Mise 5 - Bible

¹ Káai a Zerusâlɛŋ-ƃelai, kaa kákɔ-kuluƃa-ŋai ŋáa tɛ́ ma. Da kúmaa tínaŋ! Díkaa nâa kɔ́ pɛlɛ̂i Eezuɛ-ŋuŋ túɛ-nuui ma.

Núu ŋuŋ tuɛ-nuu a pâi kulâi Bɛpeleɣɛ̃ɛ

² Yâwɛɛ è mò ǹyɛɛi, “Óo Bɛpeleɣɛ̃ɛ Ɛfata, yáai Ifiraŋ lɔii-kpiniŋ sui, íkaa a daa kuro-tei dɔnɔ Zuda taa-ŋai sáma, kɛ́lɛ ǹaa ƃé ǹúu-ŋuŋ túɛ-nuui a pâi kulâi naa Eezuɛ mɛni ma nyii ŋɔnûa pɔlɔ-ŋai dísuu kɔ́ɔ a wɔ́lɔ pìlaŋ kpɔ́ a tãi su kôyai.”

³ Yâwɛɛ a pâi Eezuɛ-ŋai lɛɛ̂i luɛ-laa su é lɛ́ɛ la zu ǹɛnîi é ǹóŋ-surɔŋ maa sɔlɔ ƃó. Gɛ̀ ní ǹîa-ni nyii ŋai luɛ-laa sui, da pâi lenêi pôlu dí sée Eezuɛ lɔii su.

⁴ Tãi a pâ lai, a pâi ŋɔnûai mɛi kâai a wála-wâla-laa nyii a kûla Yâwɛɛ yêei. Ǹyaŋ a pâi dí mɛi kâai a fólo-laa nyii a kûla Ɣâla Yâwɛɛ ǹyaa kpîŋ yêei,

⁵ ǹyaŋ a pâi pâi a lii-sêe. Tãi Asiria-ŋai da pâi pâi la gɛɛ dí kúlɔii síɣe, dí kú maa kɔ̃ɔ kwaa-ŋai ma siɣei, kwa pâi núu láa túɛ-ƃela lɔ́ɔlu mɛi feerɛ siɣêi da kɔ́-kaloŋ lɔ́ɔlu mɛi saaƃa dí tɔɔ kútuɛ kú kɔ́ dípɔ.

Ŋuŋ-ma ƃó da tɔŋ-kpɛ-maa

⁶ Da pâi Asiria siɣêi a ƃóa-sɔ̂kpɔ. Da pâi kúŋuŋ ma ƃôi Asiria-ŋai yêei tãi da pâ la kúlɔii sui.

⁷ À kɛ̀ tí, Zeeka ŋɔnûai lɛ̀ɛ pôlui, da pâi liî lɔii da kpɛ́ni ŋa su. Da pâi kulâi naa yɛ̂ɛ lúu da tuna da kùla Yâwɛɛ yêei dí pú kala ma nyii va núu maa-kpɛ̂ŋ kpaa máŋ núu-kpune ǹônii.

⁸ Zeeka ŋɔnûai lɛ̀ɛ pôlui, díkaa yɛ̂ɛ yala-sûlu a kɛ̀ lɔɔ sua-ŋa sáma, yɛ̂ɛ yala-sûlu-loŋ a kɛ̀ ƃála-ŋa sáma ǹyaŋ a dísòŋ núu da fa dí kula ǹyêei.

⁹ Káyee a pâi tɛɛ̂i kákpɔara-ƃelai dîa ká dípaa.

¹⁰ Yâwɛɛ è mò ǹyɛɛi, “Ŋa pâi Eezuɛ-ŋai díkpɔara-ƃelai dísoo-ŋai paâi, ŋá díkɔ-kɔ keleŋ-ŋai kara.

¹¹ Ŋa pâi dítaa-lêe-ŋai wôloi da dí siɣãŋ-ŋai.

¹² Ŋa pâi dísale kaŋ-ŋai su karâi, dí tɛli-kpɛ-ƃelai dífe pâi ŋɔ́nɔ tɛli kpɛ̂i dí mɛni ma.

¹³ Ŋa pâi dí kpɛtɛ ɣâla-ŋai su karâi da ƃɛ́i díkaa naai. À kɛ̀ tí, dífe pâi ŋɔ́nɔ wɔ́lɔ pɛlɛ̂i díkɔɔ mu.

¹⁴ Ŋa pâi díɣâlai Asɔɔ ŋɔpɔkɔɔŋ wôloi ŋá dítaa-lêe-ŋai su kara.

¹⁵ Ŋálii ŋwânai su, ŋa pâi mɛni gba kulâi ǹɔii-ŋûŋ-ŋai dîa dífa ŋ́oo mɛnii.”