Mąątɛ̨nɛ̨ 35 - Bible

Ɣâla fɛliɛɛ kpɔŋ mâa mɛni ma

Deeƃé ŋɔwulei

¹ Óo Yâwɛɛ, tɔɔ diai dîa da tɔ̂ɔ ḿâi, íkɔ diai pɔ́ da kɔ̂ ḿbɔi.

² Íkpala ŋá ɣále-sɛŋ síɣe da íkɔli-seɣei, í pá í ŋ́uŋ ma ƃó.

³ Íkpalai da íkɔ kɔ́-yuɔi síɣe diai dítɔɔ̂i ḿâi í díkpɛ la. Íkono tée a gɛɛ ya pâi ŋ́uŋ ma ƃôi.

⁴ Diai kɔ̂i a gɛɛ dí ḿbaai, gɛ́ ƃâa é kúla dîa dí ŋumɛ. Diai mɛni nyɔ́mɔɔ kpɛtɛ̂i é pîlaŋ ḿâi, tɔɔ díkili ŋá é pú dí lene pôlu.

⁵ Dí foɣâŋ yɛ̂ɛ láa kpâla ƃé fãa su gɛ́ tɛ̀ɛ la, Yâwɛɛ ŋɔkélai kɛ́ díkpɛ̀.

⁶ Gɛ́ díperêi é kɛ́ a gbiníɛɛ nàa laa-lâa, íkelai kɛ́ ƃò dípôlu gɛ́ díkpɛ̀.

⁷ Da ƃáre tɛ̂i ḿberêi ŋ̀uŋ kélee da fé ma, díkɛ lóa tèe ḿberêi a gɛɛ ŋá tóo zu dí ńzoŋ.

⁸ Kɛ́lɛ mɛni kpɔ̂lu a pâi kulâi dîa dítɛ̂i-pere. Da pâi kɔ̂i a díkpɔɔi ƃarei dísu é kara.

⁹ Gɛ̀ ní ŋa pâi lii-nɛ̃ɛ kulâi Yâwɛɛ sârai. Ŋa pâi lii-nɛ̃ɛ kulâi, kpɛ́ni fêi a ŋ́uŋ ma ƃó.

¹⁰ Ŋa pâi m̀ôi kpɔ́ ńii su pere ńyɛɛ Yâwɛɛ mai, “Núu da fé naa zeríɛɛ ípɔ. Diai pɔ̂ri mâa fé dîɛi ya dímaa kɔ̃ɔ í díkula diai yêei díwála-walai tɛɛ̂i díwɔ̂i mai, í kɛ́ diai kula yêei kɛ̀ nûa da díkɔ̃liŋ kùla díyêei a wála-wala-laai.”

¹¹ Núu sɔŋ nyɔ́mɔɔ-ŋa da lɛ́ɛ kɛ̀ a ńaa, díkɛ mɛni kpâla pɛ̀lɛ ḿâ nyii fa kɛ̂ a mɛni da kɔ́lɔŋɔɔ é pîlaŋ mai.

¹² Ŋà mɛni lɛ́lɛɛ kɛ̀ dîɛ, da gba kùla mî a mɛni nyɔ́mɔɔ. À kɛ̀ tí, ńii a tòo pôlu a ŋ̀ánaa.

¹³ Da à kɛ̀ kɔ̂lɛi, ŋa sêe a maloŋ-pere, fa ŋɔ́nɔ ńaa mìi. Ŋa ŋ́uŋ pîlaŋ, ŋ́gɛ Ɣâla fɛ̀li.

¹⁴ Ŋa gɛ̀ tí dímɛni ma yɛ̂ɛ ŋáwɛli kɛ́ maa-nuu da, kpaa máŋ yɛ̂ɛ ǹûui kwa ǹyaa kúkâai. Ŋa pɛ̂lɛ maloŋ see ƃôi yɛ̂ɛ ńee a sàa.

¹⁵ Kɛ́lɛ ŋà kɛ̀ mɛni kpɔ̂lu su, gáa dîa a lii-nɛ̃ɛ mɛni. Da díŋaa tɛ̀ gîe ma díkɛ ɣɛ́lɛ maa kûla ŋ́gbonôi. Diai kpîŋ fé díkɔlɔŋ, díkelee da kɛ̀ ńaa ƃôi, gɔ̃yɛŋ fé ma.

¹⁶ Da kɛ̂ ɣɛ́lɛ maa kulâi ŋ́gbonôi yɛ̂ɛ ǹyaa ƃé ŋ́gɔ̃liŋɔ̂ɔi. Da kɛ̂ dísĩa miî a ńyãa.

¹⁷ Óo Yâwɛɛ, lé tãi ƃé ya pâi mɛni da kɛ̂i lai? Ŋ́gula ŋ́gbɔara-ƃelai yêei. Ŋ́gula ǹyala-sulu-ŋai ŋí lá.

¹⁸ Yà gɛ̀ tí, ŋa pâi ísɛɣɛ̂i fêi kpɔŋ su, ŋá ílaa maa tɛ̂i gbɔŋ su ǹûai kélee ŋɛ́i-tuɛ.

¹⁹ Ífe ǹɛɛ naa ŋ́gbɔara-ƃelai da ǹɛ́ɛ-ƃelai dí yola kúla ŋ́gbonôi. Diai dítɔɔ̂i ḿâ nyii ŋuŋ da fé mai, ífe ǹɛɛ naa dí díŋɛi níiŋ a ńyãa.

²⁰ Dífa lôno núu da kélee pɔ́ a wɛli kɛ́ maa pere, kɛ́lɛ da lɛ́ɛ pɛ̀lɛ diai dí lii-see mɛni wɛ́linii dîa.

²¹ Ŋ́gbɔara-ƃelai da mɛni ƃô a ńaa, dîyɛɛi, “Kú m̀ɛnii kɔ́lɔŋ í gɛ̀i. Kú íkàa gɛ̂i!”

²² Kɛ́lɛ yá, óo Yâwɛɛ, yá kpîŋ yâ m̀ɛnii ŋí naa káa. M̀ɛni ma, Ǹuu-namui, ífe lɛ̀ɛ a ímɛi sâa, kpaa máŋ í ímaa kôya ḿâ.

²³ Óo Ǹuu-namui, ímu siɣe í ḿaa kɔ̃ɔ. Ŋáɣâlai, ímu siɣe í tɔ́ɔ ḿaa mɛ̂ni su.

²⁴ Óo Yâwɛɛ, íteniŋ ƃoɔɔ̂i. Ǹɛ́ a gɛɛ m̀ɛnii da ǹɛɛ̂i ḿâi, ńzɔŋ fé zu. Ífe ǹɛɛ naa ŋ́gbɔara-ƃelai dí ɣɛ́lɛ maa kúla ŋ́gbonôi.

²⁵ Ífe ǹɛɛ naa dí m̀ó dîyɛɛi, “Kúyee aâ pɔ̂ri m̀a. M̀ɛnii nɔ́ kú kɛ̀ ŋ̀wɛ̂lii lai, ǹyaa ká ŋí.”

²⁶ Gɛ́ diai dílii nɛ̃ɛ̂i ŋámɛni kpɔ̂lui mɛ̂ni mai, dí ŋumɛ díkili ŋá pú. Diai da díkpîŋ sìɣe a maa nɛ̃ɛ é tɛ́ɛ ḿâi, ƃâa é kula dîa dí ŋumɛ.

²⁷ Gɛ́ diai kélee ŋ̀wɛ̂lii ńyee é tɛ́ɛ ŋ́gbɔara-ƃelai dîai, lii-see é kɛ́ díyêei díkɛ koi-nɛ̃ɛ kùla ɣelêi pere dîyɛɛi, “Yâwɛɛ kɛ̂tɛi. Ǹyée mu-nuui kɛ́ mɛni ŋ̀aa a kɛ́ kɛ̂i a ǹɛ́lɛɛ, ǹíi a láa m̀ɛni su.”

²⁸ Gɛ̀ ní, ŋa pâi kɛ̂i íteniŋ ƃô-laai mɛni ƃôi nûa dîa, ŋ́gɛ laa maa tɛ̂ tɛ̀ɛ ípɔ tãi nɔ́ ŋ́gaa la ɣele mai.