Mąątɛ̨nɛ̨ 64 - Bible

Ɣâla fɛliɛɛ maa kɔ̃ɔ mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Óo Ɣâla, íwoli tɔ́ɔ ŋásɔŋ-pu-maa wooi ma. Ŋ́gaa mɛni kpɔ̂lu su. Ŋáfulu-laai maa kɔ̃ɔ ŋ́gbɔara-ƃela nyɔ́mɔɔ-ŋai yêei.

² Gɛ́ ńaa fé tòo zɔnyɔ̂ŋ-ƃelai kíli ŋá díloo mɛni nyɔ́mɔɔ-ŋa kpɛtɛ́ɛi su.

³ Dínɛŋ ŋá liɛɛ̂i yɛ̂ɛ ƃóa sɔkpɔ. Díwoo kɛ́ ƃɔ̀ núu kponôi yɛ̂ɛ sɔ̀la.

⁴ Da mɛni kpâla pɛ̀lɛ nûa dîa nyii-ŋai dísɔŋ fé zui. Da núu lɛ́lɛɛ-ŋa su kàra a díwoo.

⁵ Da díkîe-ni líi kùla mɛni nyɔ́mɔɔ kɛ́ mɛ̂ni ma. Da kɛ̂ mɛni kpɛtɛɛ kɛ̂i é pîlaŋ ƃɛ́i ma da pâi dí loo-ƃarei tɛ̂i naai, gɛ́ ƃò díkili ŋá a gɛɛ núu da fé pâi dí kâai.

⁶ Da mɛni nyɔ́mɔɔ kɛ́ mɛ̂ni kpɛ̀tɛ dîyɛɛi, “Kwaa kú sée díperei, núu da fé pâi kú kâai.” Kpɛ́ni fêi, núu-kpune líi da ŋɔkili-ŋa sîai su siŋɔ̂ɔi.

⁷ Kɛ́lɛ Ɣâla a pâi díƃonii a ŋɔsɔlai, é dí ŋwána a maa félaa.

⁸ Díkpɔɔi wooi a pâi dí su karâi. Diai kélee pâi díkâai, da pâi díŋuŋ kpɛmɛnii a dia,

⁹ yao é pá díkɔlɔi. M̀ɛnii Ɣâla a gɛ̂i, da pâi kɛ̂i díkili-ŋa siâi ma, dí kɛ́ gɛ́ mɛ̂ni-ŋai ŋáa lɛ̀.

¹⁰ Dɔ̃yâ-ƃelai da pâi koi-nɛ̃ɛ kulâi Yâwɛɛ kɛ́ mɛni-ŋai mɛ̂ni ma. A pâi díŋuŋ maa ƃôi. Dɔ̃yâ-ƃelai kélee da pâi ǹáa maa tɛ̂i.