Mise 4 - Bible

Yâwɛɛ ŋɔlii-see kaloŋ-laai

¹ Ɣele-ŋa da pâi, maa tãi tí, ǹyéei Yâwɛɛ Ŋɔpɛ́rɛ Kɛ́tɛi káa tɔɔ-ni mai, a pâi kɛ̂i ŋ̀éniɛi su yee kpaya-kpayai kélee mɛi. A pâi kɛ̂i a dɔɔ́ dɛɛ́ ǹyée-ŋai kélee dîa. Lɔii-ŋuŋ-ŋa su-ƃela da pâi kɛ̂i kɔ̂i a gɛ́ɛ dí tɛ́ naa.

² Núu támaa da pâi pâi dîyɛɛi, “Ka pá kwáa lí Yâwɛɛ ŋɔyéei tôŋ su. Ka pá kwáa lí Zeeka Ŋɔɣâlai Ŋɔpɛ́rɛi mu. Ǹaa ƃé a pâi m̀ɛni-ŋai lɛ̂i naa kûa a gɛ́ɛ kú sía a dia. Nyíŋi ƃé pâi gɛ̂i kú kúɣeniɛi kɛ́ yɛ̂ɛ berei a ŋ̀wɛ̂lii lai. Kɛ́lɛ Yâwɛɛ ŋɔsɛŋ lɛ́ɛi a kûla Zerusâlɛŋ. Zãiyɔŋ Yeei ma ƃé a lôno naa ŋɔnûai pɔ́.”

³ Ǹuu-namui a pâi mɛni su kpɛtɛ̂i núu támaa loai. A pâi mɛni su kpɛtɛ̂i ǹɔii-ŋuŋ wála-wala-ŋai sáma nyii-ŋai dínaa kôyai kpaa máŋ dínaa kpuâai díkîe-ni dîai. Da pâi díkɔ-kɔ ƃoa-sɔkpɔ-ŋai ɣalêi a kwaa sí kali. Da pâi díkpala-ŋai ɣalêi a mɔlɔŋ tée ƃoa-ŋa. Lɔii-ŋuŋ da fé ŋɔ́nɔ pâi kɔ́ pɛlɛ̂i m̀arâŋ lɔii-ŋuŋ ma. Dífe pâi ŋɔ́nɔ kɔ́-kɔ pere ma kɔ̂rii.

⁴ Da pâi liî díkpɔmɔ kpâlaŋ-ŋai ŋá tɛi-tɛi dí sée dífîi wuru-ŋai mu, ǹyaŋ yao fé pâi kɛ̂i díkɔlɔi. Ŋ̀wála-wâla kélee Yâwɛɛ ƃé mò tí.

⁵ Ǹɔii-ŋuŋ-ŋai da díɣâla-ŋai fɛ̀li tɛi-tɛi kɛ́lɛ kúai a Eezuɛ-ŋai, kwa pâi sîai Yâwɛɛ Kúɣâlai láai su wɔ́lɔ-wɔlɔ da wɔ́lɔ-wɔlɔ.

Eezuɛ-ŋai da pâi kulâi luɛ-laa su

⁶ Yâwɛɛ è mò ǹyɛɛi, “Tãi a pâi tãi ŋa pâi gɔ pu-ƃelai ŋáa tɛ̂i gîe ma, da diai díkaa luɛ-laa sui, é pɛ́lɛ diai dîa ŋa dímɛnii ŋá teei.

⁷ Dí kɔ̃liŋɔɔi dí naa kôya dípɔ-taai ma kɛ́lɛ ŋa pâi dí kɛ̂i ŋɔ́nɔ a lɔii-ŋûŋ ŋá díkɛ a lɔii-ŋûŋ kpanaŋɔɔ. Ŋa pâi kɛ̂i dímɛi a kâloŋ Zãiyɔŋ yeei ma wɔ́lɔ-wɔlɔ.”

⁸ Ǹyaŋ yá Zerusâlɛŋ, ƃɛ́i Ɣâla káa naa yɛ̂ɛ ƃála mɛi káa-nuu gɛ́ ŋɔƃála-ŋai mɛi kâai, ŋa pâi ŋɔ́nɔ íkɛ̂i a ŋátaa-lêei yɛ̂ɛ berei íkɛ̀ lai.

⁹ Ƃa wɔ̂lɔi lé mɛni ma? Káloŋ fé ŋɔ́nɔ íyêei? Ímɛni su káa-nuu fé ŋɔ́nɔ ma ǹyaa ƃa wɔ̂lɔi yɛ̂ɛ koi-têe à kɛ̀ nɛnî mai?

¹⁰ Káai a Zerusâlɛŋ-ƃelai, ka kámu siɣe ká nyíɣɛ yɛ̂ɛ koi-têe à kɛ̀ nɛnî ma kpɛ́ni fêi da pâi kákulâi daa-lêei su dí lí a káa lɔii pûŋ su. Da pâi kákulâi naa dí lí a káa Babelɔŋ lɔii su. Kɛ́lɛ Yâwɛɛ a pâi kákulâi naa kákpɔara-ƃelai yêei.

¹¹ Kákpɔara-ƃela da kula lɔii-ŋûŋ támaa su dîyɛɛi, “Kwa pâi Zerusâlɛŋ su karâi, naa é lɛ́ɛ a pilêŋ ŋá.”

¹² Kɛ́lɛ ǹûai ŋí dífe Yâwɛɛ líi su kɔ́lɔŋ da ŋɔmɛni kpɛtɛɛi. Dífe gɔ́lɔŋ a gɛɛ a díŋaa tɛ́ ma a gɛɛ é dí táŋ.

¹³ Yâwɛɛ è mò Zerusâlɛŋ-ƃelai dîa ǹyɛɛi, “Ka pɛlɛ kákpɔara-ƃelai dîa. Ŋa pâi kákponôi kpananîi yɛ̂ɛ niŋa-sîrɛ nyii mĩla káa a kɔli, zôlo kɛ́ ƃò a ƃarai. Ka pâi lɔii-ŋûŋ támaa yée mɛi ɣâlei, ká díkɔ̃liŋ kula díyêei nyii dí zɔlɔ ƃô a wôya perei, ka pá la ḿbɔ ńyãai a ǹɔii kélee Ǹuu-namui.”