Mąątɛ̨nɛ̨ 46 - Bible

Ɣâla káa kúkɔlɛ

Kora ǹônii-sinaai díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai

¹ Ɣâla ƃa kúmaa kɔ̃ɔ-nuui. Ǹyaa ƃa gɛ̀ kúkponôi é kpanaŋ. Gbîŋ kpɛtɛɛi a tãi kélee a gɛɛ é kpɔ́ŋ mâa tɛɛ kúpɔ kwa kɛ̀ mɛni kpɔ̂lu su.

² M̀ɛni ma, kúfe pâi yaôi a nɛ̃ɛ ma kpîŋ ǹɔii kɛ́ kpɛ̃liŋ, ǹyée kpaya-kpayai díkɛ tòo yúo su díkɛ yèŋ gbôŋ ma,

³ kpaa máŋ ǹyúo-ŋai díkɛ tòo díkɛ fule-fule, ǹyée pɛlɛ-pɛlɛɛi díkɛ ƃùleŋ díkɛ tòo a wála-wala laa.

⁴ Ya-lee da káa naa nyii a pâ a lii-nɛ̃ɛ ǹûai pɔ́ Ŋ̀âla Kɛ́tɛi ŋɔtaa-lee kɛ́tɛi su ƃɛ̂i ŋɔpɛ́rɛ kɛ́tɛi káa naai.

⁵ Ɣâla káa daa-lee kɛ́tɛi tí su. Núu da fé pâi wɔ́lɔ naa su-karai. A pâi pâi a ɣele ƃɔ̂i kpini é kpɔŋ mâa tɛɛ bɔ́.

⁶ Lɔii-ŋuŋ-ŋa díkaa túmo-tumoi, kâloŋ-laa-ŋa díkɛ́ kpɛ̃liŋ. Ɣâla è lòno, ŋ̀óo kɛ́ ƃò yɛ̂ɛ ŋ̀ele-gbana, ǹɔii ŋûŋ-ŋai díkɛ sèɣeŋ.

⁷ Ŋ̀wála-wâla kélee Yâwɛɛi káa kúkɔlɛ ma. Zeeka Ŋɔɣâlai ƃa kúŋuŋ ma ƃó-nuui.

⁸ Ka pá ka m̀ɛni-ŋai káa Yâwɛɛ a gɛ́i. Ka m̀ɛni mĩli-mili-ŋai káa a gɛ́ ǹɔii mai.

⁹ A kɔ́ mɛni-ŋa kpera ŋ̀éniɛi gwaa kélee. A gerâŋ-ŋai su ɣále-ɣale, a gbála-ŋai su-kara, a gbála ŋá ɣále kɔli-ŋai kéreŋ.

¹⁰ Ɣâla a m̀ôi ǹyɛɛi, “Ka kpera kɔ̂i kákîe-ni pɔ́. Ka gɔ́lɔŋ a gɛɛ ńyãa ƃa Ɣâla. Ŋáwala-wala-laai káa ǹɔii-ŋûŋ-ŋai kélee mɛi ŋ̀éniɛi su.”

¹¹ Ŋ̀wála-wâla kélee Yâwɛɛi káa kúkɔlɛ ma. Zeeka Ŋɔɣâlai ƃa kúŋuŋ ma ƃó-nuui.