Mąątɛ̨nɛ̨ 90 - Bible

Gɔlɔ-kpuai ǹáaŋ (90:1--106:48) Ɣâla fɛliɛɛ a gɛɛ é núu-kpune malôŋ káa kpɛ́ni-fei núu-kpune fíi kpɛɛ̂i

Ɣâla ŋɔtíi kɛ́-nuui Mose ŋɔɣâla fɛli-wooi

¹ Óo Ǹuu-namui, yá nɔ́ ƃé kúkili tɔɔ̂i yâ wɔ́lɔ-wɔlɔ da wɔ́lɔ-wɔlɔ.

² Í lɛ́ɛ pâi ǹyée kpaya-kpayai kpɛtɛ̂i, kpaa máŋ ǹɔii da ŋ̀éniɛi, íkaa nɔ́ a Ɣâla wɔ́lɔ-wɔlɔ da wɔ́lɔ-wɔlɔ. Yá nɔ́ ƃa Ŋ̀ɔlɔ-wɔlɔ da wɔ́lɔ-wɔlɔ Ɣalai.

³ Ya gɛ̀ núu-kpune é lí pôlu bɔ̂rɔi pɔ́, yɛ̂ mai, “Óo núu-kpune, lí pôlu bɔ̂rɔi pɔ́!”

⁴ Kóraŋ wála támaa káa nɔ́ íŋɛi kpɛ́ni-kpɛni. Díkaa nɔ́ yɛ̂ɛ wɛ́ɛ ɣele kuui nyii a gbâa tɛɛi, kpaa máŋ yɛ̂ɛ kpíni kûu tɔnɔ nyii zu fé kôya níi.

⁵ Yá núu ŋɔfúlu-laai kùla ǹyêei yɛ̂ɛ nya ƃé vé kɛ́ ní ɣele ma. Kúfulu-laai su kpuaâi nɔ́ yɛ̂ɛ see-woo. Kúkaa nɔ́ yɛ̂ɛ kala nyii a pɔ̂muŋ a ɣele-wala,

⁶ é ƃɔlɔ, é poai, kɛ́lɛ ɣele wûlii à kɛ̀, boa é pú é sáa.

⁷ Ílii ŋwânai a kú su kàra, a yao támaa pú kúkponôi.

⁸ Í kú lòo sɔnyɔ̂ŋ-ŋai kélee kɔ́lɔŋ. Da fa lôo yâ.

⁹ Ílii ŋwânai a kúfulu-laai su kpua. Kúkɛ̀ ɣéniɛi ŋɔkôya káa nɔ́ yɛ̂ɛ núu a ǹɛ̂wo tòo.

¹⁰ Núu-kpune ŋɔkɛ-ɣeniɛi káa nɔ́ a kóraŋ buu lɔ́ɔlu mɛi feerɛ. Ǹúui gbonôi kpanaŋɔɔ̂i a pɔ̂ri kɛ̂i ɣele ma a kóraŋ buu lɔ́ɔlu mɛi saaƃa. Kɛ́lɛ maa kɛ́ naai káa nɔ́ a mɛni kpɔ̂lu támaa da mɛni sôli ŋánaa m̀aa-nuui ma. Ǹaa à kɛ̀ tí, kwa liî saa táa a maa félaa.

¹¹ Gbɛ̂ɛ ƃé ílii ŋwânai ŋɔwála-wala-laai kɔ́lɔŋ? Ílii ŋwâna su kɛ́tɛi a pâ a yao ŋánaa nuu kponôi.

¹² Ǹɛ́ kûa berei kú kɛ̀ ɣéniɛi kpuâi lai, a gɛɛ kú berei kɔ́lɔŋ kwa pɔ̂ri kú ɣéniɛi kɛ̂i la a táre perei.

¹³ Óo Yâwɛɛ, kúmalôŋ káa kúai a ítii kɛ́-ƃelai. Ya pâi kɛ̂i a ílii ŋwánaa kûa a tãi ɣɛɛlu?

¹⁴ Gɛ́ kúlii láa é fɛ́ɛ a íwɔlɔ-wɔlɔ wɛli kɛ́-maai a ɣele wâla kélee, kúlii é nɛ̃ɛ, kúkɛ wule tôo, kúkɛ koi-nɛ̃ɛ kùla é lɛ́ɛ la zu kúkɛ̀ ɣéniɛi é kpɛ́ɛ.

¹⁵ Lii-see tɛ̀ɛ kúpɔ yɛ̂ɛ berei kú mɔ̃lɛ lai. Lii-nɛ̃ɛ koraŋ támaa tɛ́ɛ kúpɔ yɛ̂ɛ berei kú mɛni sôli kàa lai.

¹⁶ Ǹɛɛ naa kúai a ítii kɛ́-ƃelai kú ítii kpaya-kpayai káa, kúnîa-pɛlɛɛi dí ífolo-laa kɛ́tɛi káa.

¹⁷ Ǹuu-namui Ɣâla, lûwa láa kûa. Gɛ́ m̀ɛni-ŋai kwa kúyee pìli zui, ŋ̀aa-see é kɛ́ a ǹɛ́lɛɛ.