Timote veelɛ 3 - Bible

Núu-kpune tûa-pere a ŋ̀elei kpɛɛ ŋa-tãi

¹ Kɛ́lɛ, táre nyíŋi su a gɛ́ɛ mɛni-kpɔlu ŋɔtãi a pâi pâi a ŋele-ŋai gbɛɛ ŋái.

² Kpɛ́ni fêi, nûa da pâi kɛ̂i a díkpîŋ-wɛli-ƃela, dí ƃo a sɛŋ-kao wɛli-ƃela, su-mɛni kɛtɛ-ƃela, yoŋka-ƃela, woo-nyɔŋ-ńâ-ƃela, ǹûai dífa díkaa-ƃela wóo mɛnii, ǹûai dífa mɛni lɛ́lɛɛ maa-sɛɣɛi-féi kɛ̀i, da ǹûai dímaa fé waa níi,

³ da pâi kɛ̂i a ŋɛi-kpala-ƃela, ǹûai dífe lii-sêe wɛli ni díloai da díƃarâai, laa-kara-ƃela, ǹûai dífa díkpîŋ mɛi kâai, ŋwana-lɔ̂ɔ-ƃela, mɛni lɛ́lɛɛ kpɔara-ƃela,

⁴ ǹûai da kûla díƃarâa pôlui, ǹûai dífa kpáaŋ núu da kélee mɛni mai, ǹûai su mɛni-kɛtɛ a dílaa fɛ́ɛi, da ǹûai dínîa kɛ́ɛ wɛ́li-káa dîa é tɛ́ɛ la Ɣâla-wɛliɛ mai,

⁵ Ɣâla-mɛni-sii da káa díyêei, kɛ́lɛ, díkɛ maa-wála-walai maa sîa tòo. Ífe íyee pu ǹúu-sii kɛɛ-ŋai ti maa-mɛni su.

⁶ Kpɛ́ni fêi, maa-ƃelai da-ni ƃa nyíi-ŋai da lɔ̂ pɛ́rɛ-ŋa mu, díkɛ nɛnî-ŋa líi pene nyíi-ŋai dífii kpɛɛ̂i dímɔ̂leŋ sui, nɛnî-ŋai ŋí dísɔnyɔ̂ŋ maa-mɛni a dílii sɛ̀lɛŋ, mɛni-sii nyɔ́mɔɔ-ŋa-wɛliɛ kɛ́ díkùla bere sã́ai ma,

⁷ maa-nɛyaai ŋí da díwoli tɔ̀ɔ núu-sii kélee ma, ǹyaŋ dífa wɔ́lɔ dɔ̃yâi maa-tare kàa.

⁸ Yɛ̂ɛ berei Zɛne da Zɛŋƃilii dí tɔ̀ɔ la Mose mai, bere nɔ́ ƃe máŋ ǹûai ŋí da tɔ̂ɔ dɔ̃yâi ma. Díkaa a ǹûai díkili-ŋa-siai su karâi, wôya-laa-la kɛ́ ƃo díyêei;

⁹ kɛ́lɛ, dífe pâi lîi kwaa kôya ma, kpɛ́ni fêi, nûa da pâi díƃoo-mɛni-ŋai kélee naa káâi a zu ponoɔ, yɛ̂ɛ berei è kɛ̀ la a ǹúu féerɛi ti.

¹⁰ Kɛ́lɛ, ya ŋásɛŋ-lɛɛi káa, ya ǹdûa-perei káa, mɛnii ŋa ŋ̀wɛ̂lii ŋa gɛ ŋ̀éniɛi sui, ŋálaa-lai, ŋálii-kpelei, ŋáwɛli-kɛ-maai, ŋáfɔrɔ-fɔrɔi,

¹¹ ḿaa-kpɔarai, ŋámɛni-soli-kaai, mɛnii kɛ̀ a ńyãa Ɛŋtiɔ da Akonia e pɛ́lɛ Lesitɔra mai, berei nûa dí ḿɔ̃lɛ lai; é máŋ kɛ́ ti, Kúnuu-namui e ŋ́gula nyíŋi kélee su.

¹² Tɔ̃yâ ma ǹúui kélee a gbɛtɛ gíli ŋá a gɛ́ɛ é Ɣâla-tua kɛ́ Zîsɛ Kôrai kponôi da pâi gbɔarai.

¹³ Ŋwana-lɔ̂ɔ-ƃela da wôya-ƃela da pâi kɛ̂i nɔ́ a núu nyɔ́mɔɔ-ŋa a tãi kélee, núu-pɛlɛ-ƃela díyaŋ, núu kɛ́ dípɛlɛ.

¹⁴ Kɛ́lɛ, à kɛ̀ a yá, mɛnii ya maa-kɔrii, láa kpɔ́ la a gbanaŋɔɔ, é kɛ́ nɔ́ íyeêi. Í ǹúui kɔ́lɔŋ í maa kɔri ǹyêei

¹⁵ da berei e síɣe íloloŋtãi ma ya gɔlɔ-pɔ̃yɛ maa-waa-ŋai kɔ́lɔŋ la, nyíi-ŋai da pɔri ítenîŋ tɔɔ̂i íƃalo-laai mɛni ma laa-la sârai Zîsɛ Kôrai kponôi.

¹⁶ Ŋâla-kɔlɔi kélee a kûla Ɣâla yêei, ǹɛ́lɛɛ sɛŋ-lɛ mɛni ma, ǹɛ́lɛɛ lɛɛ-sɛŋ lɛ-ƃela dímarê-kɛɛi su kula mɛni ma, ǹɛ́lɛɛ núu kula mɛni ma tua-pere-nyɔŋ su é pá pôlu Ɣâla pɔ, ǹɛ́lɛɛ ŋɔnɔ tɔ̃yâ laa-la lɛ-mɛni ma núu ma,

¹⁷ a gɛ́ɛ ǹúui gáa a Ɣâla-nuui é kɛ́ a gbɛ́tɛɛ kpɔ́ a ǹɛ́lɛɛ tíi lɛ́lɛɛ kélee mɛni ma.