Mąątɛ̨nɛ̨ 60 - Bible

Núu kula yêei kɛ́ɛ maa Ɣâla fɛliɛɛ

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma tãi è kɔ̀ la Arameaŋ-ŋai pɔ́ nyii-ŋai kɛ̀ Naɣaraɣiŋ lɔii da Zoba lɔii sui, da tãi Zôa è lène la pôlu gɛ́ kùla Idɔŋ-ƃela wála puu kao feerɛi (12,000) paai Gbolo Tiŋ-tiŋ sui

¹ Óo Ɣâla, ya íyee kúla kúmu ya kúkula maa kɛ́. Ya ílii ŋwána kûa a zu kɛ́tɛ. Kúmalôŋ káa í íyee sée kúmu.

² Ya ǹɔii túmo, ǹá a ƃó. Gɛ́ ŋɔ́nɔ é pá gîe ma, kpɛ́ni fêi, a kula-kulâi gîe ma, gɛ́ tàa-taa.

³ Ya gɛ́ ínûai díkɛ mɔ̃lɛ̂i a ŋ̀ánaa. Ya gɛ́ kúkɛ kɛ̀ tàka-taka yɛ̂ɛ ǹyaa ƃé kwa ŋwã̂ai támaa kpéle.

⁴ Ŋɛi kɛ́-maa lɛ́ diai dîa da ífɛlii, a gɛɛ mɛni kpɔ̂lu da a kɛ̀ pâi, dí berei kɔ́lɔŋ da pɔ̂ri pûi lai.

⁵ Kúŋuŋ maa ƃó a íwala-wala-laai, í kúfɛli-wooi mɛ́ni. Yà gɛ̀ tí, gɛ̀ ní diai í díwɛlinii, da pâi ŋuŋ maa ƃô sɔlɔ ƃôi.

⁶ Kúɣâlai, í íkono tèe íkwaa maa waai ma yɛ̂i, “Ŋa pâi Sɛkɛŋ taa-leei ŋáa kɔlɛ̂i a wála-wala, ŋá Sukɔ tiŋ-tiŋ ŋáa kɔ́lɛ.

⁷ Gilia da Manasɛ díkaa a ḿbɔɔ. Ifiraŋ ƃa ŋágba-ƃɛlɛi, Zuda kɛ́ ƃò a ŋálɔii kâloŋ wuruii.

⁸ Ŋa pâi Môa kɛ̂i a ŋáseɣe waa kwaa ma, ŋá ŋákpaŋ-kpalii pú Idɔŋ mɛi a ŋɛi kɛ́-maa a gɛɛ gáa a ḿbɔɔ. Ŋa pâi lâɣii a gɛɛ ŋa Felesia-ŋai yée mɛi ɣále.”

⁹ Óo Ɣâla, gbɛ̂ɛ ƃé pâi tɔɔ̂i ńduɛ é tɛ́ a ńyãa daa-lee su nyii maa tínaŋɔ̂ɔi a siɣãŋ? Gbɛ̂ɛ ƃé pâi tɔɔ̂i ńduɛ kwa ǹyaa kú lí Idɔŋ?

¹⁰ Óo Ɣâla, ya íyee kúla nɔ́ ƃe ŋí kúmu kwa kúlɔii ma kpɛ́-ƃelai?

¹¹ Kpɔŋ kûa kú kúkpɔara-ƃelai yée mɛi ɣále. Núu-kpune ŋɔwála-wala-laai fa pɔ̂ri kúŋuŋ maa ƃôi.

¹² Ɣâla a kɛ̀ kúkɔlɛ ma, kúyee a tɛ̂ɛ kúkpɔara-ƃelai dîa.