Mąątɛ̨nɛ̨ 92 - Bible

Ŋ̀ule too-nuui è Ɣâla láa maa tɛ̀

Vii-tɔɔ-ɣelei maa wulei

¹ Ǹɛ̂lɛɛi a gɛɛ kú sɛɣɛ-fei tɛɛ Yâwɛɛ pɔ́. Ǹɛ̂lɛɛi kú ƃaa kɛ́ maa wule too Ŋ̀âla Kɛ́tɛi ma,

² kú ŋɔwɔ́lɔ-wɔlɔ wɛli kɛ́-maai maa mɛ̂ni too a wule a ɣele wâla kélee, kú ŋɔtɔ̃yâ-laai maa mɛ̂ni too a wule a kpíni kélee.

³ Kwa kɛ̀ ŋ̀ule-ŋai ŋí toôi m̀a, kú kɛ́ ƃɔɔ fɛ̂ɛi, kúkɛ kɔnîŋ ɣàle.

⁴ Óo Yâwɛɛ, íkɛ mɛni kpaya-kpayai maa mɛ̂ni a ńii láa. M̀ɛni ma, ŋa pâi wule toôi a lii-nɛ̃ɛ pere m̀ɛnii ƃa gɛ́i m̀ɛni ma.

⁵ Óo Yâwɛɛ, íkɛ mɛni-ŋai kpaya-kpayai. Íkili-ŋa sîai su siŋɔɔ, núu fa târe zu.

⁶ Ǹúui va mɛni ŋá kàa mai, vá gɔ̀lɔŋ é táre zu.

⁷ Berei máŋ ŋ̀wana-lɔ̂ɔ-ƃelai ƃɔɔlɔ̂i la yɛ̂ɛ kala, m̀ɛni nyɔ́mɔɔ kɛ́-ƃelai kɛ́ mɛni-ŋai ŋ̀aa see kɛ́ kɛ̀ díyêei a ǹɛ́lɛɛi, dísu a pâi karâi wɔ́lɔ-wɔlɔ da wɔlɔ-wɔlɔ,

⁸ kpɛ́ni fêi, yá óo Yâwɛɛ, íwala-walai tɛɛ̂i sɛŋ kélee ma wɔ́lɔ-wɔlɔ da wɔlɔ-wɔlɔ.

⁹ Kú gɔ́lɔŋ íkpɔara-ƃelai da pâi saâi, ŋ̀wana-lɔ̂ɔ-ƃelai kélee dí táa-taa.

¹⁰ Ya ŋ́gɛ ŋ́gbonôi a kpanaŋ yɛ̂ɛ nina sirɛ, ya lii sêe tɛɛ ḿbɔ.

¹¹ Ŋ́ɛi a ŋ́gbɔara-ƃelai su karâi káa, ŋ́gɛ ŋ̀wana-lɔ̂ɔ-ƃelai wɔ́lɔ-woo mɛ̀ni.

¹² Dɔ̃yâ-ƃelai da ƃûu ƃò yɛ̂ɛ tóu wuru, díkɛ ƃɔ̀lɔ a ǹɛ́lɛɛ yɛ̂ɛ sîda wuru-ŋai díkaa Lɛƃanɔŋ.

¹³ Dísiɛ̂ɛi Yâwɛɛ ŋɔpɛ́rɛi mu. Dísame a pâi lɔ̂i Ɣâla Ŋɔpɛ́rɛi Kɛ́tɛi mu díƃûu ƃó.

¹⁴ A nɛ̃ɛ ma dípɔlɔ, da pâi kɛ̂i nɔ́ ƃâi, dílaa kɛ́ ƃò a ŋ̀únu, díkponôi kpanaŋɔɔ a ɣele kélee.

¹⁵ Nyíŋi a pâi ǹɛ̂i a gɛɛ Yâwɛɛ káa a tɔ̃yâ Ɣala, ǹyaa ƃa ḿɛi káa kɔnii nyii mɛni nyɔ́mɔɔ da fé gbonôi.