Mąątɛ̨nɛ̨ 7 - Bible

Tɔ̃yâ mɛni kɛ́ mɛni maa Ɣâla fɛliɛɛ

Deeƃé ŋɔwulei è dòo Yâwɛɛ ma Kusi mɛni ma nyii kɛ̀ a Bɛŋsima ŋɔsuui su nuui

¹ Óo Ŋáɣâlai Yâwɛɛ, yá ƃé ŋa pá ípɔ ḿaa kɔ̃ɔ mɛni ma. Ŋ́gula ŋ́gbɔara-ƃelai yêei, í ŋ́uŋ ma ƃó.

² À wàla kɛ́ tí, da pâi ńzonîi díkɛ ŋ́vala-fala yɛ̂ɛ yala-sulu a sua sôŋ gɛ́ vàla-fala. Da pâi kɛ̂i ŋ́gala-ɣalai díkɛ lì a ńyãa ǹyaŋ núu fé naa é ńgula yêei kɛ.

^3-4 Óo Ŋáɣâlai Yâwɛɛ, fé tá m̀ɛni-ŋai ŋí da kɛ́ ní a núu da. Fé tá mɛni nyɔ́mɔɔ da kélee kɛ́ ní a ḿƃarâŋ-nuu da kpaa máŋ ŋá ŋ́gbɔara-nuu da kɔ̃liŋ kula ǹyêei a wála-wala-laa nyii zɔŋ fé zui. À kɛ̀ ŋa m̀ɛni-ŋai ŋí da kɛ́ ní a núu da,

⁵ ǹɛɛ naa ŋ́gbɔara-ƃelai dí ŋ́gbɛ dí ńzoŋ, dí ƃɔ́rɔŋ-ƃɔrɔŋ ḿâ, dí ńzu-kara.

⁶ Óo Yâwɛɛ, ímu-siɣe, í ŋ́gbɔara-ƃelai kula maa kɛ́ a lii ŋwâna pere. Óo Ŋáɣâlai, ímu-siɣe í kpɔ́ŋ ḿâ. Gɛ́ tɔ̃yâ mɛni é kɛ́.

⁷ Ǹûai kélee ŋá lɛ́ɣɛ gîe ma íkâloŋ see-sɛŋ kɔlɛ, íkɛ ƃò dímɛi a kâloŋ.

⁸ Óo Yâwɛɛ, yá ƃa núu kélee ŋɔmɛni ŋá-tee nuui. Í gɔ́lɔŋ fé niî mɛni nyɔ́mɔɔ da kélee kɛ́ ní. Ŋámɛnii ŋá-tee ńdûa pere ma.

⁹ Íkaa a teniŋ ƃô Ɣala. Yá ƃé núu-kpune líi su kɔ́lɔŋ da ŋɔkili ŋa sîai. M̀ɛni ŋ̀wana-lɔ̂ɔ-ƃelai su-kara, í diai ŋɛ́i malôŋ káa da íwoo mɛnii.

¹⁰ Yá Ɣâla, yá nɔ́ ƃa ḿaa kɔ̃ɔ nuui. Diai da íwoo mɛnii, ya díŋuŋ ma ƃò.

¹¹ Ɣâla káa a mɛni ŋá tée nuu sãa. A ŋwâna-lɔ̂ɔ-ǹuu kula maa kɛ̀ a ɣele kélee.

¹² Dà wàla dílii maa fáleŋ, a pâi dísu-karâi. Ɣâla a pâi ŋɔƃóa-sɔkpɔi ŋá-liî gɛ́ ŋɔkerâŋ ŋá tɛ̀ ŋ̀wana-lɔ̂ɔ-ƃelai su-kara mɛni ma.

¹³ Aâ ŋɔkɔ́-kɔ sãa nyɔ́mɔɔ-ŋai síɣe, a dɔ̃a-ŋai lɔ́ ŋɔkerâŋ ŋái ŋá, a ŋɔŋ sée díŋa.

¹⁴ Ka gáa, ŋ̀wana-lɔ̂ɔ-ƃelai díkili ŋa-siai fa wɔ́lɔ pìlaŋ mɛni lɛ́lɛɛ da kɛ́ mɛni ma. Mɛni kpaya-kpaya nyɔ́mɔɔ-ŋa nɔ́ ƃé gɛ́ mɛni káa díkili ŋá.

¹⁵ Kɛ́lɛ m̀áre-ŋai da dɛ̀ nûa perei, maa ƃare-ŋai nɔ́ ƃé da kɔ̀ a dia.

¹⁶ M̀ɛni nyɔ́mɔɔ-ŋai kélee da gbɛ̀tɛ nûa da kpɛ́ni-ŋa mɛni mai, dia nɔ́ ƃé a kɛ̂ a dia, díkɛ mɔ̃lɛ maa mɛ̂ni solii su.

¹⁷ Ŋa pâi sɛɣɛ-fei tɛɛ̂i Yâwɛɛ pɔ́, kpɛ́ni fêi, a mɛni ŋá tèe a tɔ̃yâ-pere. Ŋa pâi laa ma tɛ wule toôi Ŋ̀ála Kɛ́tɛi Yâwɛɛ ma.