M̀ɛni-lɛɛi 18 - Bible

Babelɔŋ-wolo-mɛni

¹ Nyíŋi pôlu ma, ŋá Ɣâla-taa-kela da kpɛni kàa kulâi Ɣâla-taa, wala-wala-laa kɛ́tɛ kɛ́ ƃo ǹyêei. Ǹɔii ma è fòlo a ŋɔlɛ́lɛ-laai.

² Nya ƃe è tóli ƃò kpɔ́ a ŋ̀óo su wala-walaa, nyɛɛi, “Babelɔŋ kɛ́tɛi a wólo! Babelɔŋ kɛ́tɛi a wólo! Nàa a kɛ́ a nyînaŋ nyɔ́mɔɔ-ŋa kɛ̂i. Nàa a kɛ́ a m̀ɔlêŋ nyɔ́mɔɔ-ŋa kélee-kɛi. Nàa a kɛ́ a ŋ̀ɔni nyɔ́mɔɔ-ŋa nyíi-ŋai díkpɔara-lii káa núu-kpune koi kélee-kɛ̂i.

³ Kpɛ́ni fêi, ǹɔii ŋuŋ-ŋai kélee da ŋɔtûa-pere-nyɔŋ maa-sɛŋ-wɛliɛi maa-ŋwã̂aii kpele. Da ǹɔii su-kaloŋ ŋai da wulu-wulu kɛ́. Ǹɔii su-pɔni-tɔɔ-ƃelai da tɔɔ-lâa sɔlɔ ƃó ŋɔŋwana-lɔ̂ɔ wala-walai su.”

⁴ È kɛ̀ tí, ŋá wóo da kpɛ́ni mɛ̀ni, é kúla Ɣâla-taa, ǹyɛɛi, “Ka kula naa, ŋánûa, a gɛɛ káfe kɛ̀ a ŋɔsɔnyɔ̂ŋ da kɛ-ƃela. A gɛɛ káfe kɛ̀ a ŋɔmɛni-kpɔlui da sɔlɔ ƃo-ƃela.

⁵ Kpɛ́ni fêi, ŋɔsɔnyɔ̂ŋ-ŋai mɛi kóyâi é seri ŋ̀ele-kɔlɔŋ ma. Ǹyaŋ ŋɔŋwana-lɔ̂ɔ-ŋai maa-mɛni káa Ɣâla kíli ŋá.

⁶ Ka dɛɛ bɔ yɛ̂ɛ berei ǹyaa kpîŋ è dɛ̀ɛ lai, ka véla fé ŋɔtûa-perei mɛni ma gîei feerɛ. Kɔ̂pui è zálei sûmo zui, ka zálei sûmo zu gîei feerɛ m̀ɛni ma.

⁷ Berei è gbîŋ folo-laai maa tɛ̂ la é tûa a ŋwana-lɔ̂ɔ-perei, ka ŋɛ̀i-maa-pêne da wɔ́lɔ tɛ́ɛ bɔ a maa-perei ti. Berei nɔ́ a mò la ǹíi su, nyɛɛ, ‘Ŋ́gaa see ni yɛ̂ɛ kâloŋ-nɛni, pɔɔ-nɛni fa ńyãa, fé wɔ́lɔ pâi wɔ̂lɔi,’

⁸ bere nɔ́ ƃe ŋɔmɛni-kpɔ̂lu-ŋai da pâi pâi la a ɣele tɔ̂nɔ, dia ƃa saa, wɔ́lɔ, da puru. Ǹyaŋ da pâi gérenîi a ŋɔŋ. Kpɛ́ni fêi, wala-wala káa Kúnuu-namu Ɣâla yêei, nyíi a ŋɔmɛnii ŋá tèei.”

⁹ Ǹɔii su-kaloŋ-ŋai, nyíi-ŋai da dîa-ni dí wulu-wulu kɛ̀ da dîa-ni dí ŋwana-lɔ̂ɔ kɛ́i, da pâi wɔ́lɔ̂i m̀ɛi a díwoo su kɛ́tɛ tãi da géreŋ-luru kàa lai.

¹⁰ Da pâi kɛ̂i tɔɔ ni kwaa kôya ma, díkɛ yao ŋɔŋɛ̀i-maa-penêi ma, díyɛɛi, “Malôŋ-mɛni ká! Malôŋ-mɛni ká! Yáai íkaa a Babelɔŋ taa-lee kɛ́tɛi, yáai íkaa a ŋ̀wála-wala taa-leei, Babelɔŋ! Ítɔŋ-kpɛ́-maai a pâ aƃa tɔnɔ yée mu.”

¹¹ Ǹɔii su pɔni-tɔɔ-ƃelai da wɔ́lɔ̂i, díkɛ malôŋ-see ƃo maa-mɛni ma, kpɛ́ni fêi, núu da fé ŋɔ́nɔ dípɔni-sãai yâi.

¹² Zãâi dí kɛ̀ a gôo, káne, kɔni sɔ̃ɔ kpanaŋɔɔ, kɔyɛ̂ŋ mɛni kpanaŋɔɔ, seɣe kole lɛ́lɛɛ, seɣe kpɔ̂lu mu tɛɣiɛ, sêleki-seɣe, da seɣe kpɔ̂lu. Da-ni dí kɛ̀ a wuru kúŋ nɛ̃ɛ-sii támaa-ŋa, sãâ-sii támaa kpɛtɛɛ a séle-ǹyíŋ. Sãâ-sii támaa kpɛtɛɛ a wuru sɔ̃ɔ kpanaŋɔɔ, ƃara, kɔli, da kɔni-koleŋ.

¹³ Da-ni dí kɛ̀ a sinimɔŋ, kiyɛ̂ŋ, kéreŋ-sɛŋ kúŋ nɛ̃ɛ, wúlɔ kúŋ nɛ̃ɛ, wuru-malaŋ kúŋ nɛ̃ɛ, ŋwã̂ai, wúlɔ, felaƃa-fũa da mɔlɔŋ. Da-ni díkɛ ƃò a niŋa da ƃála, soo da kéleŋ, da luɛ-ŋa, zu-kulai ƃa núu-kpune ŋɔmɔ̂leŋ.

¹⁴ “Zɛŋ ímɔ̂leŋ è kɛ̀ ŋ̀wɛ́li kɛ̂i kpɔ́ a ŋánaai, a kúla íyeêi. Ǹyaŋ ísɛŋ lɛ́lɛɛ-ŋai da ílɛlɛ-laai da láŋ íyeêi, ífe ŋɔ́nɔ pâi díkâai!”

¹⁵ Zãâi ŋí kɔlɛ-ƃela, nyíi-ŋai tɔɔ-laa sɔlɔ ƃô Babelɔŋ sârai, da pâi kɛ̂i tɔɔ ni kwaa kôya ma, díkɛ yao ŋɔŋɛ̀i-maa-penêi ma, díkɛ wɔ̂lɔ a díwoo su kɛ̂tɛ, díkɛ maloŋ-see ƃo, díyɛɛi,

¹⁶ “Malôŋ-mɛni ká! Malôŋ-mɛni ká daa-lee kɛ́tɛi mɛni ma nyíi kɛ̀ a maa ɣiriɛ a seɣe kole lɛ́lɛɛ, seɣe kpɔ̂lu mu tɛɣiɛ, da seɣe kpɔ̂lui, maa ɣiriɛ a gôo da kɔni sɔ̃ɔ kpanaŋɔɔ, da kɔyɛ̂ŋ mɛni kpanaŋɔɔi!

¹⁷ Aƃa tɔnɔ yée mu da dɔɔ-sãai ŋí kélee su kara.” Yá-ŋa-keleŋ kélee mɛi-ƃela da diai géleŋ a lî a diai, kéleŋ-kɛ-ƃela, da bɔni-tɔɔ-ƃelai díkaa ǹyúoi ŋái, díkelee dí tɔ̀ɔ kwaa kôya ma.

¹⁸ Dí làɣi a díwoo su kɛ̂tɛ, tãi dí Babelɔŋ-lurii kâa la nyíi kɛ̀ kérenîi, díyɛɛi, “Le-taa-lee ƃe kɛ̀ a gɛ́tɛ yɛ̂ɛ daa-lee kɛ́tɛi ŋí?”

¹⁹ Díkɛɛ wɔ́lɔ̂i a díwoo su kɛ́tɛi, díkɛ malôŋ see ƃoi, dí muluŋ pû díŋûa, dí wɔ́lɔ a díwoo su kɛ̂tɛ, díyɛɛi, “Malôŋ-mɛni ká! Malôŋ mɛni ká daa-lee kɛ́tɛi mɛni ma ƃɛ́i diai kélee yá-ŋa-keleŋ è kɛ̀ díyêei ǹyúoi ŋái dí tɔɔ-laa sɔlɔ ƃô naa ŋɔtɔɔ-sãai sârai! Aƃa tɔnɔ yée mu daa-lee kɛ́tɛi ŋí su a kàra.”

²⁰ Óo Ɣâla-taa, ka m̀aa-lii-nɛ̃ɛ kula. Óo ŋ̀âla-ƃelai, da zia-ƃelai, é pɛ́lɛ Ɣâla ŋɔlóno-kɛ-ƃelai dîa, kpɛ́ni fêi, Ɣâla a tɔŋ-kpɛ́-maa tɛ́ɛ bɔ̂ kámɛni ma!

²¹ Ǹaa pôlu mâ, Ɣâla-taa-kela wala-wala tɔnɔ è kɔni tɔnɔ siɣe, nyíi kɛ̀ yɛ̂ɛ sí-sɛŋ-kao kîiŋ-kɔni kɛ́tɛi, é bili ǹyúoi su, nyɛɛi, “Bere ƃe da pâi Babelɔŋ taa-lee kɛ́tɛi pilîi la a wala-wala, ǹyaŋ dífe pâi ŋɔ́nɔ gaâi.

²² Núu da fé pâi ŋɔ́nɔ kɔnîŋ-ɣale-ƃela, pêle-kɛ-ƃela, ƃɔɔ-fɛɛ-ƃela, da turu-fɛɛ-ƃela wóo mɛnîi naa. Ífe pâi ŋɔ́nɔ yɛrɛ-sii kélee kɛ-nuu kâai ísu. Ífe pâi ŋɔ́nɔ sí-sɛŋ-kao kîiŋ-kɔni-tiŋ mɛnîi ísu.

²³ Laŋpo fé ŋɔ́nɔ pâi sonîi ísu. Nɛnî-kula-surɔ̂ŋ da ǹɛnîi díwoo fé ŋɔ́nɔ pâi tɛ̂i ísu. Kpɛ́ni fêi, ípɔni-tɔɔ-ƃelai ƃe kɛ̀ a ǹɔii su-nuu kpaya-kpayai. Í lɔii-ŋuŋ kélee pɛ́lɛ a íwulu-tuai.

²⁴ Ǹyaŋ daa-lee kɛ́tɛi ŋí su dí Ɣâla ŋɔlóno-kɛ-ƃelai ŋãa kâa naa, da ŋ̀âla-ƃelai, é pɛ́lɛ diai kélee dîa da wɔ́lɔ dípaa ǹɔii sui.”