Mąątɛ̨nɛ̨ 51 - Bible

Sɔnyɔ̂ŋ su mɛni lɛɛ maa Ɣâla fɛliɛɛ

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma tãi Ɣâla ŋɔlóno kɛ́-nuui Neetɔŋ è lòno la bɔ́ tãi è nyìi la a Bɛɛsibai

¹ Óo Ɣâla, ŋ́ɛi malôŋ káa yɛ̂ɛ berei íwɛli kɛ́-maai su kɛ̂tɛi lai. Ŋá sɔnyɔ̂ŋ wáa mî ḿâ yɛ̂ɛ berei ímaloŋ kâai su kɛ̂tɛi lai.

² Ŋá ŋwana-lɔ̂ɔ-tuai wáa mî ḿâ, ímaa wáa í ŋ́gula mî ŋásɔnyɔ̂ŋ su.

³ Ŋá ŋásɔnyɔ̂ŋ kɔ́lɔŋ. Ŋásɔnyɔ̂ŋ kíli káa ŋá.

⁴ Ŋá sɔnyɔ̂ŋ kɛ́ a yá, yá tɔnɔ nɔ́ ƃé ŋá sɔnyɔ̂ŋ kɛ́ a yá. Ŋá m̀ɛnii kɛ̂ nyii ya dòli a ŋwana-lɔ̂ɔ-tuai. M̀ɛni ma íŋa mɛnii ŋá tèe a zã́a. Ísɔŋ fé yá ŋá mɛnii ŋá téɛɛi mɛni ma.

⁵ É síɣe ḿaa-sɔlɔ ƃó tãi ma, ŋ́gaa nɔ́ a ŋwana-lɔ̂ɔ-nuu. É síɣe tãi mâ ńee è ḿaa kôo sìɣe lai, ŋ́gaa nɔ́ a sɔnyɔ̂ŋ nuu.

⁶ Teniŋ ƃô da tɔ̃yâ laa nɔ́ ƃé í ŋ̀wɛli ní. Ńíi láa fɛ̂ɛ a ítarei.

⁷ Ŋásɔnyɔ̂ŋ wáa ḿâ, gɛ̀ ní ŋa pâi kɛ̂i a ḿaa waa. Ŋ́waa ḿî, gɛ̀ ní ŋa pâi kɛ̂i fôloi yɛ̂ɛ yee-fũa.

⁸ Ǹɛ́ɛ naa ŋá lii-nɛ̃ɛ tuŋ mɛni, gɛ̀ ní ńii a pâi nɛ̃ɛ̂i. Ǹyaŋ berei máŋ ya ŋ́gîiŋ la ya ḿvũa-fũai, ŋa pâi lii-nɛ̃ɛ kulâi ŋɔ́nɔ a ɣele da.

⁹ Ŋásɔnyɔ̂ŋ-ŋai su mɛ̂ni lɛɛ, í ŋá ŋwana-lɔ̂ɔ-tuai wáa ḿâ.

¹⁰ Óo Ɣâla, ŋ́a kili-ŋa-siai kɛ́ a m̀aa waa, íteniŋ ƃô da mɔ̂leŋ nina tɛɛ ḿbɔ.

¹¹ Ífe ŋ́gbɛ̀ íŋɛi-tuɛ. Ífe Ímɔ̂leŋ Maa Waai kùla ǹyêei.

¹² Ǹíi nɛ̃ɛ̂i nyii a kûla íƃalo-laai sui tɛ́ɛ mî ḿbɔ. Ŋ́gili kúla a gɛɛ ŋá íwoo ŋàa sèe kɛ́.

¹³ À kɛ̀ tí, ŋa pâi ítɔ̂ŋ lɛ̂i zɔnyɔ̂ŋ-ƃelai dîa,. A kɛ̀ tí da pâi tínanîi ípɔ naa pere.

¹⁴ Óo Ɣâla, ŋ́gula mî núu paa mɛni su íŋuŋ ma ƃó. Gɛ̀ ní ŋa pâi ítɔ̃yâ laa maa-tuŋ tôoi a lii-nɛ̃ɛ-pere.

¹⁵ Ǹuu-namui, kpɔŋ-maa tɛɛ ḿbɔ ŋá lóno. Gɛ̀ ní ŋa pâi ílaa maa tɛ̂i.

¹⁶ Ífe sâla kúlaa wɛ̂li-ni, gɛ̀ ní ŋ́âi pɔrîi sâla kulâi yâ. Kéreŋ-sala fa ílii làa.

¹⁷ Óo Ɣâla, zâlai nyii a ílii laai ƃa núu tûaa a maa yêŋ-pere. Ífa íyee kùla ǹúui mù nyii a ǹíi pène, m̀aa yeŋɔɔi.

¹⁸ Óo Ɣâla, tûa a Zãiyɔŋ a ǹɛ́lɛɛ íkpɔŋ m̀a. Zĩɣaŋ tɔ́ɔ ŋɔ́nɔ pôlu í dínaŋ Zerusâlɛŋ ma.

¹⁹ Gɛ̀ ní ŋa pâi kúkereŋ sala da sâla da kpɛ́ni-ŋa kulâi yâ nyii a ílii laai. Ŋa pâi niŋa sîrɛ-ŋa kulâi a sala íɣâla teƃelei ŋá.