M̀ɛni-lɛɛi 2 - Bible

Ɛfesɛ-worɛ-wooi

¹ “Ŋ̀óo-ŋai ŋí pɔ̃yɛ Ɛfesɛ Kôrai-toli-kpɔŋ ŋɔkélai pɔ naa. ‘Ǹúui bɛmɛlɛŋ-kao lɔ́ɔlu mɛi féerɛi káa ǹáa-mii-yee ŋái, nyíi siâi gôo-laŋpo-see-sɛŋ lɔ́ɔlu mɛi féerɛi samai ŋ̀óo ká ŋí.

² “ ‘Ŋá ítii-ŋai kɔ́lɔŋ, ímɔ̃lɛi, da ílii-kpelei gáa íyeêi da berei ífa sɔnyɔ̂ŋ-ƃela maa nɛ̂ɛ lai, kɛ́lɛ, ka diai su kɔ̀ɔŋ da díkpîŋ tòli a Zîsɛ ŋɔsia-ƃela ǹyaŋ dífe lai, ǹyaŋ í gàa a gɛɛ díkaa a wôya-ƃela.

³ Ŋá gɔ́lɔŋ íkaa mɛni-soli kâai lii-kpele-pere su ńaai mɛni ma, ǹyaŋ ífii fé niî kpɛɛ ni.

⁴ Kɛ́lɛ, nyíŋi ƃe ńdɔɔ̂i la yâ a gɛɛ ya dɔ̃yâi lɛ́ɛ nyíi kɛ̀ íyeêi a maa-ŋuŋ.

⁵ Mɛnii ya kula la bere sã́ai máŋ, é lɛ́ɛ íkili ŋá í ílii pene í díi-ŋai kɛ́ í gɛ̀ a maa-ŋuŋ. À wàla kɛ́ tí, ŋa pâi pâi ŋa ílaŋpo-see-sɛŋ kúla dɔɔ̂i, é lɛ́ɛ la zu fɛ̂ɛ í ílii pene.

⁶ É máŋ kɛ́ tí, mɛni lɛ́lɛɛi ya gɛ̀i ǹyaa ƃa ya Nekolai-ŋai tûa-perei kpɔara, nyíi ńyãa máŋ ŋá gbɔ̀arai.

⁷ Ǹúui wóli káa ma a gɛɛ é mɛni mɛnii, tɔ̀ɔ é m̀ɛnii mɛ̂ni Mɔ̂leŋ a m̀ôi Kôrai-toli-kpɔŋ-ŋai diai. Ǹúui a yee-tɛɛ-maa kɛ̂i, ŋa pâi nɛɛ̂i naa é vúlu-laa-wooi ƃá mii nyíi gáa Ɣâla ŋɔsuâi sui.’

Simɛna-worɛ-wooi

⁸ “Ŋ̀óo-ŋai ŋí pɔ̃yɛ Kôrai-toli-kpɔŋ gáa Simɛnai ŋɔkélai pɔ naa. ‘Ǹúui gáa a maa-ŋuŋ da gbɛɛ ŋái nyíi sàa é pá pôlu fúlu-laa sui, wóo ká ŋí.

⁹ “ ‘Ŋá ímɛni-kpɔlui kɔ́lɔŋ da íkôlo-laai kɛ́lɛ, íkaa a tɔɔ-nuu é pɛ́lɛ tɛ-ŋɛi-ƃela dîa nyíi-ŋai da díkpîŋ tòli a Zûu-ŋa, ǹyaŋ dífe lai, kɛ́lɛ, dí ƃo a Sêtɔŋ ŋɔnúu-kpului.

¹⁰ Ífe yao mɛni-solii ḿâ ya pá gaâi. Gáa, Dɛ̂ƃele a pá nâa káta-ni pilîi kpini-pɛrɛ mu a gɛɛ su-kɔɔŋ é pa kápɔ, ǹyaŋ ká pâi mɛni-kpɔlu kâai a ɣele-kûu puu. Kɛ́ a núu sãa é lɛ́ɛ la zu í sáa, ǹyaŋ ŋa pâi fúlu-laa-ƃɔrɔ tɛɛ̂i ípɔ.

¹¹ Ǹúui wóli káa ma a gɛɛ é mɛni mɛnii, tɔ̀ɔ é m̀ɛnii mɛ̂ni Mɔ̂leŋ a m̀ôi Kôrai-toli-kpɔŋ-ŋai diai. Ǹúui a yee-tɛɛ-ma kɛ̂i, zaai veerɛ-ɣelei fé pâi sɛŋ solîi ma.’

Pɛgamɔŋ-worɛ-wooi

¹² “Ŋ̀óo-ŋai ŋí pɔ̃yɛ Kôrai-toli-kpɔŋ gáa Pɛgamɔŋ ŋɔkélai pɔ́ naa. ‘Ǹúui m̀óa-sɔkpɔ̂i ŋá kɛ́ɛ gwaa feerɛ mai káa ǹyêei, ŋ̀óo ká ŋí.

¹³ “ ‘Ŋá ƃɛi kɔ́lɔŋ íkaa naai, nyíi naa ƃa ƃɛi Sêtɔŋ ŋɔkâloŋ see-sɛŋ káa naai, ya ńaai sóŋ a gbanaŋɔɔ. Ífe ŋálaa-lai maa sia too ní Aŋtipa ŋɔtãi ma máŋ, nyíi kɛ̀ a ŋásere gɛ̀ ƃò a núu sã́ai, nyíi dí bàa kásama ƃɛi Sêtɔŋ káa naai.

¹⁴ Kɛ́lɛ, mɛni da-ni káa naa ńdɔɔ̂i la yâ. Maa-mɛni-ŋai ƃa núu da-ni káa naa íyeêi nyíi-ŋai da Beelaŋ ŋɔsɛŋ-lɛɛi sòŋ a gbanaŋɔɔ̂i, nyíi sɛŋ lɛ̂ Bara ma a gɛɛ é Eezuɛ ǹônii perêi kpáaŋ a gɛɛ dí mii-sɛŋ mii da gùla a sâla ŋ̀âla-pɔɔkɔ̂ŋ-ŋai diai, dí wulu-wulu-kɛ́ɛ maa kɔ̂ri.

¹⁵ Núu da-ni káa íyeêi máŋ da Nekolai-ŋai dísɛŋ-lɛɛi sòŋ a gbanaŋɔɔ.

¹⁶ Mɛni ma ílii pene. À wàla kɛ́ tí, ŋa pâi pâi ípɔ a maa félaa ŋá kɔ́ pɛ́lɛ dîa a m̀óa-sɔkpɔ̂i gáa ńai.

¹⁷ Ǹúui wóli káa ma a gɛɛ é mɛni mɛnii, tɔ̀ɔ é m̀ɛnii mɛ̂ni Mɔ̂leŋ a m̀ôi Kôrai-toli-kpɔŋ-ŋai diai. Ǹúui a yee-tɛɛ-maa kɛ̂i, ŋa pâi manaa loɔɔi da tɛɛ̂i bɔ, ŋa kɔni kole tɛɛ bɔ̀ láa nina pɔ̃yɛɛ ma nyíi núu da fé gɔlɔŋ fɛ̂ɛ ǹúui a zɔlɔ ƃôi.’

Tayatira-worɛ-wooi

¹⁸ “Ŋ̀óo-ŋai ŋí pɔ̃yɛ Kôrai-toli-kpɔŋ gáa Tayatirai ŋɔkélai pɔ naa. ‘Ɣâla Ǹóŋ nyíi ŋ̀ɛi káa yɛ̂ɛ ŋɔŋ-leŋ, gɔ́ɔ kɛ́ ƃò yɛ̂ɛ ƃara-foloɔi, wóo-ŋai ká ŋí.

¹⁹ “ ‘Ŋá ítii-ŋai kɔ́lɔŋ, íwɛli-kɛ-maai, ílaa-lai, ítii, da nii-kpelei gáa íyeêi, a gɛɛ ŋɔ́nɔ ítii nɛ̀ɛ pôlui tɛɛ̂i duɛ-tuɛi ma.

²⁰ Kɛ́lɛ, ńdɔɔ̂i yâ nyíŋi mɛni ma, a gɛɛ í nɛnîi Zɛsebɛɛ lɛ̀ɛ naa, nyíi a gbîŋ tòli a Ɣâla ŋɔlóno-kɛ-nuu, gɛ̀ sɛŋ lɛ́ ńyee-mu-ƃelai dîa, gɛ̀ dílii kula a gɛɛ dí wulu-wulu-kɛɛ maa kɔ̂ri dí mii-sɛŋ mii nyíi da gùla a sâla ɣâla-pɔɔkɔ̂ŋ-ŋa diai.

²¹ Ŋá tãi tɛ̀ɛ bɔ a gɛɛ é ǹíi pene, kɛ́lɛ, vé faâi a gɛɛ é ŋɔwulu-wulu kɛ-lii pene.

²² Gáa, ŋa pâi ǹáâi kɔlɔ-fela-kpiŋ ŋá. Diai da dîa-ni da wulu-wulu kɛ̀i, ŋa pâi dípilîi mɛni-kpɔ̂lu kɛ́tɛ sú, é lɛ́ɛ la zu fɛ̂ɛ dí ŋɔmɛni nyɔ́mɔɔi maa-lii-pene kɛ́.

²³ Ǹyaŋ ŋa pâi ŋɔnîa-pɛlɛɛi paâi. Kôrai-toli-kpɔŋ-ŋai kélee da pâi gɔ́lɔnîi a gɛɛ ńyãa ƃa ǹúui a kíli kélee su kàa da líi kéleei, ǹyaŋ ŋa pâi sɛŋ kélee tɛɛ̂i núu pɔ́ tɛi-tɛi yɛ̂ɛ berei ŋɔtíi káa lai.

²⁴ Kɛ́lɛ, kákpeli-ŋai káai kákaa Tayatirai, káai káfe zɛŋ-lɛɛi ŋí soŋ ní a gbanaŋɔɔ̂i, káai káfe m̀ɛnii maa kɔ̂ri ní da dòli a Sêtɔŋ ŋɔmɛni-su-ziŋɔɔ̂i, ŋá m̀ó kâa, fé pâi tĩa wiɛ seêi ka-ŋûa.

²⁵ M̀ɛnii gáa káyêei ka zoŋ a gbanaŋɔɔ é lɛ́ɛ la zu ŋá pá.

²⁶ Ǹúui a yee-tɛɛ-maa kɛ̂i, da ǹúui a ŋátii-ŋai mɛi kâa é lɛ́ɛ la zu gbɛɛ ŋái é serii, ŋa pâi wala-wala tɛɛ̂i bɔ̀ ǹɔii-ŋûŋ-ŋai mɛi.

²⁷ Ǹyaŋ a pâi kɛ̂i dímɛi a kɔli-tuaŋ a wala-wala-laa é díwolo-wolo yɛ̂ɛ núu a pɔ́rɔ-leɣi wòlo, yɛ̂ɛ berei ńyãa kpîŋ máŋ ŋa wala-wala sɔlɔ ƃo la Ńâŋ yêei.

²⁸ Ǹyaŋ ŋa pâi ŋ̀ele-wala pɛmɛlɛŋ-kaoi tɛɛ̂i bɔ.

²⁹ Ǹúui wóli káa ma a gɛɛ é mɛni mɛ̂nii, tɔ̀ɔ é m̀ɛnii mɛni Mɔ̂leŋ a m̀ôi Kôrai-toli-kpɔŋ-ŋai diai.’