M̀ɛni-lɛɛi 11 - Bible

Zere féerɛi

¹ Nya ƃe dí sɛŋ-kɔɔŋ-wuru tɛ̀ɛ ḿbɔ gɛ́ɛ yɛ̂ɛ sîa-wuru, díyɛɛ ḿâi, “Ímu síɣe í Ɣâla ŋɔpɛ́rɛ Kɛ́tɛi kɔɔ̂ŋ da Ŋ̀âla-teƃelei da diai da Ɣâla fɛ̀li naai.

² Kɛ́lɛ, ífe góraŋ su-pere kɔ̀ɔŋ nyíi dínaŋɔɔ̂i Ŋ̀âla-pɛrɛ Kɛ́tɛi mai. Ǹaa-pere lɛ̀ɛ tí, kpɛ́ni fêi, naa-pere tɛɛ̂i diai dífe Ɣâla-mɛni wɛ̂li nii dípɔ. Da pâi daa-lee maa waai su táŋ-nîi a ɣáloŋ buu náaŋ kao feerɛ.

³ Ŋa pâi wála-wala tɛɛ̂i ŋásere feerɛi pɔ́ a gɛɛ dí Ɣâla-woo ƃó ɣele-kuu wála tɔnɔ pôlu ŋuŋ feerɛ pôlu buu lɔ́ɔlu mɛi da (1,260) yée mu, dímaa ɣiriɛ a maloŋ tôo-maa sêɣe.”

⁴ Ŋulɔ-wuru féerɛi ká ŋí da laŋpo-see-sɛŋ féerɛi nyíi-ŋai díkaa tɔɔ ni ǹɔii Ŋɔnuu-namui ŋ́ɛi-tuɛi.

⁵ À kɛ̀ núu da à kɛ̀ ŋ̀wɛ̂lii é díŋwâna, ŋɔŋ a kûla díla a gɛ́ɛ é díkpɔara-ƃelai su kara. A kɛ̀ núu da à kɛ̀ ŋ̀wɛ̂lii é díŋwâna, maa-nuui a pâi saa ti-ti ƃôi bere-sii tí su.

⁶ Wála-wala káa díyêei a gɛɛ dí ŋele-kɔlɔŋ lá tɛ́ a gɛɛ tuna fé pu tãi díkaa Díɣâla-wooi ƃôi lai. Wála-wala kɛ́ ƃo díyêei ǹyá-ŋai mɛi a gɛɛ dí dípene a ŋãa, wála-wala kɛ́ ƃo díyêei a gɛɛ dímɛni-kpɔ̂lu-sii kélee láa ǹɔii mâ a tãi kélee nɔ́ da ŋ̀wɛli lai.

⁷ Tãi da kpɛ̀ɛ la a dísêre-faai kɛɛi, zuai nyíi a kûla ǹóai su nyíi gbóŋ koyaŋ fé mai, a pâi kɔ́ pɛlɛ̂i dîa é díyee mɛi ɣále é dípaa.

⁸ Dípoma a pâi kɛ̂i laa ni taa-lee kɛ́tɛi sú nyii da dòli pere-sii da su a Sodɔŋ da Izei, zu-pere-lee kɛ́tɛi ma, ƃɛi dí Dínuu-namui kpàmo naa saa-wuru mai.

⁹ Ɣele-kûu saaƃa da gbura yée mu, sii kélee su-ƃela, nuu-suu kélee su-ƃela, sii-woo kélee ƃo-ƃela, da lɔii-ŋuŋ kélee su-ƃela, da pâi díŋuŋ ma lâai dípoma mâ dífa fâa a gɛɛ dí díloo ƃolôŋ su.

¹⁰ Diai kɛ̀ ǹɔii sui, dílii a pâi nɛ̃ɛ̂i dí pêle kɛ́ dí sama-sɛŋ tɛ̀ɛ díkîe-ni pɔ́, kpɛ́ni fêi, diai kɛ̀ ǹɔii sui, Ɣâla ŋɔlóno-kɛ-ƃela féerɛi ŋí maa-mɛni è kɛ̀ dîa a lii-sɛlɛŋ kɛ́tɛ.

¹¹ Kɛ́lɛ, ŋ̀ele-kûu saaƃa da gbûrai tɛ̂ɛ pôlu mà fúlu-laa-lɛwo è kûla Ɣâla yêei e lɔ díkponôi dí dímu sìɣe dítɔɔ díkɔɔ ŋá. Diai díkàai, díyao kpɔ́ a ŋánaa.

¹² Nya ƃe wóo su kɛ́tɛ è kùla Ɣâla-taa é pá dípɔ, nyɛɛ diai, “Ka tɛ́ ƃɛ́!” Nya ƃe dí tɛ̀ Ɣâla-taa ɣele-kɔlɔŋ kole su díkpɔara-ƃelai ŋ́ɛi.

¹³ Maa-aƃai tí ǹɔii è kpɛ̃liŋ kpɔ́ a gɛ́tɛ, daa-leei kwaa kuro ma é pú zu. Núu wála lɔ́ɔlu mɛi feerɛ (7,000) dí sàa ǹɔii kpɛ̃liŋɔɔi ŋí su. Ǹúu gbeli-ŋai dí yao kpɔ́ a ŋánaa dí Ŋ̀âla-taa-Ɣalai ŋɔfólo-laai maa tɛ́.

¹⁴ Gbaloi veerɛi a tɛɛ. Gbaloi zaaƃai káa pâi a maa félaa.

Dúrii mɛi feerɛ-ɣelei

¹⁵ È nâa kɛ̀ tí, Ŋ̀âla-taa kelai mɛi feerɛ-ɣelei è ŋɔturii fɛ̀ɛ, wóo su kɛ́tɛ támaa díkula Ɣâla-taa díyɛɛi, “Ǹɔii su-kaloŋ laai a kɛ́ a Kúnuu-namui ŋɔkâloŋ laai da Ŋɔkôrai, ǹyaŋ a pâi kɛ̂i m̀ɛi wɔlɔ-wɔlɔ da wɔlɔ-wɔlɔ.”

¹⁶ Nuu-pɔlɔ buu feerɛ kao náaŋ kɛ̀ see ni dísee-sɛŋ-ŋai ŋá Ɣâla ŋ́ɛi-tuɛi, dí díŋuŋ pîlaŋ ǹɔii ma dí vɛ̀li,

¹⁷ díyɛɛ, “Kwa sɛɣɛi-féi tɛɛ ípɔ, Kúnuu-namui, Ŋwála-wala kélee-Ɣalai, yai íkaa naai da yai kɛ̀ naai. Ya íwala-wala kɛ́tɛi síɣe, ya ŋɔ́nɔ íkɛ-mɛi-laai kɔ́ɔ pîlaŋ.

¹⁸ Diai dífe Ɣâla-mɛni wɛ̂li nii dílii è ŋwàna kpɔ́ a ŋánaa, kɛ́lɛ, ílii-ŋwanai è pà, a da zaa-ƃelai dímɛni-ŋa-tee-tãi. Íyee-mu-ƃelai fela fé tãi a seri, diai díkaa a ílono-kɛ-ƃelai, da Ŋ̀âla-ƃelai da diai da yao ílaâi mai, nia-pɛlɛɛ kpaa máŋ núu kpaya-kpaya, Diai ǹɔii su karai, dísu kara tãi a seri.”

¹⁹ Ɣâla ŋɔpɛ́rɛ Kɛtɛi nyíi gáa Ɣâla-taai ǹá è ƃò, ǹyaŋ dí Gbanaŋ-wooi Maa-gãlai kàa naa. Ŋ̀ele-gbana ŋɔmãla-mãla, wóo su kɛ́tɛ-ŋa, ŋ̀ele-gbana-tíŋ, lɔii-kpɛ̃liŋɔɔ, da são kɛ́tɛ díkɛ̀ naa.