Mąątɛ̨nɛ̨ 42 - Bible

Gɔlɔi-kpuai veerɛi (42:1--72:20) Kɔ sôŋ-laa su-nuu ŋɔɣâla fɛli-wooi

Kora ǹônii-sinaai díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai

¹ Berei kpele-wɛli a pîlaŋ sua sòŋ la gɛ́ yá kɛ̂i kɔ̀ri a gɛɛ é gbele lai, bere nɔ́ ƃé Ŋáɣâlai maa mɛ̂ni kpáaŋ káa la ḿâ.

² Gɛ̀-ɣele ma Ɣalai, ímaa mɛ̂ni gbáaŋ káa ḿâ. Lé ɣele ƃé ŋa pâi ŋ́ɛi lâai la yâi?

³ Ŋa wɔ̂lɔi yâ a fólo da kpíni. Ŋ́ɛi-ya a kɛ́ nɔ́ a ŋ́gɔnɔŋ. Ŋ́gbɔara-ƃelai da kɛ́ nɔ́ ḿarê kɛ̂i dîɛ ḿâi, “Mí kpîŋ ƃé Íɣâlai káa naai?”

⁴ Ŋa ŋ́gili ŋá sìa é pîlaŋ ŋ̀ele-ŋai dîa ŋá kâa kɛ̀ ḿarâai téniŋ tɔɔ̂i la kúkɛ lɔ̀ Ɣâla ŋɔpɛ́rɛi mui, ńii a tòo pôlu a ŋ̀ánaa. Berei da kâa kɛ̀ Ɣâla láa ma tɛ̂i la ɣelêi perei, maa koi-nɛ̃ɛ wooi tíŋ káa niî ŋ́ôlii.

⁵ Ŋa malôŋ see ƃôi lé mɛ̂ni ma? Ńii a kɔ́ kɔ̂i lé mɛ̂ni ma? Ŋa pâi ŋ́gili tɔɔ̂i Ɣâla ma, ŋá ǹáa ma tɛ́ ŋɔ́nɔ. Ǹyaa ƃa ŋ́uŋ ma ƃó-nuui da Ŋáɣâlai.

^6-7 Tãi ŋá kɛ̀ la gɔ-soŋ-laai sui, ŋá ŋ́gili ŋá sìa é pîlaŋ m̀a. A gɛ́ maloŋ too maa a pá ḿbɔ yɛ̂ɛ yá ŋɔzikɛ-zikɛ, ŋa kɛ́ wúlee yɛ̂ɛ ya-fɛ̂ɛ tíŋ. Gáa yɛ̂ɛ súluŋ ƃé kulâi Zɔdiŋ Ya-leei tôŋ ma Ɛmɔŋ Yeei da Miza yeei loai.

⁸ Yâwɛɛ è ŋ́wɛlini a kpíni da fólo. M̀ɛni ma, ŋa ǹáa ma tɛ́ wule tòo a kpíni da fólo ŋ́gɛ Ŋáɣâlai fɛ̂li nyii fúlu-laa tɛ̀ɛ ḿbɔi.

⁹ Ŋá wɔ̀lɔ Ŋáɣâlai ma nyii gáa a ḿaa kɔ̃ɔ-nuu da ŋákɔnii ńyɛɛ, “Ya nia ḿâ lé mɛni ma? Ya ǹɛɛ̂i naa ŋ́gbɔara-ƃelai díkɛ tùa ŋí a ńyãa a dáre kɛ́ɛ ŋí ŋ́gɛ mɔ̃lɛ lé mɛni ma?”

¹⁰ Ŋa mɔ̃lɛ̂i a ŋ̀ánaa. Kɛ́lɛ ŋ́gbɔara-ƃelai díkaa nɔ́ ɣɛ́lɛ maa kulâi ŋ́gbonôi díkɛ m̀o ḿâ dîyɛɛi, “Mí kpîŋ ƃé Íɣâlai káa naai?”

¹¹ Ŋa malôŋ see ƃôi lé mɛni ma? Ńii a kɔ kɔ̂i lé mɛni ma? Ŋa pâi ŋ́gili tɔɔ̂i Ɣâla ma ŋá ǹáa ma tɛ́ ŋɔ́nɔ. Ǹyaa ƃa ŋ́uŋ ma ƃó-nuui da Ŋáɣâlai.