Samia Veerɛi 4 - Bible

Dí Isibosɛ pàa

¹ Sɔ̂ɔ ǹóŋ Isibosɛ kɛ́ɛ a mɛ̀ni a gɛ́ɛ da Anɛ paa Iburɔŋ, ǹíi è tòo pôlu da Eezuɛ-ƃelai kélee.

² Sɔ̂ɔ ǹóŋ ŋɔkɔ́ kɔ́-ƃelai láa túɛ-ƃelai dí kɛ̀ feerɛ. Dɔnɔ láa ƃé kɛ̀ a Baana, gbélii láa kɛ́ ƃò a Leka. Dínâŋ láa ƃé kɛ̀ a Limɔŋ. È kɛ̀ a Bɛŋsima suui su-nuui da. È kɛ̀ a Bɛɛroi nuu. (Bɛɛro káa a Bɛŋsima lɔii da.

³ Ǹɔii ŋí su-ƃelai dí wɔ́lɔ pù dí lí Gitaiŋ. Díkaa naa sâa ƃa sâa.)

⁴ Sɔ̂ɔ ǹóŋ Zonetaŋ ǹóŋ surɔŋ tɔnɔ è kɛ̀ naa gɔ̃liŋɔɔ. È kɛ̀ a kóraŋ lɔ́ɔlu díkɛ Sɔ̂ɔ da Zonetaŋ paa. Nûa dí kùla a duŋ ŋí Zariɛɛ dí m̀ó ma. Nya ƃe ǹɛnîi kɛ̀ m̀ɛi kâai è zìɣe é pú la. Gɛ́ɛ liî la a kîrɛi, è tòo la é gɔ́ɔ ɣále nyíi gɛ̀ é kɔ̃liŋ. Zurɔ̂ŋ-looi ŋí láa ƃé kɛ̀ a Mɛfibosɛ.

⁵ Limɔŋ ǹônii-sinaai, Leka da Baana dí dímu sìɣe a fólo tɔnɔ da dí lí Isibosɛ ŋɔpɛ́rɛi lá. Isibosɛ è kɛ̀ ŋɔpɛ́rɛi mu gɛ́ záma lɔ̀. Leka da Baana dí kɛ̀ a Bɛɛro-ƃela.

⁶ Ǹúui kɛ̀ bɛ́rɛi mɛi kâai, è kɛ̀ wîi kpɛtɛ̂i nyíi é tɛ́ɛ la. Leka da ǹeɣê Baana dí tɛ̀ɛ ma dí lɔ́ bɛ́rɛi mu.

⁷ Dí lɔ́ɔ bɛ́rɛi mui dí Isibosɛ kàa lâani ŋɔgbìŋ ŋá. Dí zɔ̀ɔ a m̀óa-sɔkpɔi dí baa dí ŋ̀uŋ tée. Dí ŋ̀uŋ sìɣe dí tɛ́ɛ la Araba-pere dí lí la a gbínii,

⁸ dí dɛɛ Deeƃé pɔ́ Iburɔŋ. Dí mò mà dîyɛɛi, “Íkpɔara-nuui Sɔ̂ɔ ǹóŋ Isibosɛ ŋuŋ ká ŋí nyíi kɛ̀ ŋ̀wɛ̂lii é ífulu-laai láŋ. Yâwɛɛ aâ íkpai kúla Sɔ̂ɔ ma da ǹóŋ.”

⁹ Kɛ́lɛ Deeƃé ǹyɛɛ dîai, “Tãi nɔ́ Yâwɛɛ káa la ɣele mai nyíi a ŋáfulu-laai maa kɔ̃ɔ pere sîi kélee sui, ŋa pâi ká paâi.

¹⁰ Ǹalôŋ pà ḿbɔ é m̀ó ma ǹyɛɛ, ‘Sɔ̂ɔ aâ saai,’ gɛ́ gàa a pá ḿbɔ a tuŋ lɛ́lɛɛi, ŋá zòŋ ŋá baa Zigila, ǹyaŋ ŋɔfela-fei ká kɛ̀ tí duŋ è dòoi m̀ɛni ma.

¹¹ Lé ƃé pâi kɛ̂i a zɔnyɔ̂ŋ-nuui dɔ̃yâ-nuui pàa gbɔ́ɔi pɛrɛi mui? Fé pâi maa-nuui paâi dɔ̃yâ-nuui ŋãa pú mɛni ma?”

¹² Nya ƃe Deeƃé è mò ŋɔkɔ kuluƃa-ŋai dîa a gɛ́ɛ dí dípaa. Dí dípàa dí díyee tée dîa da díkɔɔ dí zɛ̂lɛŋ boai kɔlɛ Iburɔŋ. Kɛ́lɛ dí Isibosɛ ŋuŋ sìɣe dí ǹoo Anɛ ƃolôŋ kɔlɛ Iburɔŋ.