Samia Veerɛi 1 - Bible

Deeƃé è Sɔ̂ɔ saa tûŋ mɛ̀ni

¹ Deeƃé kɛ́ɛ a Amɛlɛka-ŋai yée mɛi ɣálei, è lène pôlu Zikila é gɛ́ naa a fólo feerɛ.

² Ŋ̀ele kûui zaaƃa ɣelei kɔ́ kɔ́-nuu tɔnɔ è kùla Sɔ̂ɔ ŋɔƃûui su é pá bɔ́ naa ŋɔseɣei fála-falaa, pɔ̂rɔ siáa ŋ̀uŋ ma, é pîlaŋ ŋ̀úme ŋá ŋɛ́i-tuɛ.

³ È m̀arê kɛ̀ ǹyɛɛ m̀ai, “Mí ƃé í kùla naai?” Ǹalôŋ ǹyɛɛ m̀ai, “Ŋá kùla Eezuɛ-ŋai díƃûui su ŋá pú.”

⁴ Deeƃé ǹyɛɛ m̀ai, “Naa káa léŋ?” Ǹyɛɛ mai, “Ǹûai daâ pú gɔ́i yêei. Dí gɔ́ kɔ́-ƃelai dámaa ŋwàna dí da-ŋa paa. Dí Sɔ̂ɔ pàa máŋ da ǹóŋ Zonetaŋ.”

⁵ Deeƃé ǹyɛɛ ǹalôŋ mai, “Í gɔ̀lɔŋ léŋ a gɛ́ɛ Sɔ̂ɔ da ǹóŋ dí lɛ̀ɛ gɔ́i su?”

⁶ Ǹalôŋ ǹyɛɛ m̀ai, “Ŋá sèri nɔ́ Giboa Yeei ma ŋá Sɔ̂ɔ káa diɣîŋɔɔ ŋɔsɔ̀lai ma. Gɔ́ kɔ́ keleŋ-ŋai da zoo sia-ƃelai lɛɣɛ́ɛ la.

⁷ Gɛ́ɛ a tínaŋ a ŋ́gaai, è ńdòli ńyɛɛ mai, ‘Ŋ́gaa ƃɛ́.’

⁸ Ǹyɛɛ ḿâi, ‘Gbɛ̂ɛ ƃa yá?’ Ńyɛɛ mà, ‘Ŋ́gaa a Amaleka nuu.’

⁹ È mò ḿâ ǹyɛɛi, ‘Lɛɣɛ a ńyãa í ḿbaa ḿî, kpɛ́ni fêi, ŋa mɛni sôli kâai, ŋ́gɛ saa.’

¹⁰ Ŋá pà ŋá tɔ́ɔ gɔlɛ ŋá bàa, kpɛ́ni fêi, ŋá kɛ̀ a gɔ́lɔŋɔɔ a gɛ́ɛ vé pâi ƃâloi. Ŋá m̀ɔrɔi kùla ŋ̀ûa, ŋá ǹyée kɔŋ lá-kɔlii kúla ǹyée ma ŋá pá la. Ǹyaa ká ŋí.”

¹¹ Deeƃé è ŋɔseɣei kùla gɔŋ ma é vála-fala. Ǹyée mu sinaai dia-ni máŋ dí díwɔ̂-ŋai kɛ̀ tí.

¹² Dí malôŋ see ƃò, dí wɔ́lɔ, dí suŋ siɣe Sɔ̂ɔ da ǹóŋ Zonetaŋ mɛni ma da Yâwɛɛ ŋɔnûai dí dípàa gɔ́i sui é lɛ́ɛ la zu ɣele-wûlii é kɛ́.

¹³ Deeƃé è ŋɔ́nɔ ǹalôŋ marê kɛ̀ pà a duŋ ǹyɛɛ m̀ai, “Í kùla mí?” Ǹalôŋ ǹyɛɛ m̀ai, “Ŋ́gaa a Amalɛka-nuu ǹóŋ. Kɛ́lɛ ńzeɛɛ káa kálɔii su ƃɛ́.”

¹⁴ Deeƃé ǹyɛɛ m̀ai, “Lé ƃé gɛ̀ yao fé kɛ́ ní íkponôi í kɛ́ Yâwɛɛ ŋɔnúu maa waai su karâi?”

¹⁵ Nya ƃe Deeƃé è ǹyaŋkpai dɔnɔ tòli ǹyɛɛ m̀ai, “Ye lí a ǹalôŋ ŋí í baa.” È lì é bàa.

¹⁶ Deeƃé ǹyɛɛ m̀ai, “Íŋãa mɛni é kɛ́ íkpîŋ íŋûa. Yá kpîŋ í dɔ̃yâi ƃò a gɛ́ɛ yaâ Yâwɛɛ ŋɔnúu maa waai páa.”

Deeƃé è wɔ̀lɔ Sɔ̂ɔ da Zonetaŋ mɛni ma

¹⁷ Nya ƃe Deeƃé è zamaŋ-wule kpɛ̀tɛ Sɔ̂ɔ da ǹóŋ Zonetaŋ mɛni ma.

¹⁸ È mò a gɛ́ɛ dí ŋ̀ulei lɛ́ Zuda-ƃelai dîa. Ŋ̀ulei ŋí láa ƃa Gelâŋ-wulei. Ŋ̀ulei ŋí pɔ̃yɛ̂ɛi Zasa kɔlɔ su. È mò ǹyɛɛ,

¹⁹ “Óo Eezuɛ, da ínuu láa túɛ-ƃelai páa ǹyée-ŋai tôŋ su. Íkɔ-kuluƃa-ŋai da toôi.

²⁰ Káfe mò Gâa taai su kpaa máŋ ká duŋ táa-tàa Asikɛlɔŋ pere lee-ŋai su. Káfe ǹɛɛ naa Felesia-ŋai nɛnyaai dí lii-nɛ̃ɛ kula m̀ɛnii ŋí su, kpaa máŋ ká ǹɛɛ naa dîai dífe a Ɣâla-ƃelai dí píli ɣelêi a dí koi-nɛ̃ɛ pere.

²¹ “Lúu da tuna fé pâi ŋɔ́nɔ pûi Giboa yee-ŋai dîa kpaa máŋ sí-sãa dí kpɛtɛ dîa, kpɛ́ni fêi, naa ƃé dí ŋ̀wála-wala-ƃelai díkpala ŋá-ɣale kɔli-kalaŋ maa liƃi naa, dífe ŋɔ́nɔ wúlɔ sia ni Sɔ̂ɔ ŋɔkpála ŋá-ɣale kɔli-kalaŋ ma.

²² Mɛɛ è kɛ̀ Zonetaŋ ŋɔtɔ̃ai sṹa lá. A kâa kɔ-kuluƃa da ƃòŋ la va ƃàlo. Ŋɛi maloŋ kâa fé kɛ́ ní Sɔ̂ɔ yêei. È ŋɔkpɔara-ƃelai su tee-tee a ŋɔƃóa-sɔkpɔi.

²³ “Sɔ̂ɔ da Zonetaŋ dí kɛ̀ a díkîe-ni wɛ́liɛɛ, wɛli-kɛ́-maa kɛ́ ƃò díyêei. Dífe kɛ́ ní a díŋaa kɔlɛɛ dífulu-laai su da dísaa pôlu ma. Díkɔɔ ma è kɛ̀ a vélaa é tɛ́ɛ kuɛ ma, díwála-walaa é tɛ́ɛ yala-sulu ma.

²⁴ “Káai a Eezuɛ nɛyãai ka wɔ́lɔ Sɔ̂ɔ mɛni ma. Nya ƃe pà kápɔ a zeɣe kpɔ̂lu lɛ́lɛɛi ŋí da gôo yɔlɔ-ŋai.

²⁵ “Kúkɔ-kuluƃa-ŋai da lɛɛ kɔ̂i Zonetaŋ poma a lâani ǹyéei tôŋ su.

²⁶ “Ńii toɔɔ̂i pôlu ímɛni ma ńeɣê Zonetaŋ. Ímaa mɛni è ńii làa. Ŋ̀wɛli kɛ́-maai kɛ̀ íyêei ḿɛni mai è kɛ̀ a gbanaŋɔɔ é tɛ́ɛ nɛnî da ŋɔsurɔ̂ŋ díloai wɛli kɛ́-maai ma.

²⁷ “Kúkɔ-kuluƃa líi-kpeleɛɛ-ŋai da saa. Kɛ̂i da kélee fé ŋɔ́nɔ gɔ́-kɔ́-sãai dîa.”