Mąątɛ̨nɛ̨ 72 - Bible

Ɣâla fɛliɛɛ gâloŋ mɛ̂ni ma

Saloma ŋɔwulei

¹ Tɔ̃yâ mɛni ƃó táre tɛ̀ɛ gâloŋ pɔ́ a gɛɛ gɛ́ mɛni ŋáa tée a tɔ̃yâ-pere óo Ɣâla. Ítɔ̃yâ-laai lɛ́ m̀a.

² Tɔɔ é ínûai mɛi káa tɔ̃yâ-pere su. Vé nɛ̀ɛ naa núu da é gôlo-ƃelai lúaŋ.

³ Tɔɔ ǹɔii é sí-sãa kpɛtɛ. É zí-sãai kpɛtɛ ǹûai díteniŋ ƃo-laai sârai.

⁴ Tɔɔ gâloŋ é gôlo-ƃelai dímɛni-saai ƃó a tɔ̃yâ-pere, é kpɔŋ mâa tɛɛ diai pɔ́ pɔ̂ri fé dîɛi. Tɔɔ é diai yée mɛi ɣále da nûa kɔ̃liŋ kùla díyêei a wála-wala-laai.

⁵ Tɔɔ ǹûai dí ífɛli tãi nɔ́ díkaa la ɣele ma a kpíni da fóloi, tãi nɔ́ vóloi da ŋ̀áloŋ da fôlo la wɔ́lɔ-wɔlɔ da wɔlɔ-wɔlɔi.

⁶ Tɔɔ gâloŋ maa mɛ̂ni é kɛ́ yɛ̂ɛ fólo lá-ƃoɔɔ tuna nyii à pù, sí-sãa líi a lâai. É kɛ́ yɛ̂ɛ lúu nyii a ǹɔii yɔ̂ɔ, sí-sãa díkɛ kpɛ̀tɛ ma a ǹɛ́lɛɛi.

⁷ Tɔɔ teniŋ ƃô-laa mɛni da lii-see mɛni dí kɛ́ ŋɔfúlu-laai su. Tɔɔ m̀ɛnii kélee a ǹyée pìli zui, é ƃûu ƃó tãi nɔ́ ŋ̀áloŋ káa niî fôloi lai.

⁸ Tɔɔ ŋɔwála-wala-laai é kúla yúo ma é tóo yúo ma, é kúla Yufeletii ma é tóo ǹɔii kɔ́yaŋ ma.

⁹ Tɔɔ ŋɔkpɔara-ƃelai dí tóo gɔ́ɔ mu ǹɔii ma, dí bɔ̂rɔi kɔ́mɔ.

¹⁰ Tasi da yúo kpono ma lɔii-kpiniŋ-ŋai mɛi kâloŋ-ŋai da pâi ŋuŋ-fela-fei kpɛɛ̂i ǹyêei. Tɔɔ Siba da Seba lɔii-kpiniŋ-ŋai mɛi kâloŋ-ŋai dí sama-sãa tɛɛ bɔ́.

¹¹ Tɔɔ ǹɔii-kpiniŋ-ŋai mɛi kâloŋ-ŋai kélee dí tóo gɔ́ɔ mu, ǹɔii-ŋûŋ-ŋai su-ƃelai kélee dí kɛ́ a ŋɔtíi kɛ́-ƃela.

¹² Diai pɔ̂ri mâa fé dîɛi, da dòli kpɔŋ mâa mɛni ma, a pâi díŋuŋ maa ƃôi, é kpɔŋ mâa tɛ̀ɛ gôlo-ƃelai pɔ́ díkpɔŋ mâa nuu fé mai.

¹³ A pâi diai malôŋ kâai dífii kpɛɛ̂i, da gôlo-ƃelai. A pâi diai ŋuŋ ma ƃôi pɔ̂ri mâa fé dîɛi.

¹⁴ A díŋuŋ maa ƃò é díkula diai yêei díluâni, da m̀ɛni nyɔ́mɔɔ kɛ́-ƃelai. A gɛ̀ tí, kpɛ́ni fêi, dímaa mɛ̂ni kpanaŋɔɔ̂i m̀a.

¹⁵ Tɔɔ gâloŋ é kɛ́ ɣele ma wɔ́lɔ-wɔlɔ da wɔ́lɔ-wɔlɔ. Tɔɔ Siba gooi da é kɛ́ a bɔ́ɔ. Tɔɔ nûa díkɛ Ɣâla-fɛli m̀ɛni ma a ɣele kélee. Tɔɔ Ɣâla ŋɔlûwai kɛ́ ƃò m̀a ƃɛ́i kélee a lî naai.

¹⁶ Tɔɔ mii-sãa támaa kɛ́ ƃò ǹɔii ma. Tɔɔ sí-sãa dí kpɛtɛ ǹyée-ŋai su, yɛ̂ɛ Lɛƃanɔŋ lɔii su si-sãai. Tɔɔ daa-lee-ŋai lá é fɛ́ɛ a núu-kpune, yɛ̂ɛ kala a lɔii láa fɛ̀ɛ.

¹⁷ Tɔɔ núu da fé wɔ́lɔ ǹia gâloŋ láa ma. Tɔɔ ŋɔkɛ́tɛ-laai maa tûŋ é kɛ́ ɣele ma tãi nɔ́ vóloi káa la ɣele mai. Tɔɔ ǹɔii-ŋûŋ-ŋai su-ƃelai kélee dí Ɣâla marê kɛ́ a gɛɛ é lûwa láa dîa, yɛ̂ɛ berei a lûwa láa la gâloŋ mai.

¹⁸ Laa maa tɛ̂ é tɛ́ɛ Eezuɛ Ŋɔɣâlai Yâwɛɛ pɔ́. A mɛni kpaya-kpaya-ŋa kɛ̀.

¹⁹ Lûwa é kɛ́ ŋɔláa kɛ́tɛi ma wɔ́lɔ-wɔlɔ da wɔlɔ-wɔlɔ. Tɔɔ ŋɔfólo-laai é ǹɔii lá fɛ́ɛ. É kɛ́ tí. É kɛ́ tí.

²⁰ Zɛse ǹóŋ Deeƃé Ŋɔɣâla-fɛli woo-ŋai kpɛɛ ŋa ká ŋí.