Mąątɛ̨nɛ̨ 48 - Bible

Zãiyɔŋ ƃa Ɣâla ŋɔtaa-leei

Kora ǹônii-sinaai díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai

¹ Yâwɛɛ kɛ̂tɛi. Gɛ̂tɛi, fɛ̂ɛ nûa dí ǹáa ma tɛ́ kpɔ́ a ŋ̀ánaa Ɣâla ŋɔtaa-lee kɛ́tɛi su ǹyée maa waai ma.

² Ɣâla ŋɔyéei Zãiyɔŋ tɔɔ̂i a ŋ̀ánaa, maa waa. Gâloŋ kɛ́tɛi ŋɔtaa-leei a pâ a lii-see ŋ̀éniɛi su-ƃelai pɔ́, díkɛ koi-nɛ̃ɛ kula.

³ Ɣâla a ǹɛ́ kûa a gɛɛ a pɔ̂ri kúŋuŋ ma ƃôi daa-lee maa kónaŋɔɔi su.

⁴ Gâloŋ-ŋai dí díwoo pù gîe ma, dí pá a gɛɛ dí kɔ́ pɛ́lɛ Zãiyɔŋ ma.

⁵ Kɛ́lɛ díkɛɛ da gáai, dí yào dí pú pôlu.

⁶ Dí kɛ̀ yaôi, díkɛ kpɛ̃liŋ yɛ̂ɛ nɛnî ƃé koi-tee su.

⁷ Dí kɛ̀ kpɛ̃lini yɛ̂ɛ yá ŋá-keleŋ-ŋa ƃé fãa kpɛ́ɛ pôlu a kɛ̀ lókwa-lokwai dîa.

⁸ Kú m̀ɛnii mɛ̂ni Ɣâla a gɛ̀i, ǹyaŋ kwaâ naa káa Yâwɛɛ, Ŋ̀wála-wâla kélee Ɣalai ŋɔtaa-leei su. A pâi naa maa kɔ̃ɔ̂i wɔ́lɔ-wɔlɔ da wɔ́lɔ-wɔlɔ.

⁹ Ípɛrɛ Kɛ́tɛi mu ƃé, óo Ɣâla, kwa kúkili ŋá sia naa é pîlaŋ íwɔlɔ-wɔlɔ da wɔlɔ-wɔlɔ wɛli kɛ́-maai ma.

¹⁰ Nûa da ílaa maa tɛ̀ kwaa kélee ma. Íkɛtɛ-laai maa mɛ̂ni duŋ káa ŋ̀éniɛi gwaa kélee ma. Ya nûa mɛi kâa a tɔ̃yâ-pere.

¹¹ Gɛ́ Zãiyɔŋ-ƃelai líi é nɛ̃ɛ. Ya nûa dímɛni ŋá tèe a tɔ̃yâ-pere. Gɛ́ Zuda-ƃelai dí koi-nɛ̃ɛ kula daa-lee-ŋai su Zuda kpiniŋ su.

¹² Ɣâla ŋɔnûai, ka tínaŋ Zãiyɔŋ ma, ká ǹyeŋkêŋ-ŋai lóno.

¹³ Ka ziɣãŋ-ŋai káa dí tínaŋɔ̂i daa lêei mai, ká ziɣãŋ-ŋai maa kpɛ́ɛ dínaŋɔ̂i bɛ́rɛ-ŋai dîai, a gɛɛ ká m̀ó diai dîa pâi lɛ̂ɛi naa tínaa tuɛ perei kâai,

¹⁴ “Ɣâla ŋí káa a Kuɣâla wɔ́lɔ-wɔlɔ da wɔ́lɔ-wɔlɔ. A pâi kɛ̂i kúteniŋ tɔɔ̂i tãi nɔ́ kúkaa la ɣele mai.”