Mąątɛ̨nɛ̨ 57 - Bible

Ɣâla fɛliɛɛ kpɔŋ mâa mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma tãi è pù la Gâloŋ Sɔ̂ɔ yêei gɔni wôloi sui

¹ Ḿalôŋ káa mí óo Ɣâla, ḿalôŋ káa, kpɛ́ni fêi, ŋà pá ípɔ a gɛɛ ŋá ƃálo-laa sɔlɔ ƃó. Íkôoŋ mu ƃé ŋá ŋuŋ-ma ƃô sɔlɔ ƃô naa, a lɛɛ la zu vãa kɛ́tɛi a tɛɛ ḿɛi.

² Ŋá Ɣâla tôlii, Ŋ̀âlai nyii gáa a Ŋ̀âla Kɛ́tɛi, Ŋ̀âlai nyii a ŋámɛni-ŋai su tòo ḿîi.

³ A pâi lɛɛ̂i ɣâla-taa é ŋ́oo su too é ḿalo. A pâi ŋ́gbɔara-ƃelai yée mɛi ɣâlei. Ɣâla a pâi ŋɔwɛli-kɛ maai da ŋɔteniŋ ƃô-laai lɛ̂i ḿâ wɔ́lɔ-wɔlɔ.

⁴ Ŋ́gbɔara-ƃelai da tínaŋ ḿâ. Díkaa yɛ̂ɛ yala-sulu-ŋa nyii-ŋai ŋ̀wɛ̂lii a gɛɛ dí núu-sua míi. Dínyiŋ káa yɛ̂ɛ kpála-ŋa da sɔ̀ala-ŋa. Dínɛŋ káa yɛ̂ɛ ƃóa-sɔ̂kpɔ ŋáliɛɛ-ŋa.

⁵ Óo Ɣâla, íkɛtɛ-laai lɛ́ ŋ̀elei su, da ífolo-laai ŋ̀éniɛi gwaa kélee ma.

⁶ Ŋ́gbɔara-ƃelai dí deɣaŋ-ŋa pìli a gɛɛ dí ńzoŋ la. Ńii a too kpɔ́ pôlu a ŋánaa. Dí lóa tèe ḿberêi, kɛ́lɛ, dia kpîŋ dí tòo zu.

⁷ Óo Ɣâla, yá nɔ́ ƃé ŋ́gili tɔɔ̂i yâ. Ŋa pâi wule toôi yâ ŋá ílaa maa tɛ́.

⁸ Ŋámɔ̂leŋ, íŋɛi lá ƃó. Ŋakɔnîŋ da ŋá ƃɔɔi, ka káŋɛi lá ƃó. Ŋa pâi vóloi ŋɛ́i lá ƃôi.

⁹ Óo Ǹuu-namui, ŋa pâi ísɛɣɛi-fei ǹɔii-ŋûŋ-ŋai sáma. Ŋa pâi ílaa maa tɛ̂i ǹûai sáma.

¹⁰ Íwɛli kɛ́-maai kɛ̂tɛi, gɛ́ sèri ŋ̀ele-kɔlɔŋ ma. Íteniŋ ƃô-laai a tɛ́ ŋ̀eleŋ-kɔlɔŋ ma.

¹¹ Óo Ɣâla, íkɛtɛ-laai lɛ́ ŋ̀elei su, da ífolo-laai ŋ̀éniɛi gwaa kélee ma.