Malasi 3 - Bible

¹ Ŋ̀wála-wâla kélee Yâwɛɛ a môi ǹyɛɛi, “Ŋa pâi ŋáworɛ̂-woo ƃó-nuui tɛɛ̂i a gɛɛ é ŋáperei su kpɛtɛ. À kɛ̀ tí, Ŋ̀âlai ka gɔ̂rii a pâi pâi Ŋɔpɛ́rɛi Kɛ́tɛi mu a maa félaa. Gɛ̀ ní ŋ̀orɛ̂-woo ƃó-nuui ka wɔ́lɔ berei kâai, a pâi pâi é ŋáworɛ̂-wooi ƃó kâa.”

² Kɛ́lɛ ŋ̀elei a pà lai, gbɛ̂ɛ ƃa pɔ̂ri tɔɔ̂i dúɛi? Tãi à pà lai, gbɛ́ɛ ƃé pâi ƃâloi? A pâi kɛ̂i yɛ̂ɛ seɣe-waa-kpolo ŋá liɛɛ, yɛ̂ɛ ŋɔŋ nyii a kpɛ̃́ɛ sèɣeŋ kɔli mai.

³ A pâi é mɛni ŋá tée yɛ̂ɛ kɔli ɣale-nûu a kpɛ̃́ɛ kùla káne ma. Yɛ̂ɛ berei kɔli-ɣale-nûu a kpɛ̃́ɛ kùla la káne ma da gôoi, berei nɔ́ ƃé Yâwɛɛ ŋɔworɛ̂-woo ƃó-nuui a pâi zâla láa-soŋ-ƃelai maa wâai la é lɛ́ɛ la zu dí pá a sama-sɛ̂ŋ lɛ́lɛɛ Yâwɛɛ pɔ́.

⁴ À kɛ̀ tí, zama-sã̂ai Zuda lɔii su-ƃelai da Zerusâlɛŋ-ƃelai da pâi lai, a pâi Yâwɛɛ líi lâai yɛ̂ɛ berei da kâa ǹíi laa la a bɔlɔi.

⁵ Ŋ̀wála-wâla kélee Yâwɛɛ a môi ǹyɛɛi, “Ŋa pâi pâi kápɔ ŋá kámɛnii ŋáa tée, ŋá sêre-faa kɛ́ ŋɔ́nɔ é pîlaŋ bóniŋ kɛ́-ƃelai dîa da ŋ̀ulu-wulu kɛ́-ƃelai, ǹɛ́ɛ-sere-faa kɛ́-ƃelai, da diai da díi-kɛ́-ƃelai dífela-fei mîi a wôya perei, diai da díŋɛi nàɣiŋ bɔɔ-nɛyãai mɛi, dee-lônii, ǹɔii da kpɛ́ni su-ƃelai, é pɛ́lɛ diai dîa dífa ƃaa-kɛ́-maa tɛ̀ɛ ḿbɔi.

Núu-kɔ̃̂liŋ-buu tɛɛ-mɛ̂ni Ɣâla pɔ́

⁶ “Ńyãa ƃa Yâwɛɛ, fá ḿaa fâleŋ. M̀ɛni ma káai a Zeeka Ŋɔkaayɔɔ-ŋai, káŋuŋ la fé niî kpɛɛ ní a pilíɛɛ.

⁷ Kámaa mɛ̂ni kɛ̂ɛi nɔ́ yɛ̂ɛ kánuu-pɔ̂lɔ-ŋai, ka kápôlu tɔɔ ŋátɔ̂ŋ-ŋai dîa káfe niî dímɛi káa ní. Ka tínaŋ ḿbɔ-naa pêre ńyaŋ ŋa pâi tínanîi kápɔ-naa pêre. Kɛ́lɛ ka môi kâa, ‘Kwa pâi tínaŋ-pere kɛ̂i léŋ ípɔ-naa pêre?’

⁸ Ŋa mare-kɛ̂ɛ kɛ̂i, gáa a mɛni lɛ́lɛɛ a gɛɛ núu é Ɣâla fili? Tɔ̃yâ ma, kpáo, kɛ́lɛ kákaa ŋɔ́ ḿvilîi. Ka ḿare-kɛ̂ɛ kɛ̂i kâa, ‘Kwa ífilîi léŋ?’ Ka ḿvilîi kâkɔ̃liŋ buu-ɣelei tɛɛ mɛ̂ni su da zama-sã̂ai tɛ́ɛ mɛni ma ḿbɔ.

⁹ Fóo-wôo káa kákelee kâa, kpɛ́ni fêi, káai a ǹɔii-ƃelai kélee ka ḿvilîi.

¹⁰ Ka pá a kákɔ̃liŋ buu-ɣêlei kélee Ŋ̀âla-pɛrɛi Kɛ́tɛi mu, gɛ̀ ní mii-sɛ̂ŋ támaa a pâi kɛ̂i naa. Ka ńzu kɔ̂ɔŋ, ǹyaŋ ka pâi gâai, ŋa pâi Ɣâla-taa wôna-ŋai láa ƃôi ŋá sɛŋ lɛ́lɛɛ sii támaa tɛ́ɛ kápɔ.

¹¹ Fé pâi ŋɔ́nɔ gotó-ŋai lɛɛ̂i naa díka-sí-seŋ-ŋai kara, ǹyaŋ kákpɔmɔ-ƃa kpɔlɔ-ŋai da pâi ƃâi a dámaa.

¹² À kɛ̀ tí gɛ̀ ní ǹɔii-ŋûŋ-ŋai kélee da pâi kátôlii a lii-nɛ̃̂ɛ-ƃela.”

Ɣâla ŋɔmalôŋ-kâa kono-teei

¹³ Yâwɛɛ ǹyɛɛ, “Ka mɛni nyɔ́mɔɔ támaa ƃó a ńaa. Kɛ́lɛ ká marê-kɛ̂ɛ kɛ̀ kâa, ‘Lé ƃé kú mò é pîlaŋ yâŋ?’

¹⁴ Ka mò kâa, ‘Núu à tíi kɛ̀ Ɣâla mì gáa nɔ́ kpɛ́ni-kpɛni. Lé ƃé kwa zɔlɔ ƃô zu à kɛ̀ a mɛni ƃô kú kɛ̀ gɛ, kpaa máŋ kú kɔ́ kú ǹɛ́ Ŋ̀wâla-wala kélee Yâwɛɛ ma a gɛɛ kúmalôŋɔɔi mɛnii gwa gɛ́ lai mɛni ma?

¹⁵ Kwa ǹyoŋka-ƃelai sîɣe a Ɣâla ƃɔƃɛlɛ sêe sɔlɔ ƃó-ƃela. Sɔnyɔ̂ŋ-ƃela dífa mɛni lɛ́lɛɛ sɔlɔ ƃô nɔ́, kɛ́lɛ da Ɣâla ŋɔlii kpêlei su-kɔɔŋ a díŋwana-lɔ̂ɔ tua-kɛ́ɛi, da kɛ́ gàa a gɛɛ mɛni da fé pâi kulâi zu.’ ”

¹⁶ Diai yào Yâwɛɛ mai, dí lòno díkîe-ni pɔ́. Yâwɛɛ è ŋ̀óli tɔ̀ɔ é díwoo mɛ́ni, ǹyaŋ diai yào Yâwɛɛ ma dí ƃaa-kɛ́-maa tɛ́ɛ bɔ́i, dí kili-too-ŋa-kɔlɔ pɔ̃̀yɛ a dílaa.

¹⁷ Ŋ̀wála-wâla kélee Yâwɛɛ a môi ǹyɛɛi, “Da pâi kɛ̂i a ḿbɔɔ kpîŋ-kpiŋ, ŋ̀ele-kûui ŋa pâi pâi lai. Ŋa pâi dímalôŋ kâa yɛ̂ɛ berei ǹaŋ-nuui a ǹóŋ malôŋ kàa la nyii a tíi kɛ̀ mìi.

¹⁸ Ŋánûai da pâi ŋɔ́nɔ mɛni sîi feerɛ loai kɔ́lɔnîi, zɔnyɔ̂ŋ-ƃelai da zɔŋ lɛ̂lɛɛ-ƃelai, ǹúui va ŋ́oo mɛnii da ǹúui a ŋ́oo mɛnii.”