Mąątɛ̨nɛ̨ 77 - Bible

Ɣâla a kɛ̂ ŋɔnûai kɔlɛ mɛni kpɔ̂lu su

Asafa ŋɔwulei nyii è bɔ̃yɛ ŋ̀ule too-ƃelai láa túɛ-nuui Zedutɔŋ pɔ́ naai

¹ Ŋa wɔ̀lɔ Ɣâla ma a ŋ́oo su kɛ́tɛ. Ŋa wɔ̀lɔ ma a ŋ́oo su kɛ́tɛ, ǹyaŋ a ŋ́oo mɛni.

² Ŋà kɛ̀ mɛni kpɔ̂lu su, ŋa Ǹuu-namui fɛli. Ŋa ńyee tɛ̀ ɣelêi a kpíni kélee ŋ́gɛ vɛ̀li kɛ́lɛ fa ŋa-nɛnɛ da sɔlɔ ƃô ǹyêei.

³ Ŋà ŋ́gili ŋá sìa é pîlaŋ Ɣâla ma, ŋa wɔ̂lɔ. Ŋà lòno é pîlaŋ ma, ńii a tôo pôlu.

⁴ Ƃa gɛ̀ fa nyîi a kpíni. À kɛ̀ tí, ńii a kɛ̂ sɛ̂lɛnii fa pɔ̂ri lônoi.

⁵ Ŋà ŋ́gili ŋá sìa é pîlaŋ wɔ́lɔ-wɔlɔi tí ma, góraŋ-ŋai da tɛɛi dímaa mɛ̂ni kíli a tôo ŋ́gili ŋá.

⁶ Ŋà kɛ̀ ŋ́gili ŋá siâi a kpíni mɛni támaa da tôo ŋ́gili ŋá. Ŋa ŋ́gili ŋá sìa, m̀arê kɛ̂ɛ-ŋai da pâ ŋ́gili ŋái dia ƃa:

⁷ “Ǹuu-namui fé pâi ŋɔ́nɔ ǹyée seêi ḿu ƃei? Ǹíi a pâi lâai ŋɔ́nɔ ńyêei ƃei?

⁸ Ŋɔwɛli kɛ́-maa kpanaŋ kɔ̃́yɛŋ nɔ́ ƃé ŋí kúmɛni ma? A ŋɔkono-teei maa fáleŋ ƃe ŋí kúmɛni ma?

⁹ Ɣâla a nia ƃe ŋí kúmaloŋ káa mɛni ma? Ŋɔlii ŋwânai a dɔɔ̂i káa ƃe ŋí ŋɔmaloŋ kâai pɔ́ɔ ŋá?”

¹⁰ Nya ƃe ŋá m̀o ńyɛ̂ɛi, “M̀ɛnii kpɔ́ sôlii ḿâi ǹyaa ƃa, Ŋ̀wála-wâla kélee Ɣalai a ǹíi maa fáleŋ kú mɛni ma.”

¹¹ Yâwɛɛ, íkɛ mɛni kpaya-kpayai maa mɛni kíli fé pâi kpɛɛ̂i ŋ́gili ŋá. Ŋa pâi íkɛ mɛni mĩli-mili-ŋai kélee í gɛ̀i, m̀aa mɛ̂ni lâai ŋ́gili ŋá.

¹² Íkɛ mɛni-ŋai maa mɛ̂ni a pâi lɛɛ̂i ŋ́gili ŋá. Ŋa pâi ŋ́gili ŋá siâi é pîlaŋ íkɛ mɛni kpaya-kpayai dîa.

¹³ Óo Ɣâla, m̀ɛni-ŋai ya gɛ̀i, gélee maa waâi. Ɣâla da fé naa gɛ́tɛ yɛ̂ɛ yá.

¹⁴ Íkaa a Ɣâla nyii a ŋɛi kɛ́-maa mɛni kpaya-kpaya-ŋa kɛi. Ya íwala-wala-laai lɛ̀ ǹɔii-ŋûŋ-ŋai su-ƃelai dîa.

¹⁵ Ya ínûai Zeeka da Zosɛ dísuui su-ƃelai ŋuŋ ma ƃò a íwala-wala-laai.

¹⁶ Óo Ɣâla, ǹyá-ŋai kɛ́ɛ da íkaai, dí yào, yúo kpóŋ ma é túmo-tùmo.

¹⁷ Tuna kpɛ́ɛ pôlu è pú, ŋ̀ele-gbâna é too, ŋ̀elei su kɛ́ kɛ̀ mãla-mãla m̀éla kélee ma.

¹⁸ Ŋ̀elei su è kɛ̀ lâɣii, ŋ̀ele-gbâna ŋɔŋ léŋ é ŋ̀éniɛi gwaa kélee ma pòno. Ǹɔii è kpɛ̀liŋ é túmo.

¹⁹ Í sìa ǹyá ɣîliŋ su, í ǹyúo siŋɔɔi tíyeŋ, kɛ́lɛ núu da fé íkɔɔ pɔɔ káa ní.

²⁰ Í ínûai téniŋ tɔ̀ɔ yɛ̂ɛ ƃála mɛi káa nuu, Í gɛ̀ tí Mose da Eelɔŋ dí sârai.