Mise 3 - Bible

Maka è ǹyée kùla Eezuɛ-ŋuŋ tuɛ-ƃelai mu

¹ Káai a Eezuɛ-ŋuŋ túɛ-ƃelai, ka káwoli tɔ́ɔ ḿâ. Vé a sɛŋ ká tɔ̃yâ-laa kɔ́lɔŋ?

² Kɛ́lɛ ka mɛni lɛ́lɛɛ kpɔ̀ara, ká ǹyɔ́mɔɔi wɛ́li, ka ŋánûai kɔlɔ kúla, ká díluu kúla díkao ma yɛ̂ɛ kɔ́li a sua sôŋ.

³ Ká díkɔlɔ kûla, ká díkao wólo-wôlo ká díluu su tée-têe yɛ̂ɛ núu a kɛ̀ pâi láo ɣîlii é mii.

⁴ Káai a ǹúu-tuɛ-ƃelai tãi a pâi pâi, ká pâi wɔ̂lɔi Yâwɛɛ ma, kɛ́lɛ vé pâi káwoo su toôi. A pâi ŋ̀ɛ́i loôi kâa kpɛ́ni fêi, ká mɛni nyɔ́mɔɔ kɛ̀.

⁵ Yâwɛɛ è m̀ɛni-ŋai ŋí ƃò diai dîa da díkpîŋ sìɣe a ŋɔlóno kɛ́-ƃela díkɛ ŋɔnûai ƃòo dîyɛɛi, “Lii-see é kɛ́ kápɛrɛi lá.” Kpɛ́ni fêi, da sɛŋ da wɛ̂lii díyêei, ǹyaŋ díkɛ diai fôo dífa díyee sèe dímui.

⁶ “Ǹɛ́ɛ Ɣâla-woo ƃó-ƃelai, kátãi a kɛ́ kpɛɛ̂i. Kpíni su kɛ́tɛ a pâi toôi kâa nyii káfa pɔ̂ri m̀ɛnii kɔ́lɔnîi pâi kɛ̂i a kaai. Vóloi a pâi liî ka káfa ŋɔ́nɔ mɛni da kélee ŋá kàa. Kpɛ́ni fêi ka ŋánûai kúla bere sã́ai ma.”

⁷ Diai da mɛni ƃô naa túɛi, da pâi ŋumɛi dífɛɣɛ mɛni mai su. Kpɛ́ni fêi Ɣâla fé pâi ŋɔ́nɔ dí târei mɛni da kélee su.

⁸ Kɛ́lɛ à kɛ̀ a ńyãa, Yâwɛɛ a wála-wala tɛɛ ḿbɔ. Ŋɔmɔ̂leŋ káa ŋ́gbonôi a gɛɛ ŋá tɔ̃yâ mɛni kɛ́ a lii-kpêle pere a gɛɛ ŋá Zeeka ŋɔtɔ̂ŋ karaai lɛ́ ma, ŋá Eezuɛ-ŋai dísɔnyɔ̂ŋ lɛ́ dîa.

⁹ Ka káwoli tɔ́ɔ, káai a Zeeka ŋɔnûai da Eezuɛ-ŋai dímɛi-ƃelai, káai ka tɔ̃yâ-laa kpɔara ka mɛni lɛ́lɛɛ pene a mɛni nyɔ́mɔɔi.

¹⁰ Ka Zãiyɔŋ tɔ̀ɔ a núu paa. Ka Zerusâlɛŋ tɔɔ a wôya kɛ́ɛ.

¹¹ Ǹúu-ŋuŋ túɛ-ƃelai da yee-pɛlɛ-ǹá sɛŋ sòŋ dímɛni-sâa ƃóɔɔi su. Zâla láa soŋ-ƃelai da dɔ̂ŋ lɛ̀ sɛŋ mɛni ma, ǹɛ́ɛ ɣala-woo ƃó-ƃelai díkɛ tuɛ-mɛni ƃò a lɛ́ɛ sɛŋ-kao mɛni ma. É máŋ kɛ́ tí, díkili tɔɔ̂i nɔ́ Yâwɛɛ ma dîyɛɛi, “Yâwɛɛ káa kúkɔlɛ, mɛni da kélee fa pɔ̂ri kɛ̂i a kûa.”

¹² Kátûa-perei mɛni ma, Zãiyɔŋ a pâi kɛ̂i a kpâlaŋ ŋá tii kɛ̂i. Zerusâlɛŋ a pâi kɛ̂i a pilêŋ ŋá, Ɣâla ŋɔpɛ́rɛi tɔɔ̂i kɛ́ ƃò a wolâ su.