Mąątɛ̨nɛ̨ 37 - Bible

Ŋ̀wana-lɔ̂ɔ-ƃelai da zɔŋ-lɛ́lɛ-ƃelai dí mɛnii kɔ̃yɛ̂ŋ mâ

Deeƃé ŋɔwulei

¹ Ílii fé tòo pôlu ŋ̀wana-lɔ̂ɔ-ƃelai tûa pere nyɔ́mɔɔi mɛni ma. Ífe tólo kùla m̀ɛni nyɔ́mɔɔ kɛ́-ƃelai dîa.

² Nàa fé pâi tûai díkɛ làŋ. Dímaa mɛ̂ni káa nɔ́ yɛ̂ɛ wúru-poa nyii fólo fa tûa gbâlai fãa é tɛ́ɛ lai. Da pâi saâi nɔ́ yɛ̂ɛ wúru a fɔ̃ya.

³ Ye láa a Yâwɛɛ í mɛni lɛ́lɛɛ kɛ́, a gɛɛ í kɛ́ ƃò ǹɔii ma íŋuŋ ma ƃóɔɔ.

⁴ Yâwɛɛ wɛ́li. Zãai ǹɛ̂lɛɛi ímɛni mai, a pâi dɛɛ̂i ípɔ.

⁵ Íkpîŋ tɛɛ Yâwɛɛ pɔ́. Láa la, ǹyaŋ a pâi kpɔŋ mâa tɛɛ̂i ípɔ.

⁶ A pâi gɛ̂i íteniŋ ƃô-laai kɛ́ fòlo yɛ̂ɛ vóloi.

⁷ Ílii kpéle í Yâwɛɛ maa kpɛ́ŋ. Ílii fé sɛ̀lɛŋ diai mɛ̂ni ma díkɛ mɛ̂ni a ƃûu ƃoi, kpaa máŋ diai mɛ̂ni ma dímɛni kpɛtɛɛ nyɔ́mɔɔ-ŋai ŋ̀aa-see a kɛ̂i.

⁸ Ílii fé sɛ̀lɛŋ kpaa máŋ í ílii ŋwána. Lii-sɛlɛŋ da lii-ŋwana da gɛ̀ núu kɛ́ ƃò mɛni kpɔ̂lu su.

⁹ Diai dílâai a Yâwɛɛi, dia ƃé ǹɔii a pâi lɛɛ̂i a dípɔɔ. Kɛ́lɛ Yâwɛɛ a pâi ŋ̀wana-lɔ̂ɔ-ƃelai kpɛ̂i ǹɔii ma.

¹⁰ Ŋ̀wana-lɔ̂ɔ-ƃelai da pâi lânii. Ya pâi díkɔ̂rii, kɛ́lɛ ífe pâi díkâai ŋɔ́nɔ a dɔnɔ kpîŋ.

¹¹ Diai da díkpîŋ maa yêŋ, ǹɔii a pâi lɛɛ̂i a dípɔɔ. Da pâi ǹɔii wúlɔ kpelêi dí kɛ́ ƃò lii-see su.

¹² Ŋ̀wana-lɔ̂ɔ-ƃelai da gbã tèe ǹúu lɛ́lɛɛ-ŋai perêi, díkɛ dísĩa mìi a dia.

¹³ Kɛ́lɛ Yâwɛɛ a kɛ̀ nɔ́ ɣɛ̂lɛi dîa, kpɛ́ni fêi, dísu kara ɣelei maa fé ŋɔ́nɔ kôya ní.

¹⁴ Ŋ̀wana-lɔ̂ɔ-ƃelai da díƃoa sɔkpɔ-ŋai kúla daai dí díkerâŋ-ŋai ŋá tɛ́, a gɛɛ dí gôlo-ƃelai da diai pɔ̂ri mâa fé dîɛi páa la, dí dɔ̃yâ mɛni kɛ́-ƃelai su tée-tee a gbua-kpua.

¹⁵ Kɛ́lɛ nûa da pâi dípaâi a díkpɔɔi kɔli-sãai ŋí, dí díkerâŋ-ŋai su tée-tee.

¹⁶ Sɛŋ lôŋ lɛ́lɛɛ kɛ́ɛ teniŋ ƃô-nuu yêei lɛ̂lɛɛi é tɛ́ɛ la ŋ̀wana-lɔ̂ɔ-ƃelai kɔ̃liŋ su kɛ́tɛ ma,

¹⁷ kpɛ́ni fêi, Yâwɛɛ a pâi ŋ̀wana-lɔ̂ɔ-ƃelai díwala-walai-laai kulâi díyêei, kɛ́lɛ a pâi ǹúu sɔŋ lɛ́lɛɛ-ŋai maa kɔ̃ɔ̂i.

¹⁸ Diai da Yâwɛɛ wóo mɛnii, a pâi kɛ̂i a gbáaŋɔɔ dímɛni ma. Ǹyaŋ ǹɔii a pâi kɛ̂i a dípɔɔ wɔ́lɔ-wɔlɔ da wɔlɔ-wɔlɔ.

¹⁹ Da fé pâi wɔ́lɔ mɔ̃lɛi a nɛ̃ɛ ma kpîŋ ɣele ma é kpanaŋ. A nɛ̃ɛ ma puru su kɛ́tɛ é tóo díkɔnɔŋ fé pâi wɔ́lɔ kpɛɛ̂i.

²⁰ Kɛ́lɛ ŋ̀wana-lɔ̂ɔ-ƃelai da pâi saâi. Yâwɛɛ kpɔara-ƃelai da pâi lânii yɛ̂ɛ wúru pôa-ŋa. Da pâi lânii nɔ́ yɛ̂ɛ luru a tàa.

²¹ Ŋ̀wana-lɔ̂ɔ-ƃelai da kpa sòŋ dífa dèe, kɛ́lɛ deniŋ ƃô-ƃelai yée lá ƃóɔɔi sɛŋ tɛɛ mɛ̂ni ma.

²² Diai Yâwɛɛ a lûwa làa dîai, dia ƃé ǹɔii a pâi lɛɛ̂i a dípɔɔ. Kɛ́lɛ diai a pâi dínaɣaŋ laai, a pâi díkpɛ̂i ǹɔii ma.

²³ Yâwɛɛ a nûa teniŋ tɔ̀ɔ yɛ̂ɛ berei a ŋ̀wɛ̂lii dí sía lai. Diai da ǹîa mɛni kɛi, gɛ́ dímaa kɔ̃ɔ.

²⁴ Da tòo, a dímu sîɣe, kpɛ́ni fêi, Yâwɛɛ a pâi kpɔŋ mâa tɛɛ̂i dípɔ.

²⁵ Ŋá kɛ̀ a nyáŋkpa, kɛ́lɛ ŋa nâa pɔlɔ. Fé tá wɔ́lɔ gàa ní Yâwɛɛ é ǹyée kúla ǹúu sɔŋ lɛ́lɛɛ-ŋai da mu, kpaa máŋ díta ǹóŋ é tɔ́ɔ núu da mãa lá mii-sɛŋ mɛni ma.

²⁶ Díyee lá ƃoɔɔ̂i nɔ́ nûa perêi a ɣele kélee. Da sãa tɛ̀ɛ dípɔ kpɛ́ni-kpɛni, díkɛ kpa pìli nûa da kpɛ́ni-ŋa dîa. Lûwa káa nɔ́ dílônii dîa.

²⁷ Kpera mɛni nyɔ́mɔɔ kɛ́ɛ ma ímɛni lɛ́lɛɛ kɛ́, a gɛɛ ǹɔii é kɛ́ a ípɔɔ ka ílônii.

²⁸ Yâwɛɛ è tɔ̃yâ mɛni wɛ́lini. Va ǹyée kùla diai mu dí teniŋ ƃoɔɔ̂i díkili tɔ̂ɔ mai. A dímaa kɔ̃ɔ wɔ́lɔ-wɔlɔ da wɔ́lɔ-wɔlɔ. Kɛ́lɛ a pâi ŋ̀wana-lɔ̂ɔ-ƃelai dílônii kpɛ̂i ǹɔii ma.

²⁹ Dɔ̃yâ-ƃelai nɔ́ ƃé pâi lɛ̂ɛi ǹɔii ma, díkɛ ƃò naa wɔ́lɔ-wɔlɔ da wɔ́lɔ-wɔlɔ.

³⁰ Dɔ̃yâ-ƃelai da lôno a táre pere. Fili fé díkɛ mɛni da su.

³¹ Da Ɣâla ŋɔtɔ̂ŋ lâa díkili ŋá. Dífa wɔ́lɔ ǹia ma.

³² Ŋ̀wana-lɔ̂ɔ-ƃelai da kɛ́ dɔ̃yâ-ƃelai maa kpɛɛ̂i. Da kɛ́ ŋ̀wɛ̂lii dí dípaa.

³³ Kɛ́lɛ Yâwɛɛ fé pâi wɔ́lɔ fâai ma a gɛɛ díkpɔara-ƃelai yée é tɛ́ɛ dîa, kpaa máŋ é ǹɛɛ naa mɛni é lɛ́ɛ dîa tãi da kɛ́ la mɛni ŋá téɛɛ sui.

³⁴ Láa a Yâwɛɛ maa mɛ́ni í ŋɔtɔ̂ŋ-ŋai mɛi káa. A pâi ƃâa kɛ̂i yâ a ǹɔii tɛ̂ɛ ípɔ. Ya pâi gâai gɛ́ ŋ̀wana-lɔ̂ɔ-ƃelai su kàra ǹɔii ma.

³⁵ Ŋá ŋ̀wana-lɔ̂ɔ ŋánaa-nuu da káa, dɔ́ɔ kpɔ́ ǹûai kélee mɛi yɛ̂ɛ sîda wuru nyii gáa Lɛƃanɔŋ.

³⁶ Naa kɛ́ɛ tí, ŋá lène ŋɔ́nɔ pôlu ŋá tɛ́ɛ gwaa tɔnɔi tí ma è kɛ̀ naai, kɛ́lɛ fé ŋɔ́nɔ gáa ní.

³⁷ Deniŋ ƃô-ƃela da diai díkaa lii-see su, dímaa kpɛ́ɛ. Ƃa pâi gâai a gɛɛ dísuui su kɛ̂tɛi.

³⁸ Kɛ́lɛ zɔnyɔ̂ŋ-ƃelai su a pâi karâi kpɔ́ kpúŋ, dílônii da fa lɛ̂ɛ ɣele ma.

³⁹ Yâwɛɛ a dɔ̃yâ-ƃelai ŋuŋ ma ƃò, gɛ́ dímaa kɔ̃ɔ mɛni kpɔ̂lu su.

⁴⁰ A kpɔŋ dîa é díŋuŋ ma ƃó. A díŋuŋ ma ƃò ŋ̀wana-lɔ̂ɔ-ƃelai yêei, kpɛ́ni fêi, da lì bɔ́ naa a gɛɛ é dímaa kɔ̀ɔ.