Mąątɛ̨nɛ̨ 79 - Bible

Ɣâla fɛliɛɛ lɔii ŋûŋ ŋ̀uŋ ma ƃó mɛni ma

Asafa ŋɔwulei

¹ Óo Ɣâla, ǹɔii í dɛ̀ɛ kúpɔi, lɔii-ŋuŋ da kpɛ́ni su-ƃela da pá da gula kúyêei. Da Ípɛrɛ Kɛ́tɛi maa tĩa kara, da Zerusâlɛŋ su-kara, ǹaa a lɛɛ a pilêŋ ŋá.

² Da ínûai páa dípoma táa-taai, díkɛ ƃò a ŋɔni-ŋa da lɔɔ-fɛnɛ-sãa kɔ́nɔ̃ŋ.

³ Da ínûai ŋãa pú yɛ̂ɛ yá. Díŋãa kpôloŋ lâai Zerusâlɛŋ taa-leei su yɛ̂ɛ ya-lêe. Núu da fé naa é díloo.

⁴ Kúkɔlɛ ma lɔii-ŋuŋ-ŋai su-ƃelai da kúlarânii, díkɛ ɣɛ́lɛ maa kûla kúkponôi.

⁵ Óo Yâwɛɛ, ya pâi kɛ̂i a ílii ŋwánaa kûa tãi ɣɛɛlu yée mu? Ya pâi kɛ̂i nɔ́ a ílii ŋwánaa kûa wɔ́lɔ-wɔlɔ da wɔlɔ-wɔlɔ? Ílii ŋwânai a pâi kɛ̂i kúkerenîi yɛ̂ɛ ŋɔŋ a tãi ɣɛɛlu?

⁶ Ílii ŋwána ǹɔii-ŋûŋ-ŋai zu-ƃela dîa dífe íkɔlɔŋ, da diai dífa ífɛ̀lii.

⁷ Ílii ŋwána dîa, kpɛ́ni fêi, dí ínûai pàa, ǹɔii a lɛɛ a pilêŋ ŋá.

⁸ Ífe kúkula maa kɛ̀ zɔnyɔ̂ŋ kúnâŋ pɔlɔ-ŋai dí gɛ̀i m̀ɛni ma. Kúmalôŋ káa, kili-kɛ-zu fé ŋɔ́nɔ kúyêei.

⁹ Óo Ɣâla, kpɔŋ kûa í kúmalôŋ káa. Kúŋuŋ ma ƃó í kúsu mɛ̂ni lɛɛ ílaai sârai.

¹⁰ Lé mɛni ƃé ǹɔii-ŋûŋ-ŋai da kúmarê kɛ̂i la dîyɛɛ “Káɣâlai kɔɔ?” Tɔɔ kú íkaa í ǹɔii-ŋûŋ-ŋai kula maa kɛ́ nyii-ŋai ínûai ŋãa pûi.

¹¹ Íwoli tɔ́ɔ diai dîa da mɔ̃lɛ̂i kpini-pɛrɛ-ŋa mui, da diai gbɛtɛ̂ɛi a gɛɛ dí dípaai.

¹² Óo Ǹuu-namui, ǹɔii-ŋûŋ-ŋai da íwoo yɔ̂ŋ fei, díkula maa kɛ́ gîei lɔ́ɔlu mɛi feerɛ zɔnyɔ̂ŋ mɛni ma da gɛ́ a yai.

¹³ Yà gɛ̀ tí, gɛ̀ ní kúai a íƃala-ŋai kwa pâi ísɛɣɛ̂i fêi wɔ́lɔ-wɔlɔ da wɔ́lɔ-wɔlɔ. Kúlônii da díwɔ̂ lònii da pâi kɛ̂i ílaa maa tɛ̂i wɔ́lɔ-wɔlɔ da wɔlɔ-wɔlɔ.