Mąątɛ̨nɛ̨ 49 - Bible

Núu kíli tɔ̂ɔ ŋɔtɔɔ-sãai dîa káa nɔ́ a ƃoo mɛni

Kora ǹônii-sinaai díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai

¹ Ŋánûa, ka káwoli tɔ́ɔ m̀ɛnii ŋí ma. Káai ŋ̀éniɛi gwaa kéleei, ka káwoli tɔ́ɔ.

² Ka káwoli tɔ́ɔ núu kpaya-kpaya da bɛlɛ-pɛlɛɛ, tɔɔ-ƃela da kôlo-ƃela.

³ Ŋa pâi lônoi kápɔ a zu ponoɔɔ a táre pere.

⁴ Ŋa pâi lônoi kápɔ sãŋ-woo-ŋa su, ŋá ŋ̀á lɛ́ kâa kɔnîŋ-woo-ŋa su a gɛɛ ká zu kula.

⁵ Fé yaôi mɛni kpɔ̂lu da kélee ma, berei máŋ ŋ́gbɔara-ƃelai tínaŋɔ̂ɔi la ḿâi.

⁶ Díkaa a núu sɔŋ nyɔ́mɔɔ-ŋa. Díkili tɔɔ̂i nɔ́ díkɔ̃liŋ-ŋai dîa, díkɛ yoŋka tèe a dîa.

⁷ Tɔ̃yâ ma núu da fa pɔ̂ri gbîŋ ŋuŋ ma ƃôi. Núu da fa pɔ̂ri ŋɔfúlu-laai vela-fei kɛ̂i Ɣâla yêei,

⁸ kpɛ́ni fêi, núu-kpune ŋɔfúlu-laai sɔ̃ɔ kɛ̂tɛi. Tɔɔ sɛŋ da sɔ̃ɔ fé gula kɛ̂ɛ ƃó ní ǹyá mɛni ma.

⁹ Tɔɔ sɛŋ da fa pɔ̂ri núu kɛ̂i va sâa, gɛ́ ƃò nɔ́ ɣele ma wɔ́lɔ-wɔlɔ da wɔ́lɔ-wɔlɔ.

¹⁰ Táre nuu a sâa, ƃoo nuu ǹyaa máŋ gɛ́ sàa. Díkelee díkɔ̃liŋ a lɛ̂ɛ nûa da kpɛ́ni-ŋa yêei.

¹¹ Dípɔ-taai ƃa m̀olôŋ su. Nàa ƃé da pâi kɛ̂i naa wɔ́lɔ-wɔlɔ da wɔ́lɔ-wɔlɔ, berei máŋ díkɛ la ɣele ma díkpɔɔi yee mai.

¹² Núu da ŋɔtɔɔ-sãa fa pɔ̂ri gulâi saa yêei. Núu kélee a pâi saâi nɔ́ yɛ̂ɛ berei sua-ŋa da sâa lai.

¹³ M̀ɛnii ŋí ƃa kɛ̂ a diai díkili tɔɔ̂i díkɔ̃liŋ mai, da dípôlu-ƃelai.

¹⁴ Díkaa yɛ̂ɛ ƃála-ŋa. Saa ƃa dímɛi káa-nuu, gɛ́ díteniŋ tɔ̀ɔ m̀olôŋ su. Deniŋ ƃô-ƃelai da pâi kɛ̂i siâi díƃolôŋ mɛi a ɣele-wala díkpono kɛ́ ƃò ǹɔii mu pere póŋ-poŋ gɛ́ lùla m̀olôŋ su saa táa.

¹⁵ Kɛ́lɛ Ɣâla a pâi ŋ́uŋ maa ƃôi, é ŋ́gula saa ŋɔwála-wala-laai yêei.

¹⁶ Núu da a tɔ̀ɔ, m̀aa mɛ̂ni fé ílii sɛ̀lɛŋ, a nɛ̃ɛ ma kpîŋ maa nuui ŋɔtɔɔ-laai su é kɛ́tɛ.

¹⁷ A sàa vé pâi liî a dia. Dífe pâi ǹoôi a gɔ̃liŋ.

¹⁸ Tãi gáa la ɣele mai, ǹíi lâai. Nûa da pâi ǹáa maa tɛ̂i nɔ́ a kɛ̀ dûa pere lɛ̂lɛɛi.

¹⁹ A sàa a lî ŋɔnúu pɔ̂lɔ-ŋai pɔ́ naa, ƃɛ́i ǹaa kpîniɛi wɔ́lɔ-wɔlɔ da wɔlɔ-wɔlɔ.

²⁰ Núu ŋɔkɛ́tɛ-laai fa ŋ̀uŋ ma ƃò saa yêei. Núu-kpune a sâa nɔ́ yɛ̂ɛ bere sua-ŋa da sâa lai.