Mąątɛ̨nɛ̨ 38 - Bible

Ǹúui mɔ̃lɛi ŋɔɣâla fɛli-wooi

Deeƃé ŋɔwɔ́lɔ maa wulei è dòoi

¹ Óo Yâwɛɛ, ífe ílii ŋwana ḿâ í ŋ́gula maa kɛ́.

² Ya ḿoŋ a ítɔ̃a-ŋai ya ńdoo ǹɔii ma.

³ Ŋa mɛni soli ŋánaa kâai, kpɛ́ni fêi, ílii ŋwânai ḿâ. Ŋa mɔ̃lɛi ŋásɔnyɔ̂ŋ su.

⁴ Ŋásɔnyɔ̂ŋ su a kɛ́tɛ, ŋ̀uyɛ a tɛɛ ŋ́gbono ma.

⁵ Ŋá ƃooi a gɛ́ ḿaa pala su a kɛ́tɛ a lûla gúŋ kɛ́ tɛ̀.

⁶ Sɛŋ sôli maa a ŋ́gbono kpĩlaŋ, ḿaa pɛlɛɛ. Ŋ́gaa nɔ́ maloŋ too-maa su a ɣele kélee.

⁷ Ŋ́gɔlɔ fãâi ḿâ kpɔ́ a ŋ̀ánaa, naa a lɛ̀ɛ a guro ŋá sáa.

⁸ Sɛŋ sôli maa a lɛɛ ŋ́giɣîni kɔlɔ a kpɛ̂ɛ ḿâ. Zɛŋ sôli maai a gɛ́ ńii kɛ́ kɔ-kɔ ŋ́gɛ nyĩɣɛ.

⁹ Óo Ǹuu-namui, í ńîa mɛni kɔ́lɔŋ, íkɛ ńyĩɣɛ-woo mɛ̀ni.

¹⁰ Ńii a ńokwâi, kɔlɔ kpɛɛ ḿâ, ŋ́ɛi fa ŋɔ́nɔ kwaa kâa a ǹɛ́lɛɛ.

¹¹ Ŋáwɛli kɛ́ maa-ƃelai da ŋ́gɔlɛ ma-ƃelai da fé ŋɔ́nɔ lɛɣɛ̂i a ńyãa, kpɛ́ni fêi, pala támaa káa ḿâ. Ŋálee kaa-ƃelai kpîŋ da dímaa kôya ḿâ.

¹² Ŋ́gɔara-ƃelai da ƃáre-ŋa tɛ̂i ḿberêi, diai ŋ̀wɛ̂lii dí mɛni ŋánaa kɛ́ a ńyãai, díkɛ ḿaa yao woo-ŋa ƃò. Nûa tɔɔ̂i ḿâ díkɛ kpɔ́ nɔ́ gbã tèe ḿberêi.

¹³ Ŋa kɛ́ nɔ́ yɛ̂ɛ woli tîniŋ nuu. Ŋ́oli fa ŋɔ́nɔ mɛni da kélee mɛ̀ni. Ŋ́gaa nɔ́ yɛ̂ɛ mugbɛ nuu. Fa ŋɔ́nɔ pɔ̀ri lônoi.

¹⁴ Ŋa kɛ́ nɔ́ yɛ̂ɛ ǹúui va m̀arâa wóo su tooi, kpɛ́ni fêi, ḿva kɛ́ m̀ɛnii mɛ̂nii da kɛ́ m̀ôi ḿâi.

¹⁵ Kɛ́lɛ, óo Yâwɛɛ, yá nɔ́ ƃé ńâai a yá ŋ́gɛ ímaa kpɛ̂ŋ. Óo Yâwɛɛ Ŋáɣâlai, yá nɔ́ ƃé pâi ŋ́oo su toôi.

¹⁶ Ŋa ímarê kɛ̂i a gɛɛ ífe ǹɛɛ naa ŋ́gɔara-ƃelai dí koi-nɛ̃ɛ kula ŋámɛni sôlii mɛ̂ni ma. Ífe ǹɛɛ naa dí kɛ́ yoŋka tèe ḿɛi, kpɛ́ni fêi, ŋa too mù.

¹⁷ Ŋâa pá toôi. Zɛŋ sôli maai ḿâi ŋ̀á fa yêŋ.

¹⁸ Ŋa ŋásɔnyɔ̂ŋ ƃó, malôŋ a too ḿâ m̀ɛni ma.

¹⁹ Ŋ́gbɔara-ƃelai kɔlɔi ponôɔɔi, díwala-walaa. Núu támaa da ŋ́gbɔ̀ara sâpo da kélee fé díyêei.

²⁰ Diai da mɛni lɛ́lɛɛ su tòo a mɛni nyɔ́mɔɔi, dí tɔɔ̂i ḿâ ŋásɔŋ lɛ̂lɛ-laai mɛ̂ni ma.

²¹ Óo Yâwɛɛ, ífe íyee kùla ḿû. Ífe ímaa kôya ḿâ, Ŋáɣâlai.

²² Óo Ǹuu-namui, ŋ́uŋ ma ƃó-nuui, pá a maa félaa í kpɔ́ŋ ḿâ.