Mąątɛ̨nɛ̨ 55 - Bible

Núu kɛ́ɛ da díyee kúla mu maa Ɣâla fɛliɛɛ

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ dòo a ɣale-sãai

¹ Óo Ɣâla, ŋá Ɣâla fɛli-wooi mɛni. Ífe ípôlu tɔ̀ɔ ŋá kpera-fei wooi ma.

² Íwoli tɔ́ɔ ḿâ í ŋ́oo su too. Ŋákili-ŋa sîai a ńii toôi pôlu a ŋánaa.

³ Ŋ́gbɔara-ƃelai dímaa yao-wooi a gɛ́ ŋa yao kpɔ́ a ŋánaa. Ŋ́gbɔara-ƃelai da ḿɔ̃lɛi. Da kɛ́ nɔ́ mɛni kpɔ̂lu lâai ḿâ. Ḿɛlɛ kpɛɛ̂i díkoi, dílii ŋwánaa ḿâ.

⁴ Ńii a kpɛ̃linii ŋ́goi, saa ŋɔyao-maai a mɛi pɛ́lɛ.

⁵ Ŋa yaôi kpɔ́ ŋ́gɛ kpɛ̃liŋ. Yao a pɛlɛ ḿɛi.

⁶ Eî kɛ̀ ŋ́gôoŋ kɛ́ ƃò ḿâ yɛ̂ɛ tòloŋ, ŋ́âi pù kpɔ́ ŋá lí kwaa kôyaa ma ŋá ḿvii tɔ́ɔ.

⁷ Ŋ́âi kòoŋ kpɔ́ ŋá lí kwaa kôyaa ma, ŋá ŋátaai tɔ́ɔ vɛ̃ɛ-kpâlaŋ su.

⁸ Ŋ́âi ńâai kɛ̀ kpɔ́ m̀a a maa félaa, ŋá kúla vãai da vãa su kɛ́tɛi perei.

⁹ Óo Ǹuu-namui, ŋ́gbɔara ƃelai díkili-ŋa sîai su kara. Ŋa laa sâa da namu kâai daa-leei su.

¹⁰ Díkaa tínanîi naa a kpíni da fólo. Mɛni kpɔ̂lu da ŋwana-lɔɔ díkaa daa lêei su.

¹¹ Kwaa ma káraa káa nɔ́ kwaa kélee ma. Tɔɔ mâa da wôya mɛni kɛ́ɛ a bere-ŋai ma láa fɛ́ɛ.

¹² Eî kɛ̀ a ŋ́gbɔara nuu ƃêi kɛ̀ ɣɛ̂lɛi ḿâi, ŋ́âi pɔ̀ri ńyee seêi mu. Eî kɛ̀ a ǹúui nyíi dɔɔ̂i ḿâi ƃêi kɛ̀ ŋ̀óo siɣêi ḿâi, ŋ́âi pɔ̀ri ǹoôi mà.

¹³ Kɛ́lɛ, íkaa a ńâoi lɛ́lɛɛ, kwa yá kúkaa kwa tɔ̂nɔ ma.

¹⁴ Kwa yá kwa laoi-laa zɛ̀pɛ pù gîe ma, kúkɛ Ɣâla fɛ̀li gîe ma Ŋ̀âla-pɛrɛ Kɛ́tɛi mu.

¹⁵ Tɔ́ɔ ŋ́gbɔara-ƃelai dísaa, dísàa tãi é lɛ́ɛ pâi serîi. Tɔ́ɔ dílɛɛ a dífulu dí lí saa-taa. Ŋwana-lɔɔ káa dípɛrɛi mu da dílii su.

¹⁶ Kɛ́lɛ ŋá Yâwɛɛ Ɣâla marê kɛ́ a gɛɛ é kpɔŋ mâa tɛɛ ḿbɔ, ǹyaŋ a pâi ŋ́uŋ mâ ƃôi.

¹⁷ Ŋa wɔ̂lɔ m̀a a ɣele-wala, fólo-peneɛɛ da kpíni, ŋ́gɛ mɛni lâa ŋ̀ɛ́i, ǹyaŋ a pâi ŋ́oo su toôi.

¹⁸ A pâi lenêi pôlu a ńyãa nɛ́ŋ-kpɛrɛɛ, é ŋ́gula gɔ́i su nyii kwa ŋ́gbɔara-ƃelai kwa gɔ̂ii.

¹⁹ Ɣâla nyii gáa a kâloŋ wɔ́lɔ-wɔlɔi, a pâi ŋ́oo mɛnîi é díyee mɛi ɣále, kpɛ́ni fêi, dífe fáa ní ma a gɛɛ dí dímaa fáleŋ, dífa tèla yào mà.

²⁰ Ńâoi nyii kwa ǹyaa kúkɛ̀ kúkîe pôlui, a pɛlɛ ǹâoi-ni dîa. A ŋɔkono tée-ŋai síɣe dɔɔ̂i.

²¹ Ŋ̀óo kɔlɔ saâi ma yɛ̂ɛ núu ƃé wúlɔ kpelêi, kɛ́lɛ gáa a ƃɛlɛ-kpɛɛ goi-nuu ǹíi su. Ŋ̀óo è kɛ̀ a gɔlɔ saa mà yɛ̂ɛ núu ƃé wúlɔ kpelêi, kɛ́lɛ gɛ́ sɛŋ su tèe yɛ̂ɛ ƃóa-sɔ̂kpɔ ŋá-liɛɛ-ŋa.

²² Í mɛni kpɔ̂lu-ŋai tɛ́ɛ Yâwɛɛ pɔ́, gɛ̀ ní a pâi ímaa kɔ̃ɔ̂i. Vá ǹɛɛ naa dí diai dí deniŋ ƃoɔɔ̂i yée mɛi ɣále.

²³ Kɛ́lɛ, óo Ɣâla, ya pâi ǹúu-paa-ƃelai da ǹɛ́ɛ-kɛ-ƃelai paâi, dí saa tãi é lɛ́ɛ pâi serîi. Mɛni a kpèra ḿâ, ŋa pâi ŋ́gili tɔɔ̂i yâ.