Nwun mąąɓo 2 - Bible

Yâwɛɛ ŋɔkélai è kɛ̀ Bɔsiŋ

¹ Naa kɛ́ɛ tíi, Yâwɛɛ ŋɔkéla tɔnɔ è sìɣe Geega é lí Bɔsiŋ ǹyɛɛ Eezuɛ-ŋai dîai, “Ŋá kákùla Ize lɔii su ŋá pá a káa ǹɔii su nyíi ŋá kpanaŋ-woo kɛ̀ naa kánûa pɔlɔ-ŋai yêei a gɛ́ɛ ŋa pâi dɛɛ̂i kápɔi. Ŋá mò kâa a gɛ́ɛ ḿve pâi gbanaŋ-wooi ŋí ɣâlei nyíi ŋá gɛ̀ kánûai yêei.

² Káa máŋ ǹûai ka liî dílɔii sui, maa fé nɛ̃ɛ ní kɛ̀ a gɛ́ɛ ka dîa-ni ká woo-mii da kélee kɛ́. Maa nɛ̃ɛ̂i kɛ̀ ká díɣâla teƃele-ŋai kélee wólo. Kɛ́lɛ káfe niî m̀ɛnii kɛ́ ní nyíi ŋá mò kâai. Ǹyaŋ mɛni da kpɛ́ni ƃé kákaa nâa gɛ̂i.

³ M̀ɛni ma, ŋa m̀ôi kâa a gɛ́ɛ ḿve pâi díkpɛ̂i kátuɛ tãi ka kɛ̀ liî lai. Kɛ́lɛ da pâi kɛ̂i a kákpɔara-ƃela. Ǹyaŋ ka pâi kɔ̂i a díɣâla-ŋai díƃarei.”

⁴ Gélai kɛ́ɛ a nyíŋí ƃò dîai, Eezuɛ-ŋai kélee dípɛ̀lɛ wɔ́lɔɔ ma.

⁵ Zɛŋ ƃé gɛ̀ díkɛ gwaai ŋí ma láa sèe a Bɔsiŋ. Dí nâa sâla kùla naa Yâwɛɛ ma.

M̀ɛni-ŋai kɛ̀ Zasua saá pôlu mai

⁶ Nya ƃe Zasua è gɛ̀ Eezuɛ-ŋai dí lí dí díwɔ̂ lɔii-ŋai síɣe tɛi-tɛi.

⁷ Zasua kɛ́ɛ ɣele mai, Eezuɛ-ŋai da kâa díwoli tɔ̀ɔ Yâwɛɛ wóo ma díkɛ vɛ̀li. Gɛ́ɛ máŋ a saai, díkɛ̀ nɔ́ niî vɛlîi a kɛ̀ núu da káa dílaa túɛ nyíi kɛ̀ a m̀ɛni kpaya-kpayaai kɔ́lɔŋɔɔ nyíi Yâwɛɛ a wɔ́lɔ gɛ́ Eezuɛ-ŋai mɛ̂ni mai.

⁸ Yâwɛɛ ŋɔtíi kɛ́ nuui Zasua, Nuŋ ǹóŋ kɛ́ɛ a kóraŋ ŋuŋ tɔ̂nɔ pôlu puui, è nâa sàa.

⁹ Nya ƃe dí ǹoo gbɔ́ɔi lɔii ma Tiŋna Sela nyíi kɛ̀ ǹyée lɔii su Ifiraŋ ŋɔlɔii su Gâa Yeei ŋɔyá ŋûa-perei.

¹⁰ Gɛ́ɛ ǹúu suui nyíti zu-ƃela kélee da saai, dípôlu ma-ƃelai dí nìa Yâwɛɛ ma da m̀ɛni-ŋai kélee è gɛ̀ Eezuɛ mɛni mai.

Eezuɛ è bôlu tɔ̀ɔ Yâwɛɛ ma

¹¹ Nya ƃe Eezuɛ-ŋai dí dípôlu tɔ̀ɔ Yâwɛɛ ma dí pɛ́lɛ Bêe Ɣalai fɛliɛɛ ma.

¹² Dí kpèra Yâwɛɛ, dínûa pɔlɔ-ŋai Díɣâlai fɛliɛɛ ma nyíi kɛ̀ a Ŋ̀âlai nyíi díkùla Ize lɔii sui. Dí nâa pɛ̀lɛ Ɣâla da kpɛ́ni-ŋa fɛliɛɛ ma. Ŋ̀âla-ŋai ŋí díkɛ̀ a díkɔlɛ ma-ƃelai díwɔ̂ ɣala-ŋai. Tãi díkɛ̀ ŋ̀âla-ŋai ŋí fɛlîi lai, è gɛ̀ Yâwɛɛ é ǹíi ŋ̀wána dîa a ŋ̀ánaa.

¹³ Dí dípôlu tɔ̀ɔ Yâwɛɛ ma dípɛlɛ Keena-ŋai díɣâla-ŋai Bêe da Asira fɛlîi.

¹⁴ M̀ɛni ma Yâwɛɛ è ǹíi ŋwàna kpɔ́ dîa a ŋ̀ánaa é gɛ́ nûa dí tóo dîa dí díkɔ̃liŋ kélee síɣe. Yâwɛɛ è gɛ̀ Eezuɛ-ŋai kpɔara-ƃelai dí kɔ́ pɛ́lɛ dîa dí díyee mɛi ɣále. Pɔri mâa fé kɛ́ ní dîɛ a gɛ́ɛ dí díkpîŋ maa kɔ̃ɔ díkpɔara-ƃelai yêei.

¹⁵ Da kâa lì a gɛ́ɛ dí kɔ́ díkpɔara-ƃelai pɔ́, Yâwɛɛ a kùla dípôlu yɛ̂ɛ berei nɔ́ è wɔ́lɔ mò la dîai. M̀ɛnii ŋí è gɛ̀ lii too pôlu támaa é pá dípɔ.

¹⁶ Naa pôlu ma, Yâwɛɛ è Eezuɛ-ŋai láa túɛ-ƃela lɛ̀ nyíi díŋuŋ ma ƃò é dí kúla doo mâ kɛ́-ƃelai yêei.

¹⁷ Kɛ́lɛ Eezuɛ-ŋai dífa kâa díwoli tɔ̀ɔ dílaa túɛ-ƃelai dîa. Díkɛ̀ nɔ́ ɣâla da kpɛ́ni-ŋa fɛlîi dí dípôlu tɔɔ Yâwɛɛ ma. Dínûa pɔlɔ-ŋai dí wɔ́lɔ díwoli tɔ̀ɔ m̀a kɛ́lɛ díwɔ̂ nia-pɛlɛɛi dífe gɛ́ ní a dɔnɔ kpîŋ.

¹⁸ Yâwɛɛ a kâa Eezuɛ-ŋai láa túɛ-nuu lɛ̀, a tɔ̀ɔ m̀aa nuui pôlu a gɛ́ɛ é díŋuŋ ma ƃó díkpɔara-ƃelai yêei. A kâa tɔ̀ɔ ǹúu láa túɛ-ƃelai ŋí pôlu é lɛ́ɛ la zu díwɔ̂ tãi é kpɛ́ɛ. Yâwɛɛ a kâa kɛ̀ dímalôŋ kâai, kpɛ́ni fêi, da kâa kɛ̀ wɔ̂lɔi m̀a dímɛni sôlii su.

¹⁹ Kɛ́lɛ dílaa túɛ-nuui a kàa sàa, da lène pôlu ŋɔ́nɔ dísɔnyɔ̂ŋ pɔlɔi su dí sɔnyɔ̂ŋ támaa kɛ́ é tɛ́ɛ dínûa pɔlɔ-ŋa dîa. Da kâa kɛ̀ nɔ́ ɣâla da kpɛ́ni-ŋa fɛlîi dífa têe dísɔnyɔ̂ŋ-ŋai dîa.

²⁰ Ǹyaŋ tãi nɔ́ da kâa kɛ̀ tûai la a gɛ́ɛ tíi, Yâwɛɛ a kâa ǹíi ŋwàna kpɔ́ dîa a ŋ̀ánaa gɛ́ mò ǹyɛɛ, “Ǹûai ŋí dífe gbanaŋ-wooi mɛi káa ní nyíi ŋá wɔ́lɔ gɛ̀ dínûa pɔlɔ-ŋai dí m̀ɛi kâai, kpɛ́ni fêi, dífa díwoli tɔ̀ɔ ḿâ.

²¹ M̀ɛni ma ḿve pâi ŋɔ́nɔ ǹɔii-ŋûŋ-ŋai zu-ƃela Zasua è dílɛ̀ɛ naa gɛ́ saai díta kpɛ̂i.

²² Ŋa pâi dílɛɛ̂i naa ŋá gáa à kɛ̀ Eezuɛ-ŋai da pâi lenêi pôlu dí díwoli tɔ́ɔ ḿâ yɛ̂ɛ berei dínûa pɔlɔ-ŋa dí wɔ́lɔ gɛ̀ lai.”

²³ M̀ɛni ma Yâwɛɛ è fàa ma a gɛ́ɛ ǹɔii-ŋûŋ-ŋai ŋí dí lɛ́ɛ naa. Vé ǹɛɛ ní naa a gɛ́ɛ Zasua é díkpɛ ǹɔii su, kpaa máŋ ǹyaa Yâwɛɛ é díkpɛ ní ǹɔii su Zasua saá pôlu ma.