɛ́ kpɔ́ a gbanaŋɔɔ a gɛɛ diai dí lâai a Ɣâlai, dí díkpîŋ mɛi káa, dí díkpîŋ pú mɛni lɛ́lɛɛ-kɛɛ su. Ŋ̀óo-ŋai ŋí lɛ́lɛɛ̂i kpɔ́ a ŋánaa, dí ƃo a kpɔŋ-maa núu-kpune mɛni ma.

⁹ Kɛ́lɛ, ífe íyee pû ƃoo-mare-kɛɛ támaa su, kpaa máŋ núu-suu pîlaŋ pere, kpaa máŋ sia-mɛni-ŋa da dɔ̂ŋ maa-lâa-saa, kpɛ́ni fêi, kpɔŋ-maa fé dísu. Díkaa nɔ́ kpɛ́ni-kpɛni.

¹⁰ À kɛ̀ a ǹúui a lɛ́ɛ-sɛŋ lɛ̀i, ya ǹia-wôo ƃò tɔnɔɔ, kpaa máŋ feerɛ, à wàla íwoo síɣe, tée bôlu.

¹¹ Í gɔ́lɔŋ a gɛɛ ǹúu-sii tí a kúla dɔ̃yâ-perei ma, gɛ sɔnyɔ̂ŋ kɛ̀. Gáa a ǹúui nyíi a tɔ̂ŋ pù gbîŋ mai.

Núu kpîŋ maa-mɛni

¹² À kɛ̀ ŋà Atema tɛ̂ɛi bɔ̂ naa, kpaa máŋ Tekekɔ, kɔ́ a gbanaŋɔɔ í pá ḿbɔ naa Nikopoli, kpɛ́ni fêi, ŋa gbɛ̀tɛ ŋ́gili ŋá a gɛɛ ŋa zamai tɛ́ɛ naa.

¹³ Kɔ́ a gbanaŋɔɔ í Zina tɛɛ, nyíi gáa a dɔ̂ŋ-mɛi-nuui, da Apolo dísiai ma. Gáa a gɛɛ sɛŋ da kélee wɛ́li fé díkɛ̀ dísiai mɛni ma.

¹⁴ Tɔɔ kúnûai dí berei maa kɔ̂ri da pɔ̂ri díkpîŋ pui la tíi lɛ́lɛɛ-kɛɛ sui, a gɛɛ dí kpɔŋ diai dîa da kpɔŋ-maa wɛ̀lii. Dífe kɛ̀ nɔ́ yɛ̂ɛ ŋ̀úrii nyíi m̀á fé ŋ̀ái.

Ǹûai

¹⁵ Diai kélee kwa dîa-ni kúkaa ƃɛ́i, kú fàa yâ. Kú fáa diai kélee dîa dí kúwɛli ní ǹaa-laai sui. Ƃɛlɛ-sêei é kɛ́ kákelee kâa.