Mąątɛ̨nɛ̨ 40 - Bible

Laa maa tɛ̂ wule

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Ŋa Yâwɛɛ maa kpɛ́ŋ a lii kpêle pere. A ŋ̀óli tɔ́ɔ ḿâ a kpɔŋ ḿâ.

² È ŋ́gùla lóa kpóŋ kôya su nyɔ́mɔɔ da su. Ǹóai ŋí láa è kɛ̀ a vɛ́ɛ a sãâ nyɔ́mɔɔ tee-têe. È ŋ́gùla naa ŋá tɔ́ɔ kɔni ŋá. Sɛŋ da yée fa ŋɔ́nɔ pɔ̂ri ḿâ.

³ È wule nîna too pêre lɛ̀ ḿâ. È Kúɣâlai láa ma tɛ́ wule too pêre lɛ̀ ḿâ. Diai kélee pâi ŋ̀ulei ŋí mɛnîi da pâi yaôi, dí láa a Yâwɛɛ.

⁴ Lûwa káa diai dîa da lâa a Yâwɛɛ. Lûwa káa diai dîa dífa lâa a ɣâla pɔkɔɔŋ-ŋa maa mɛ̂ni, kpaa máŋ dí pîlaŋ diai pôlu da ɣâla pɔkɔɔŋ-ŋa fɛlii.

⁵ Óo Yâwɛɛ Ŋáɣâlai, ya mɛni lɛ́lɛɛ támaa kɛ́ kûɛ. Núu da fé naa zeriɛɛ ípɔ. Ya mɛni mĩli-mĩliɛɛ támaa kpɛ̀tɛ kúmɛni ma. M̀ɛni-ŋai ya gɛ̀ kûɛi fa pɔ̂ri gélee ƃôi, kpɛ́ni fêi, dítâmaai, dí mĩli-mĩliɛɛ.

⁶ Kúsâla sãai da kúsama-sãai da fa ílii làa. Ífa kúmarê kɛ̀ kéreŋ-sala da sɔnyɔ̂ŋ sala-sãa mɛni ma. Kɛ́lɛ ya gɛ́ ńii a kula, ŋ́gɛ ŋ́oli tɔ̀ɔ yâ, ŋ́gɛ íwoo mɛni.

⁷ Nya ƃe ŋá íwoo su tòo ńyɛɛ, “Ŋa pá, ńyãa ká ŋí. M̀ɛni-ŋai kélee í mò ḿâ a gɛɛ ŋá gɛ́i, gélee pɔ̃yɛɛ̂i Dɔ̂ŋ Kɔlɔi su.

⁸ Óo Ŋáɣâlai, ŋá ŋ̀wɛ̂lii ŋá ínîa mɛni kɛ́. M̀ɛnii ya ǹɛ ḿâi fa ǹia da ma. Ŋa gélee lâai kɛ̀ ŋ́gili ŋá.”

⁹ Yâwɛɛ, ƃɛ́i kélee ínûai da díŋaa tɛ̀ naa gîe mai, ŋa m̀o dîa a gɛɛ yá nɔ́ ƃa kúŋuŋ ma ƃó nuui. Í gɔ́lɔŋ a gɛɛ fé pâi wɔ́lɔ kperâi duŋ lɛ́lɛɛi ŋí ƃôi nûa dîa.

¹⁰ Fé tá ŋ̀uŋ ma ƃô tuŋ lɛ́lɛɛi ŋí loo ní ǹûai dîa. Ŋ́gaa kpɔ́ wɔ́lɔ íteniŋ ƃô-laai da íkpɔŋ mâai maa mɛni ƃôi nûa dîa. Ƃɛ́i kélee ínûai da díŋa tɛ̀ naa mai, ŋa duŋ lɛ́lɛɛi ŋí ƃò dîa, fa ḿɛi sâa.

¹¹ Yâwɛɛ, ŋá gɔ́lɔŋ ya pâi wɔ́lɔ kɛ̂i nɔ́ ḿaloŋ kâai. Ya ḿaa kɔ̃ɔ íwɛli kɛ́-maai da íŋuŋ maa ƃô-laai sârai.

Ɣâla fɛliɛɛ kpɔŋ mâa mɛni ma

¹² Mɛni kpɔ̂lu a tínaŋ ḿâ. M̀ɛni kpɔ̂lu-ŋai ŋí tâmaai zu kɛ́tɛ! Ŋásɔnyɔ̂ŋ su a kɛ́tɛ fé gélee kɔ́lɔŋ. Fa pɔ̂ri ŋɔ́nɔ kwaa kâai. Ŋásɔnyɔ̂ŋ a táma a tɛɛ ŋ́uŋ lêɣa ma. Ńii toɔɔ̂i kpɔ́ pôlu a ŋ̀ánaa.

¹³ Ŋ́uŋ ma ƃó, óo Yâwɛɛ. Óo Yâwɛɛ, kpɔŋ ḿâ a maa félaa.

¹⁴ Tɔɔ diai kɔ̂i a gɛɛ dí ŋáfulu-laai su láŋ, díkili ŋá é pú, ŋumɛ é dí sóŋ. Tɔɔ diai dílii nɛ̃ɛ̂i ŋámɛni kpɔ̂lui mɛni mai, ƃaa kûla-maa é sɛ̂lɛŋ dîa dí pú.

¹⁵ Tɔɔ diai da ɣɛ́lɛ maa kûla ŋ́gbonôi, dí ƃɛ́lɛ é tóo.

¹⁶ Tɔɔ diai da pâ ípɔi, í lii-see tɛɛ dípɔ díkɛ koi-nɛ̃ɛ kùla. Tɔɔ diai kélee yâ díƃalo, díkɛ sɛɣɛ̂ fêi tɛɛ̂i ípɔ m̀ɛni ma, díkɛ m̀ôi dîyɛɛi, “Yâwɛɛ kɛ̂tɛi!”

¹⁷ Óo Ǹuu-namui, ŋ́goloɔ̂i, pɔ̂ri mâa fé mî. Kɛ́lɛ ífe tá nia ní ḿâ. Yá ƃa ŋ́uŋ ma ƃó-nuui da ḿaa kɔ̃ɔ-nuu. Óo Ŋáɣâlai, pá íkpɔŋ ḿâ a maa félaa.