M̀ɛni-lɛɛi 7 - Bible

Eezuɛ ƃela wála ŋuŋ tɔnɔ pôlu buu náaŋ kao náaŋ (144,000)

¹ Nyíŋi pôlu ma, ŋá Ɣâla-taa-kela náaŋ kàa tɔɔ ni ǹɔii ŋɔsonôŋ náaŋ su, díkɛ ǹɔii ŋɔfãa náaŋ soŋ pôlu a gɛɛ fãa fé tɛ̀ɛ ǹɔii su, kpaa máŋ ǹyúoi ŋá, kpaa máŋ wuru kélee ma.

² È kɛ̀ tí, ŋá Ɣâla-taa-kela da kpɛni kàa é kúla voloi kulâi-pere, vulu-laa-Ɣâlai ŋɔkɔlɔ lá tɛ-sɛŋ kɛ́ ƃo ǹyêei. È Ŋ̀âla-taa-kela náaŋ tòli a ŋ̀óo su kɛ́tɛ, nyíi-ŋai dí wala-wala tɛ̀ɛ dípɔ a gɛɛ dí sɛŋ sóli ǹɔii ma da ǹyúoi,

³ nyɛɛi, “Káfe sɛŋ sôli ǹɔii ma, kpaa máŋ ǹyúoi, kpaa máŋ ŋ̀úru-ŋai dîa é lɛ́ɛ la zu kú gɔlɔ lá tɛ-sɛŋ pɛ́lɛ Kúɣâlai yée-mu-ƃelai tôŋ lá.”

⁴ Ŋá m̀ɛni núu ɣɛɛlu ƃe dí gɔlɔ lá tɛ-sɛŋ pɛ́lɛ dítôŋ lái. Dí kɛ̀ a núu wála ŋuŋ tɔnɔ pôlu buu náaŋ kao náaŋ. Dí kùla Eezuɛ-ŋai dísuu kélee su.

⁵ Dí gɔlɔ lá tɛ-sɛŋ pɛ́lɛ núu wála puu kao feerɛ (12,000) tôŋ lá Zudasi ŋɔsuui su, dí bɛ̀lɛ núu wála puu kao feerɛ (12,000) tôŋ lá Lubiŋ ŋɔsuui su. Dí bɛ̀lɛ núu wála puu kao feerɛ (12,000) tôŋ lá Gâa ŋɔsuui su.

⁶ Dí bɛ̀lɛ núu wála puu kao feerɛ (12,000) tôŋ lá Asɛ ŋɔ-suui su, dí bɛlɛ núu wála puu kao feerɛ (12,000) tôŋ lá Nɛfɛtɛli ŋɔsuui su, dí bɛ̀lɛ núu wála puu kao feerɛ (12,000) tôŋ lá Manasɛ ŋɔsuui su.

⁷ Dí bɛ̀lɛ núu wála puu kao feerɛ (12,000) tôŋ lá Simiɔŋ ŋɔsuui su, dí bɛ̀lɛ núu wála puu kao feerɛ (12,000) tôŋ lá Liiva ŋɔsuui su. Dí bɛ̀lɛ núu wála puu kao feerɛ (12,000) tôŋ lá Isaka ŋɔsuui su.

⁸ Dí bɛ̀lɛ núu wála puu kao feerɛ (12,000) tôŋ lá Zɛbulɔŋ ŋɔsuui su. Dí bɛ̀lɛ núu wála puu kao feerɛ (12,000) tôŋ lá Zosɛ ŋɔsuui su. Dí bɛ̀lɛ núu wála puu kao feerɛ (12,000) tôŋ lá Bɛŋsima ŋɔsuui su.

Yokpo kole káa gbɔŋ kɛ́tɛi su-ƃelai dîa

⁹ Nyíŋi pôlu ma, ŋá kpɔŋ kɛ́tɛ kàa, nyíi núu fa pɔ̂ri zu-ƃela lônoi. Dí kùla lɔii-ŋuŋ kélee su, dí kúla nuu-suu kélee su, dí kúla sii kélee su, díkɛ sii-woo kélee ƃo. Dí kɛ̀ ƃò tɔɔ ni gâloŋ-see-sɛŋ ŋ́ɛi-tuɛ da M̀ála-loŋ. Yokpo kole è kɛ́ dîa, tóu-laa kɛ́ ƃò díyêei.

¹⁰ Dí laɣi a díwoo su kɛ́tɛ, díyɛɛi, “M̀álo-laai a kulâi Kúɣâlai yêei da M̀ála-loŋ, Kúɣâlai nyíi gáa see ni gâloŋ-see-sɛŋ ŋái!”

¹¹ Nya ƃe ŋ̀âla-taa-kela-ŋai kélee dí tìnaŋ gâloŋ-see-sɛŋ ma, dí tinaŋ ǹúu-pɔlɔ-ŋai dîa da vúlu-sãa náaŋ, dí díŋuŋ pîlaŋ ǹɔii ma gâloŋ-see-sɛŋ ŋ́ɛi-tuɛ dí Ɣâla fɛli,

¹² díyɛɛi, “É kɛ́ tí! Lûwa, fólo-laa, táre, sɛɣɛ-féi, ƃaa-kɛ-maa, wala-wala-laa da kpanaŋ-laa dí kɛ̀ Kúɣâlai ma wɔ́lɔ-wɔlɔ da wɔlɔ-wɔlɔ! É kɛ́ tí.”

¹³ È kɛ̀ tí, ǹúu-pɔlɔ-ŋai dɔnɔ è lòno ḿbɔ, nyɛɛi, “Gbɛ̂ɛ ƃa ǹûai ŋí ǹyokpo kole-ŋai díkaa diai? Mí ƃe dí kùla naa?”

¹⁴ Ŋá mò mà, nyɛɛi, “Ńâŋ, í gɔlɔŋ.” Nya ƃe è mò mà, nyɛɛi, “Diai dí kùla mɛni-kpɔ̂lu kɛ́tɛi sui, dia ká ŋí. Da díyokpo-ŋai wáa da díkole M̀ála-loŋ ŋãai su.

¹⁵ Mɛni ma díkaa Ɣâla ŋɔkâloŋ-see-sɛŋ ŋ́ɛi-tuɛ, díkɛ tíi kɛ́ mì ŋɔkwaa maa waai ma a fólo da kpini. Ǹyaŋ ǹúui gáa see ni gâloŋ-see-sɛŋ ŋái, ŋɔkɛ-naai a pâi kɛ̂i a ninîŋ dímɛi.

¹⁶ Puru fé pâi ŋɔ́nɔ díkɛ̂i, kpaa máŋ kpele-wɛli é ŋɔ́nɔ díkɛ. Voloi fé pâi díkerenii, kpaa máŋ sɛŋ-fãa da kpɛni é díkereŋ.

¹⁷ Kpɛ́ni fêi, M̀ála-loŋ gáa gâloŋ-see-sɛŋ samai, a pâi kɛ̂i a diai a m̀ála-ŋai dímɛi-kaa-nuu., É tɔ́ɔ dítuɛ é lí a dia vúlu-laa ya-loŋ lá. Ǹyaŋ Ɣâla a pâi díŋɛi-ya kélee kɔɔ̂i díŋɛi.”