Mąątɛ̨nɛ̨ 4 - Bible

Ɣâla fɛliɛɛ a ɣele-wûlii kpɔŋ mâa mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ dòo a ɣale-sãai

¹ Ŋa ítôli, ŋ́oo su too, óo ḿaa kɔ̃ɔ Ɣalai! Tãi ŋá kɛ̀ la mɛni kpɔ̂lu sui, í ŋ́uŋ ma ƃò. Ḿalôŋ káa, í ŋáfɛli-wooi mɛ́ni.

² Núu-kpune-ŋa, tãi ɣɛɛlu ƃé ka pâi kɛ̂i ƃâa kulâi la ḿâi? Tâi ɣɛɛlu ƃé ka pâi kɛ̂i káwoli tɔɔ̂i la mɛni fôlo da lɛ́ɛ mɛni-ŋa dîai?

³ Ka gɔ́lɔŋ a gɛɛ Yâwɛɛ a dɔ̃yâ-nuui síɣe zu. Ŋà dòli, a ŋ́oo mɛni.

⁴ Káfe nɛ̀ɛ naa kálii-ŋwânai é gɛ́ ká píli sɔnyɔ̂ŋ su. Ka kákili ŋá sía kpɔ́ a gbanaŋɔɔ é pîlaŋ m̀ɛnii ŋí ma tãi ka kɛ̀ lâani la kágbìŋ-ŋai ŋá kámɛi saai.

⁵ Ka sâla-ŋa kula Yâwɛɛ ma a tɔ̃yâ-pere, ká láa la.

⁶ Núu da-ŋa da kɛ̂ Ɣâla fɛlîi dîyɛɛi, “Óo Yâwɛɛ, ǹɛɛ naa kú mɛni lɛ́lɛɛ sɔlɔ ƃó. Í kúmaloŋ káa.”

⁷ Ǹii-nɛ̃ɛi yâa dɛɛ ḿbɔi, dɛɛ̂i kpîŋ kúkpɔara-ƃelai díwɔ̂i ma tãi mii-sãa támaa è kɛ̀ la díyêei da ŋwã̂ai.

⁸ Ŋa pâi lâai ŋá nyíi lii-see su. Óo Yâwɛɛ, yá tɔnɔ nɔ́ ƃa gɛ̀ ŋ́gɛ ƃò ŋuŋ ma ƃô su.