Mąątɛ̨nɛ̨ 91 - Bible

Ɣâla ƃa kúmaa kɔ̃̂ɔ

¹ Ǹúui pâi kɛ̂i Yâwɛɛ ŋɔwála-wala-laai mui, a pâi víi tɔɔ̂i Ŋ̀wála-wâla kélee Ɣalai ninîŋ mu.

² A pâi môi Yâwɛɛ ma ǹyɛɛi, “Yá ƃa ḿaa kɔ̃̂ɔ íkɛ ḿɛi kâa. Ya ƃa Ŋáɣâlai nyii ŋ́gili tɔɔ̂i mai.”

³ A pâi ímaa kɔ̃ɔ̂i ífa tôo ƃáre ŋá, kɔlɔ-fela nyɔ́mɔɔ kélee da fa ísòŋ.

⁴ A pâi ímɛi pɛlɛ̂i a goôŋ yɛ̂ɛ ŋɔni a goôŋ pɛ̀lɛ ǹônii mɛi. Ƃa pâi maa kɔ̃ɔ-laa sɔlɔ ƃôi goôŋ mu. Ɣâla ŋɔtɔ̃yâ-laai a pâi kú maa kɔ̃ɔ̂i yɛ̂ɛ kɔ-kuluƃa ŋɔkpála ŋáɣale kɔli-kalaŋ.

⁵ Ífe pâi yaôi m̀ɛni nyɔ́mɔɔ-ŋai dîa da kɛ̂ a núu a kpínii, kpaa máŋ íkpɔara-nuu da é kɔ́ pɛ́lɛ yâ a ɣele ƃɔ́ɔ.

⁶ Ífe pâi yaôi gɔlɔ-fela-ŋai dîa da núu sòŋ a kpínii, kpaa máŋ m̀ɛni kpɔ̂lu-ŋai da lâa nûa dîa fólo kpɔ̂lu ŋái.

⁷ Da pâi núu wála tɔnɔ (1,000) paâi íkɔlɛ ma, dí núu wála puu (10,000) páa ílaa mii yee mɛi pere, kɛ́lɛ sɛŋ da fé pâi kɛ̂i a yá.

⁸ Ya pâi íŋɛi lâai, í gáa berei ŋ̀wana-lɔ̂ɔ-ƃelai da dísɔnyɔ̂ŋ-ŋai gula maa sɔlɔ ƃôi lai.

⁹ A pâi kɛ̂i tí, kpɛ́ni fêi, ya Yâwɛɛ siɣe a ímaa kɔ̃ɔ Ɣala, ya íyee sée Ŋ̀âla Kɛ́tɛi mu a ímaa kɔ̃ɔ Ɣâla.

¹⁰ Mɛni nyɔ́mɔɔ kélee dafé pâi lâai yâ, núu nyɔ́mɔɔ kélee da fa lɛ̂ɣɛ ípɛrɛi kɔlɛ.

¹¹ A pâi ŋɔkéla-ŋai tɛɛ̂i dí ímaa kpɛ́ pere sîi kélee su.

¹² Da pâi ítɛ̂i ɣelêi ífa íkɔɔ tùa kɔni da ma.

¹³ Ya pâi ƃɔ́rɔnîi yala-sulu da kali nyɔ́mɔɔ-ŋa dîa. Ya pâi ƃɔ́rɔnîi yala-sulu lonii da wurûŋ-ŋa dîa, dífe pâi mɛni da kɛ̂i a yá.

¹⁴ Ɣâla è mò ǹyɛɛi, “Diai ŋ́wɛlinii, ŋa pâi díŋuŋ maa ƃôi. Diai ŋ́gɔlɔŋ, ŋa pâi dí maa kɔ̃ɔ̂i.

¹⁵ Da ńdòli, ŋa pâi díwoo su toôi. Ŋa pâi kɛ̂i díkɔlɛ dímɛni kpɔ̂lui kélee su. Ŋa pâi díŋuŋ ma ƃôi ŋá ƃaa kɛ́-maa tɛ́ɛ dípɔ.

¹⁶ Ŋa pâi gɛ̂i dífulu-laai su é kôya. Ŋa pâi díŋuŋ maa ƃôi.”