Mąątɛ̨nɛ̨ 65 - Bible

Laa maa-tɛ da Sɛɣɛ-fei

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Laa maa-tɛ káa a ípɔɔ, óo Ɣâla, yái íkaa Zãiyɔŋ Yeei mai, ǹyaŋ kwa pâi kúkono tee-ŋai ŋ̀aa sèe kɛ̂i íyêei.

² Núu kélee a pâi pâi ípɔ, kpɛ́ni fêi, ya nûa díɣâla-fɛli-wooi su tòo.

³ Zɔnyɔ̂ŋ-ŋai kwa gɛ̀i, tãi kwa lɛ̂ɛ gɛ̂i la zu é kɛ́tɛ é tɛ́ɛ kúkponoi mai, maa tãi ƃé ya kúsu-mɛ̂ni lɛ̀ɛ la.

⁴ Lûwa káa ǹúui ma í zìɣe zu í nɛɣɛ a yâi, a gɛɛ é kɛ́ ípɛrɛi mui. Kúlii a pâi lâai zãai mɛni ma ya dɛ̀ɛ kúpɔ ípɛrɛi mui, nyíi gáa a Ípɛrɛ Maa Waai.

⁵ Ya kúŋuŋ maa ƃó kúmɛni kpɔ̂lu-ŋai su. Í mɛni kpaya-kpaya támaa kɛ̀ a gɛɛ í kú ƃálo. Ǹûai kélee da pâi lâai a yá ŋ̀éniɛi gwaa kélee ma.

⁶ Ya ƃe ǹyée-ŋai kpɛ̀tɛ a íwala-walai. Íwala-wala-laai káa dímɛi.

⁷ Ya gɛ̀ ǹyuo-ŋai dí kpéra toôi, da tíŋ fa ŋɔ́nɔ tɛ̀. Ya gɛ̀ núu-kpune ŋáa é yéŋ,

⁸ a gɛɛ diai díkaa ɣele ma ǹɔii-ŋuŋ su kôya-ŋai sui, da íŋɛi kɛ́-maa-ŋai kâa, dí yao. Ítûa-perei a pâi gɛ̂i ǹûai dí láɣi a lii-nɛ̃ɛ kɛ́tɛ, é kúla ŋ̀éniɛi m̀éla dɔnɔ ma é tóo gbéli ma.

⁹ Ya gɛ̀ tuna é pú ǹɔii ma é ma yɔɔ, í gɛ́ sí-sãa dí kpɛtɛ. Ya gɛ̀ ǹya-lee-ŋai dí fɛ́ɛ, sí-sãa dí kpɛtɛ ǹɔii mâ. Ǹyaŋ bere ƃé ítûa-perei káa la.

¹⁰ Ya gɛ̀ tuna é pú gbâlaŋ-ŋai ŋá, é ǹɔii yɔ́ɔ é gɛ́ pùtɛ-putɛ, zí-sãai mɛni ma. Ǹyaŋ nyíŋi ƃa gɛ̀ zí-sãai dí sóo a ǹɛ́lɛɛ.

¹¹ Ísɔŋ lɛ̂lɛɛi a ŋ̀ánaa. Ya gɛ̀ sí-sãa dí kpɛtɛ ǹɔii ma a ǹɛ́lɛɛ. Ƃɛ́i kélee íkaa naai, mii-sãa támaa káa naa.

¹² Ya gɛ̀ kala-ŋa dí kpɛtɛ vɛ̃ɛ-kpâlaŋ-ŋai su, ǹyée-ŋai díkɛ lii-nɛ̃ɛ kùla.

¹³ M̀ála-ŋai da ƃûu ƃôi gbalaŋ-ŋai ŋá, zí-sãai díkɛ kpɛ̀tɛ ǹyée-ŋai loai. Zãâi ŋí kélee da wule tôo, díkɛ lii-nɛ̃ɛ kùla, díkɛ sɛɣɛ-fei tɛ̀ɛ Ɣâla pɔ́ yɛ̂ɛ núu-kpune.