Malasi 2 - Bible

¹ Ŋ̀wála-wâla kélee Yâwɛɛ a môi zâla-laa soŋ-ƃelai dîa ǹyɛɛi, “M̀ɛni ŋí káa kámɛni ma:

² Fɛɛ ká ƃaa-kɛ-maa tɛ́ɛ ḿbɔ kátûa-pere su. Kà wàla káwoli tɔ́ɔ m̀ɛnii ma ŋá môi, gɛ̀ ní ŋa pâi káfôoi. Ŋa pâi kásɔlɔ ƃo-sãai kélee fôoi. Tɔ̃yâ ma ŋa nâa kásãai fóo, kpɛ́ni fêi, káfe ŋ́oo síɣe ní a gbanaŋɔɔ.

³ Ŋa pâi kálônii kula-maa kɛ̂i ŋá zua-ŋai kpó sía káŋɛi ka díkula ḿâ a sâlai. Ŋa pâi kákulâi ŋɛ́i.

⁴ À kɛ̀ tí ka pâi gɔ́lɔnîi a gɛɛ ŋá m̀ɛnii ŋí ƃò kâa a gɛɛ m̀ɛnii ŋá gbɛ̀tɛ zâla láa soŋ-ƃelai yêei da Livai ŋɔkaayɔɔ-ŋai vé pâi karâi.

⁵ “Ŋámɛini-kpɛtɛɛi su, ŋá ŋ́gono tèe díyêei a gɛɛ ŋa pâi fúlu-laa tɛɛ̂i dípɔ da lii-sêe ǹyaŋ nyíŋi ƃé ŋá dɛ̀ɛ dípɔ a gɛɛ dí ƃaa-kɛ́-maa tɛ́ɛ ḿbɔ. Maa ɣêle-ŋai tí su dí ƃaa-kɛ́-maa tɛ̀ɛ ḿbɔ, dí yao ḿâ.

⁶ Dí tɔ̃yâ-sɛŋ lɛ̀, dífe sɛŋ nyɔ́mɔɔ lɛ́ ní. Dí dífulu-laai kɛ̀ a ńîa-pere. Dífe tɔ̃yâ-mɛni kɛ́ ní nɔ́ díkpîŋ mɛni ma, kɛ́lɛ dí kpɔŋ-mâa tɛ̀ɛ núu támaa pɔ́ a gɛɛ dífe mɛni nyɔ́mɔɔ kɛ̀.

⁷ Gáa a zâla-láa soŋ-ƃelai dítii a gɛɛ dí tɔ̃yâ-mɛni lɛ́ é pîlaŋ Ɣâla ma. Ǹɛ̂lɛɛi ǹûa dí lí dípɔ a gɛɛ dí mɛni maa kɔ́ri é pîlaŋ ńîa-mɛnii ma kpɛ́ni fêi, dia ƃé díkaa a Ŋ̀wála-wâla kélee Ɣalai ŋɔkéla-ŋa.

⁸ “Kɛ́lɛ káai a zâla láa soŋ-ƃelai ká siɣe bere sã́ai ma. Kásɛŋ-lɛ́ɛi a núu támaa kɛ́ da sɔnyɔ̂ŋ kɛ́. Ka m̀ɛnii kara ŋá gbɛ̀tɛ kámɛni mai.

⁹ M̀ɛni ma ńyãa máŋ ŋa pâi Eezuɛ-ƃelai kɛ̂i dí kákpɔara kpɛ́ni fêi, káfa ŋ́oo mɛni. Ǹyaŋ tãa ká sɛŋ lɛ̂ la ŋánûai dîai, káfa dísòŋ a bɔriɛɛ.”

Ǹûai dífe a tɔ̃yâ-ƃela Ɣâla mɛni ma

¹⁰ Kúkelee kúnâŋ fé tɔnɔɔ? Ŋ̀âla tɔnɔi fé kúkpɛtɛ ní? Gɛ̀ ní lé ŋaŋ ƃé kúfe kúkono-tee-ŋai ŋaa-see kɛ̂i la kúkîe ni yêei? Lé mɛni ƃé kúkaa gono-tee-ŋai kpɔarâi la Ɣâla è gbɛ̀tɛ kúnuu-pɔ̂lɔ-ŋai yêei?

¹¹ Zuda-ƃelai da díkono-têei kara Ɣâla yêei, ǹyaŋ da mɛni nyɔ́mɔɔ kpɛɛ pôlu kɛ́ Zerusâlɛŋ da Zuda lɔii gwaa kélee. Da Yâwɛɛ Ŋɔpɛ́rɛi kara nyii è ŋ̀wɛlini. Zinâai dí nɛnî-ŋa kùla diai Ɣâla ŋɔkpɛtɛ-sâai sîɣe a díɣâlai.

¹² Tɔ́ɔ Yâwɛɛ é ǹûa-ŋai tí kúla Eezuɛ-ŋai sáma diai da m̀ɛni-ŋai tí kɛi. Vé ŋɔ́nɔ nɛ̀ɛ nàa a gɛɛ dí pá a sama-sɛ̂ŋ da nyii kúnûai da pâ la Ŋ̀wála-wâla kélee Yâwɛɛ pɔi.

¹³ M̀ɛnii dɔnɔ ká ŋí ka gɛ̂i. Ka Yâwɛɛ ŋɔtêƃelai yɔ́ɔ a káŋɛi-ya kákɛ wɔ̀lɔ, kpɛ́ni fêi, Ɣâla fé ŋɔ́nɔ ǹyée seêi kásama-sãai mu ka pâ la bɔ́i.

¹⁴ Ká kɛ́ marê kɛ̀ a gɛɛ lé ƃé vé ŋɔ́nɔ ǹyée seêi la kúsama-sɛ̂ŋ-ŋai mui? Gáa tí, kpɛ́ni fêi, Yâwɛɛ è gɔ̀lɔŋ ƃa íkono-têei kara ínɛnîi yêei í gùla a ínaɣa-tãi. È kɛ̀ a ísia-gîe-pôlu-nuu, kɛ́lɛ ƃa íkono-têei kara ǹyêei, berei máŋ í íkono tèe la Ɣâla ŋɛ́i a gɛɛ ƃa pâi kɛ̂i a tɔ̃yâ-nuu m̀ɛni mai.

¹⁵ Ɣâla fé kákɛ ní a kpono tɔ̂nɔ mɔ̂leŋ sârai? È nyíŋi kɛ̀ lé mɛni ma? È nyíŋi kɛ̀ a gɛɛ ká nîa-pɛlɛɛ sɔlɔ ƃó dí kɛ́ a Ɣâla ŋɔnûa. M̀ɛni ma ka ká-kpîŋ mɛi káa a gɛɛ ká ta fé ŋɔkono-têei kara ŋɔnɛnîi yêei.

¹⁶ Yâwɛɛ Eezuɛ Ŋɔɣâlai è mò ǹyɛɛ, “Fé táa-laa wɛ́li ní. Fé wɛ́li ní a gɛɛ ká ta é ŋwana-lɔɔ tua kɛ́ɛ tí kɛ́ a ŋɔnɛnîi. Núu fa ŋɔkono-têei kara ŋɔnɛnîi yêei a gɛɛ a pâi kɛ̂i a tɔ̃yâ-nuu mɛni ma.”

M̀ɛni-ŋáa-tee ɣelei a lɛɣɛ

¹⁷ Yâwɛɛ fíi kpɛɛ̂i a kálono woo. Kɛ́lɛ ka mò kâa, “Kwa víi-kpɛɛ-pêre kɛ̀ léŋ?” Ká mò kâa, “Yâwɛɛ a sɔnyɔ̂ŋ-ƃela kélee sìɣe a núu lɛ́lɛɛ. Tɔ̃yâ ma è díwɛli ní.” Kpaa máŋ kákɛ mò kâa, “Ŋ̀âlai kɔɔ nyii gáa a dɔ̃yâ Ɣalai?”