Timote veelɛ 1 - Bible

¹ Ńyãa Pɔ̂ɔ, ŋ́gaa a Zîsɛ Kôrai pôlu-nuui da. Ɣâla è ńzìɣe zu é ŋ́gɛ a zia-ƃelai da a gɛ́ɛ ŋá vúlu-laa kono-teei è gɛ̀ Zîsɛ Kôrai sarâi maa mɛni ƃó nûa dîa. È vúlu-laa kono-teei maa mɛni ŋá lɛ̀ nyíi è gɛ̀ Zîsɛ Kôrai sarâi.

² Temete, nyíi gáa a ŋáwɛli-kɛ-maa-loŋ: Ƃɛlɛ-sêe, maloŋ-kaa, da lii-sêe dí kúla Kúnâŋ Ɣâla yêei da Kúnuu-namui Zîsɛ Kôrai dí pá ípɔ.

Lii-kpele m̀aa sêre-faa-kɛɛ

³ Tãi ímaa-mɛni a tôo ŋ́gili ŋá a tãi kélee Ŋáɣâla-fɛliɛ sui, ŋa Ɣâla sɛɣɛi fé nyíi ŋa tíi kɛ̀ mì a kíli maa waa lɛ́lɛɛ yɛ̂ɛ berei ńâŋ-ni dí gɛ̀ lai.

⁴ Íŋɛi-yai maa-mɛni à tòo ŋ́gili ŋa, ŋa ŋ̀wɛli a kpini da folo a gɛ́ɛ ŋá íkaa a gɛ́ɛ ǹáa é fɛ́ɛ a lii-nɛ̃ɛ.

⁵ Ítɔ̃yâ laa-la-lai maa-mɛni káa ŋ́gili ŋá, naa-lai nyíi kɛ̀ ílee ŋɔlee Loe kponôi a maa-ŋuŋ da ílee Yune. Tãi ŋí su ńaâi la a gɛ́ɛ gáa íkponôi.

⁶ Nyíŋi mɛni ma ŋa íkili ŋa ponôi a gɛ́ɛ í Ɣâla ŋɔsama-sɛŋ ŋɛi lá ƃó nyíi gáa íkponôi ǹyee-pɛlɛɛ-maai sârai;

⁷ kpɛ́ni fêi, Ɣâla fé yao-mɔleŋ tɛɛ ni kúpɔ, kɛ́lɛ, e wála-wala-mɔleŋ tɛ̀ɛ kúpɔ, wɛli-kɛ-maa-mɔleŋ, da kíli-ŋa-pono-mɔleŋ.

⁸ Ífe ŋumɛ a Kúnuu-namui m̀aa sêre-faa kɛ́ɛ, kpaa máŋ ífe ŋumɛ mâ, ńyãai ŋ́gaa a ŋɔpelesinɛi, kɛ́lɛ, mɛni-solii íwɔ̂i káa Duŋ Lɛ́lɛɛi mɛni ma Ɣâla ŋɔwála-wala-laai su,

⁹ nyíi kúƃàlo é kútoli a tóli maa waai. Ve gɛ̀ ní a kútii ŋɔwala-walai, kɛ́lɛ, e gɛ̀ a gbîŋ-nia-mɛnii ŋɔwála-walai da m̀ɛlɛ-seei nyíi e dɛ̀ɛ kúpɔ Zîsɛ Kôrai kponôi a tãi su kôya.

¹⁰ A nâa nɛ Kúƃalo-nuui Zîsɛ Kôrai ŋɔpâi sârai nyíi saa kpera é pá a wɔlɔ-wɔlɔ fulu-laa fíeŋ ŋá Duŋ Lɛ́lɛɛi sârai.

¹¹ Dí ńɛ̀ a Ɣâla-woo ƃo-nuu, sia-nuu, da sɛŋ-lɛ-nuu Duŋ Lɛ́lɛɛi ŋí mɛni ma.

¹² Mɛni ma ŋa mɛni-soli káâi yɛ̂ɛ berei ŋa gâai lai. Ínɛlɛ, ŋumɛ fé mâ, kpɛ́ni fêi, ŋa ǹúui kɔ́lɔŋ ńaâi lai. Náâi la a gɛ́ɛ pɔri káa mì a gɛ́ɛ zɛŋ e nɛ̀ɛ ńyêei é mɛi káa é lɛ́ɛ la zu Ŋelei ti e seri.

¹³ Dɔ̃yâ-wooi maa-perei mɛi káa nyíi í mɛ̀ni ǹái. Dɔ̃yâ-wooi káa ǹaa-lai su da ŋwɛli-kɛ-maai nyíi-ŋai díkaa Zîsɛ Kôrai kponôi;

¹⁴ dɔ̃yâi dí nɛ̀ɛ íyeêi mɛi káa M̀ɔlêŋ Maa Waai sârai nyíi gáa kúkponôi.

¹⁵ Í gɔ́lɔŋ a gɛ́ɛ diai kélee díkaa Eesiai, dí dípôlu tɔ̀ɔ mâ, maa-ƃelai da-ni ƃa Fezilɔ da Ɛɛmɔzinii.

¹⁶ Kúnuu-namui é maloŋ-kaa tɛɛ Onesifɔlɔ ŋɔpɛ́rɛi mu-ƃelai pɔ, kpɛ́ni fêi, e ńzòŋ a ǹɛ́lɛɛ a tãi támaa; ŋáyɔlɔi maa-ŋumɛ fé kɛ́ ni mâ,

¹⁷ kɛ́lɛ, tãi è seri la Luŋ, è ŋ́gɔ̀ri kpɔ́ a gbanaŋɔɔ e ŋ́gaa.

¹⁸ Kúnuu-namui é gɛ́ a gɛ́ɛ Onesifɔlɔ e maloŋ-kaa sɔlɔ ƃo ǹyêei a Ŋelei ti yɛ̂ɛ berei í gɔlɔŋ è díi kélee kɛ̀ la a ǹɛ́lɛɛ mɛ́ni ma Ɛfesɛi.