Mąątɛ̨nɛ̨ 62 - Bible

Ɣâla ŋɔmɛi kâa-laai maa kîli tɔɔ-maai

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Ŋa Ɣâla maa kpɛ́ŋ a lii-kpele pere a gɛɛ é ŋ́uŋ ma ƃó. Ǹyaa tɔ̂nɔ kpéŋ nɔ́ ƃé ŋ́gili káa ma ŋ́uŋ ma ƃó mɛni ma.

² Ǹyaa nɔ́ ƃa ŋ́uŋ ma ƃó nuui, gɛ́ ḿaa kɔ̃ɔ yɛ̂ɛ kɔni. A ḿaa kpɛ̀, ŋ́gbɔara-ƃelai da fé pâi wɔ́lɔ pɔrîi ńyee mɛi ɣâlei.

³ Tãi ɣɛɛlu ƃé ka pâi kɛ̂i núu tɔnɔ maa kîli têei la, nyii ƃáre-koli pɔlɔ ŋɔwála-walai tɛɛ̂i mai, a gɛɛ ká zoŋ ka mɛni nyɔ́mɔɔ kɛ́ lai?

⁴ Ka ŋ̀wɛ̂lii nɔ́ ka ǹúui kpîŋ soŋ ká ƃaa kûla maa sɛ́lɛŋ ma. Ká wɛ́lini a lɛ́ɛ mɛni-ŋa. Ka lûwa làa ǹúui kpîŋ ma, kákɛ ǹaɣaŋ kálii su.

⁵ Ɣâla ǹyaa tɔ̂nɔ nɔ́ ƃé ŋ́gili tɔɔ̂i ma. Kili kɛ-zu káa ńyêei m̀ɛni ma.

⁶ Ǹyaa nɔ́ ƃa ŋ́uŋ ma ƃó nuui, gɛ́ ḿaa kɔ̃ɔ yɛ̂ɛ kɔni. A ḿaa kpɛ̀, ŋ́gbɔara-ƃelai da fé pâi wɔ́lɔ pɔrîi ńyee mɛi ɣâlei.

⁷ Ɣâla ƃé ŋ́gili káa ma ŋ́uŋ maa ƃó mɛni da ƃaa kɛ́-maa mɛni ma. Ǹyaa ƃa ḿaa kɔ̃ɔ-nuu kpanaŋ yɛ̂ɛ kɔni. Ǹyaa ƃa ŋ́uŋ maa ƃó-nuui.

⁸ Ŋánûa, ka láa a Ɣâla a ɣele kélee. Ka kámɛni kpɔ̂lui kélee maa mɛ̂ni ƃó ma, kpɛ́ni fêi, ǹyaa ƃa kúŋuŋ maa ƃó-nuui.

⁹ Núu-kpune káa nɔ́ a fãa lâɣi. Sɛŋ da kélee fé da kponôi, gɛ́tɛ, kpaa máŋ guro-te. Ya díkɔ̀ɔŋ, díwuyɛ fé a sɛŋ da. Dífoɣâŋɔɔi nɔ́ yɛ̂ɛ fãa-laɣi.

¹⁰ Káfe làa a ŋuŋ su kpânaŋ-ƃela nyɔ́mɔɔ-ŋa. Káfe kákili tɔ̀ɔ too-ma ƃela dîa, kpaa máŋ diai dîa díkili tɔɔ̂i dítɔɔ-sãai dîai.

¹¹ Ŋa Ɣâla wóo mɛ̀ni a tãi kpɛ́-kpɛɛ ǹyɛɛ wála-wala-laa káa a bɔ́ɔ,

¹² ǹyaŋ ŋɔwɛli kɛ́-maai káa a wɔ́lɔ-wɔlɔ wɛli kɛ-maa. Yá, óo Ǹuu-namui, ya nûa féla fè yɛ̂ɛ berei dítûa-pere káa lai.