Mąątɛ̨nɛ̨ 69 - Bible

Ɣâla fɛliɛɛ kpɔŋ mâa mɛni maa

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Óo Ɣâla, ŋ́uŋ ma ƃó. Ǹyái a fɛ́ɛ a tɛ́ ŋ́gɔŋ lá.

² Ŋa ƃɔ̂i pâra siŋɔɔ su, ŋ́gɔɔ tɔɔ pere fé ŋɔ́nɔ ma. Ŋ́gaa ya fɛ̂ɛ kɛ́tɛ su. Ǹaa a lɛɛ a gùro ŋá lɛ́ɛ ǹyái su.

³ Ŋa lɛɛ wɔ̂lɔi ŋ́gɔŋ lá kélee a kpála, kɔlɔ a kpɛɛ ḿâ. Ŋa kɔ̂i a gɛɛ ŋá ŋɛ́i lá ƃó, ŋá kpɔŋ mâa kɔ́ri íyêei.

⁴ Diai da ŋ́gbɔara mɛni-ŋa kɛ́ mɛni su nyii ńzɔŋ fé zui, dítâmaai yɛ̂ɛ ŋ́uŋ lêɣa. Da lɛ́ɛ támaa kɛ́ a ńaa. Díwala-walai. Da ŋ̀wɛ̂lii dí ḿbaa. Da ŋ́gɛ ŋa sãa bɔɔ tôoi tɛ̀ɛ nyii fé ŋ̀úma níi.

⁵ Óo Ɣâla, í ŋáƃoo tûa perei kɔ́lɔŋ. Sɔnyɔ̂ŋ da fé ŋ́gbonôi nyii ífe gɔ́lɔŋ.

⁶ Óo Ǹuu-namui, Ŋ̀wála-wâla kélee Yâwɛɛ, ífe nɛ̀ɛ naa diai díkili káa yâi dí ŋumɛ ḿaa mɛ̂ni ma. Óo Eezuɛ Ŋɔɣâlai, ífe nɛ̀ɛ naa diai da ífɛlii, ƃaa kula maa é sɛ́lɛŋ dîa ḿaa mɛni ma.

⁷ Ímaa mɛ̂ni ká ŋí nûa da ńarânii la, ŋumɛ kɛ́ ḿbàai.

⁸ Ŋ́gaa yɛ̂ɛ ŋɔ̃ya ŋánûai sáma, ŋ́gɛ ƃò yɛ̂ɛ lɔii da kpɛ́ni su nuu ŋálee kàa kaayɔɔ-ŋai ŋɛ́i.

⁹ Ípɛrɛi Kɛ́tɛi mɛni maa liî a ŋ́gereŋ yɛ̂ɛ ŋɔŋ. Nûa da ílàraŋ, gɛ̀ ní da ńarâŋ.

¹⁰ Ŋà sûŋ sìɣe ŋà ŋ́gîŋ maa yéŋ, nûa da tɔ̀ɔ ḿâ dí ńarâŋ m̀ɛni su.

¹¹ Ŋà malôŋ tôo maa sêɣe tòo ḿâ, nûa da kɛ̂ ɣɛ́lɛ maa kulâi ŋ́gbonôi.

¹² Nûa da kɛ̂ ńaa ƃôi bere lêe-ŋai ma, ǹɔɔ kpêle-ƃelai díkɛ ɣɛ́lɛ maa kûla ŋ́gbonôi a wule-wôo-ŋa.

¹³ Kɛ́lɛ à kɛ̀ a ńyãa, óo Yâwɛɛ, ŋa pâi kɛ̂i nɔ́ ífɛlîi. Ɣâla, ŋ́oo su too a ínîa tãi. Ŋ́oo su too íwɛli kɛ́-maa kpanaŋɔɔi sârai, kpɛ́ni fêi, í íkono tèe a gɛɛ ya pâi ŋ́uŋ ma ƃôi.

¹⁴ Ŋ́gula bâra siŋɔɔi su, í ŋ́uŋ ma ƃó ŋ́gbɔara-ƃelai yêei. Ŋ́gula ǹya siŋɔɔi su.

¹⁵ Ífe ǹɛɛ naa ǹya-fɛɛi é ḿɛi pɛ́lɛ, ŋá yéŋ ǹyái kpôŋ ma, kpaa máŋ ŋá tóo m̀olôŋ su.

¹⁶ Óo Yâwɛɛ, ŋ́oo su too íwɛli kɛ́-maa kpanaŋɔɔ lɛ́lɛɛi sârai. Ímaloŋ kâai su kɛ̂tɛi. Tínaŋ ḿbɔ naa pêre í ḿalôŋ káa.

¹⁷ Ífe íŋɛi lòo ḿâ ńyãai a íyee mu-nuui. Ńii toɔɔ̂i pôlu a ŋ̀ánaa. Ŋ́oo su too a maa félaa.

¹⁸ Lɛɣɛ ŋ́gɔlɛ ma í ŋ́uŋ ma ƃó, í ŋ́gula ŋ́gbɔara-ƃelai yêei.

¹⁹ Gáa berei nûa da ńarânii la, díkɛ ƃâa kula ḿâ, ŋumɛ kɛ́ ḿbaai. Í ŋ́gbɔara-ƃelai kélee kɔ́lɔŋ.

²⁰ Larâŋ a ńii kara-kara ŋ́goi. Ńii a too pôlu. Ŋa maloŋ kâa kɔ̂rii, kɛ́lɛ fa gàa, ŋ́gɛ nûa kɔ̀ri a gɛɛ dí kɛ́ a ŋáa nɛnɛ-ƃela, kɛ́lɛ fa dɔnɔ kpîŋ sɔlɔ ƃô.

²¹ Puru à kɛ̀ ḿbaâi, da ḿbaa sɛŋ tɛ̀ɛ ḿbɔ. Kpele-wɛ̂li à kɛ̀ ḿâ, dí ŋwã̂ai kpona tɛɛ ḿbɔ.

²² Gɛ́ díkuu kpaya-kpayai, da dísâla kula kûu-ŋai dí kɛ́ a ƃáre-ŋa dímɛni ma.

²³ Gɛ́ díŋɛi é pú, dísama kɛ́ sàa a ɣele kélee.

²⁴ Ílii ŋwânai lɛ́ dîa, í díkula maa kɛ́ a ŋ̀ánaa.

²⁵ Díkɛ̂i kara, naa fé ŋɔ́nɔ kɛ̀ a ǹɛ́lɛɛ nûa mɛni ma.

²⁶ Dí mɛni ŋánaa kɛ̀ a diai í díkula maa kɛ̂i. Dí lòno é pîlaŋ dímɔ̃lɛ-laai ma.

²⁷ Dímɛni kpɔ̂lui su kɛ́tɛ. Ífe da ŋuŋ ma ƃò.

²⁸ Dílaa kúla vúlu-laa kɔlɔi su. Da láa fé kɛ̀ deniŋ ƃô-ƃelai láa sáma.

²⁹ Kɛ́lɛ ŋ́gaa mɛni kpɔ̂lu su, ńii toɔ́ɔ pôlu. Ŋ́uŋ ma ƃó, í ḿu siɣe í ńdɛ ɣelêi, óo Ŋáɣâlai.

³⁰ Ŋa pâi Ɣâla láa maa tɛ̂i a wule, ŋá ŋɔkɛ́tɛ-laai maa mɛ̂ni ƃó, ŋá zɛɣɛ̂i fé.

³¹ Nyíŋi a pâi Yâwɛɛ líi lâai é tɛ́ɛ la taa-tulɛ kpaa máŋ niŋa sîrɛ kɛ́tɛ kuláa la mà a sâla.

³² Tɔɔ diai mɔ̃lɛi, da naa kàa dílii é nɛ̃ɛ, diai tíi kɛ̂i Ɣâla mii dílii é kúla.

³³ Yâwɛɛ a ŋ̀oli tɔ̀ɔ diai dîa kpɔ̂ŋ mâa wɛ̂lii. Va ǹîa diai dîa kpini-pɛrɛ mui.

³⁴ Tɔɔ ŋ̀elei da ǹɔii dí Ɣâla láa ma tɛ́, ǹyá-ŋai, yúo, da fûlu-sãa kélee dí ǹáa ma tɛ́ ŋ̀elei su da ǹɔii ma.

³⁵ Ɣâla a pâi Zãiyɔŋ ŋuŋ ma ƃôi, é Zuda taa-lee-ŋai tɔ́ɔ pôlu. Ŋɔnûai da pâi ǹaa siɣêi dí sée naa.

³⁶ Ǹɔii a pâi lɛɛ̂i a dílônii pɔ́ɔ, da diai dí ŋ̀wɛ̂li níi da dia-ni dí ƃò naa.