Mąątɛ̨nɛ̨ 66 - Bible

Laa ma tɛ̂ da sɛɣɛ̂ fêi wule

Ŋ̀ulei gáa ŋ̀ule too-ƃelai láa túɛ-nuui mɛni mai

¹ Káai kélee ŋ̀éniɛi sui, ka Ɣâla láa maa tɛ́ ɣelêi pere a lii-nɛ̃ɛ.

² Ka ŋɔkɛ́tɛ-laai maa mɛ̂ni too a wule, ká ŋɔfólo-laai maa tɛ́.

³ Ka m̀ó Ɣâla ma kâai, “Íkɛ mɛni-ŋai mĩli-mĩliɛɛi. Wála-wala kpanaŋ káa íyêei. Íkpɔara-ƃelai dí tòo íkɔɔ mu a yao maa-pere.

⁴ Núu kélee a ífɛ̀li. Da laa maa tɛ̂ wule tòo yâ díkɛ laa maa tɛ̂ wule-ŋa tòo a ílaa.”

⁵ Pá í m̀ɛni-ŋai káa Ɣâla a gɛ́i. Gɛ́ mɛni mĩli-mĩliɛɛi núu-kpune sáma.

⁶ È gɛ̀ yúo é kpála, ǹaa kɛ́ ƃò a lɔii tânaŋ ma. Kúnûai dí sìa ǹya-leei su dí díyeŋ. Ǹaa ƃé kú lii-nɛ̃ɛ kùla naa m̀ɛnii é gɛ̀ kûɛi m̀ɛni ma.

⁷ Ŋɔkâloŋ-laai kɔ́yɛŋ fé ma. M̀ɛni-ŋai ǹɔii-ŋûŋ-ŋai da gɛ̀i, da fa lôo m̀a. Tɔɔ-mâ-nuu kélee da fa pɔ̂ri ǹyée mɛi ɣâlei.

⁸ Lɔii-ŋuŋ-ŋa, ka Kúɣâlai láa maa tɛ́. Tɔɔ nûa dí ká laa maa-tɛ̂-wooi mɛ́ni ɣelêi pere.

⁹ A gɛ́ kúkaa niî ɣele ma. Vé tá ǹɛɛ ní naa kú tóo.

¹⁰ Yá, óo Ɣâla, ya kú-sukɔɔ̂ŋ, ya kúmaa kpɛ̀ɛ, ya kúmaa wáa yɛ̂ɛ da káne liƃi wâa ma.

¹¹ Í gɛ̀ kú tóo ƃáre ŋá, í kpîri wuyɛ́ɛ-ŋa láa kúŋûa.

¹² Í gɛ̀ kúkpɔara-ƃelai dí ƃɔ́rɔŋ kûa. Kú tɛ̀ɛ ŋɔŋ da ya-fɛ̂ɛ su. Kɛ́lɛ ya pá a kûa ŋuŋ ma ƃô kwaa ma.

¹³ Ŋa pâi pâi a kéreŋ sala sãa ípɛrɛi mu. Gono têe-ŋai ŋá gɛ̀ íyêei,

¹⁴ tãi ŋá kɛ̀ la mɛni kpɔ̂lu sui, ŋa pâi gélee ŋ̀aa-see kɛ̂i.

¹⁵ Ŋa pâi ŋáƃala kɔlɔ lɛ́lɛɛ ma-ŋai da kulâi yâ a kéreŋ sala íɣâla-teƃelei ŋá, da niŋa sîrɛ-ŋa é pɛ́lɛ ƃoli-ŋa dîa. Géreŋ sala sãai ŋí kéreŋ lûri a pâi tɛ̂i ŋ̀elei su.

¹⁶ Káai ka ƃaa kɛ́-maa tɛ̂ɛ Ɣâla pɔ́i, ka lɛɣɛ a ńyãa ká káwoli tɔ́ɔ ḿâ. Ŋa pâi m̀ɛnii ƃôi kâa a gɛ́ ḿîi.

¹⁷ Ŋá wɔ̀lɔ ma kpɔŋ maa mɛni ma, ŋá ǹáa maa tɛ̂ wule-ŋa su.

¹⁸ Eêi kɛ̀ fé ŋásɔnyɔ̂ŋ ƃó ní Ǹuu-namui ma, vêi ŋ̀óli tɔ̀ɔ ḿâ.

¹⁹ Kɛ́lɛ tɔ̃yâ ma, Ɣâla è ŋ̀óli tɔ̀ɔ ḿâ, é ŋáfɛli-wooi su tòo.

²⁰ Ŋa Ɣâla láa maa tɛ̂i, kpɛ́ni fêi, vé niî ǹyée kùla ní ŋáfɛli-wooi mu. Ŋɔwɛli kɛ́-maai káa nɔ́ naa ḿɛni ma.