M̀ɛni-lɛɛi 10 - Bible

Ŋ̀âla-taa-kelai da gɔlɔ-loŋ

¹ È kɛ̀ tí, ŋá Ɣâla-taa-kela kɛ́tɛ da kpɛni kàa gɛ̀ kùla Ɣâla-taa gɛ̀ ƃò ɣele-kɔlɔŋ kole su, gbeimɛlɛ kɛ́ ƃo ŋuŋ mɛi, ŋ̀ɛi kɛ́ɛ yɛ̂ɛ voloi, gɔ́ɔ kɛ́ ƃo yɛ̂ɛ wúru kpala kôya ƃe ŋɔŋ káa ma.

² Kɔlɔ-loŋ è kɛ̀ ǹyêei ǹá ƃoɔ. È ǹáa-mii-yee mɛi-kɔɔi pîlaŋ ǹyúoi ŋá, è gɔɔ-yee mɛi-kɔɔi pîlaŋ zîŋ ŋá,

³ é tóli ƃò a ŋ̀óo su kɛ́tɛ yɛ̂ɛ yala-sulu ƃe kpéɣêi. Dólii ƃoɔ mìi, ŋele-gbana lɔ́ɔlu mɛi feerɛ tíŋ è tɛ̀.

⁴ Tãi ŋele-gbana lɔ́ɔlu mɛi féerɛi tíŋ è tɛ̀ lai, ŋá kɛ̀ pâi kɔlɔ pɔ̃yɛ̂i, kɛ́lɛ, ŋá wóo mɛ̀ni é kúla Ɣâla-taa, nyɛɛi, “Mɛnii ŋele-gbana lɔ́ɔlu mɛi féerɛi dí mòi, é kɛ́ íkôi ífe bɔ̃̀yɛ.”

⁵ Ǹyaŋ Ŋ̀âla-taa-kelai ŋá gàa tɔɔ ni ǹyúoi ŋá da zîŋ ŋái, è ǹáa-mii-yee mu siɣe é dɛ́ Ɣâla-taa.

⁶ È vòo ǹúui ma gáa nɔ naa wɔlɔ-wɔlɔ da wɔlɔ-wɔlɔi, nyíi Ɣâla-taa kpɛ̀tɛ da zu-sɛŋ kélee, nyíi ǹɔii kpɛ̀tɛ da zu-sɛŋ kélee, da nyíi ǹyúoi kpɛ̀tɛ da zu-sɛŋ kélee, a gɛɛ maa-tinaŋ fé ŋɔ́nɔ kɛ́ naa.

⁷ Kɛ́lɛ, a gɛɛ, tãi Ŋ̀âla-taa-kelai mɛi feerɛ-ɣelei à ŋɔturii fɛ̀ɛ lai, Ɣâla a pâi gɛ̂i ŋɔloo-mɛnii ŋa-see é kɛ́ yɛ̂ɛ berei è Duŋ Lɛ́lɛɛi maa-mɛni ƃo la ǹyée-mu-ƃelai dîa, nyíi-ŋai díkaa a ŋɔlóno-kɛ-ƃelai.

⁸ Ǹya ƃe, ŋ̀óoi ŋá mɛ̀ni é kúla Ɣâla-taai, è lòno ŋɔnɔ ḿbɔ, nyɛɛi, “Li í gɔlɔi siɣe nyíi gáa Ŋ̀âla-taa-kelai yée ŋá ǹá ƃoɔi, nyíi gáa tɔɔ ni ǹyúoi ŋá da zîŋ ŋái.”

⁹ Nya ƃe ŋá lì Ŋ̀âla-taa-kelai pɔ ŋá m̀ó mà a gɛɛ é gɔlɔ-loŋ tɛ́ɛ ḿbɔ. Ǹya ƃe è mò mâ, nyɛɛi, “Ziɣe í mii. A pâi kɛ̂i a ŋ̀wánaa íkôi mɛni ma. Kɛ́lɛ, a pâi kɛ̂i a nɛ̃ɛ íla yɛ̂ɛ kwɛ̃ŋ-wulɔ.”

¹⁰ Nya ƃe ŋá gɔlɔ-loŋ sôŋ Ŋ̀âla-taa-kelai yêei ŋa m̀ii. È kɛ̀ a nɛ̃ɛ ńa yɛ̂ɛ kwɛ̃ŋ-wulɔ. Kɛ́lɛ, tãi ŋá nâa mìi lai, è kɛ̀ a ŋ̀wánaa ŋ́goi.

¹¹ Dí mò mâ, díyɛɛi, “Fɛ̂ɛ í Ɣâla ŋɔwóoi ƃo é pîlaŋ nuu-sii támaa ma, lɔii-ŋuŋ támaa, sii-woo támaa, da kâloŋ támaa dîa.”