Mąątɛ̨nɛ̨ 34 - Bible

Ɣâla ŋɔmɛni lɛ́lɛɛi maa laa maa tɛi

Ŋ̀ulei ŋí ƃé Deeƃé è dòo tãi è gbîŋ kɛ̀ la a ƃoo-nuu Abimelɛ ŋɛ́i-tuɛ, Abimelɛ kɛ́ gbɛ̀i

¹ Ŋa pâi kɛ̂i nɔ́ sɛɣɛ-fei tɛɛ̂i Yâwɛɛ pɔ́ a ɣele kélee. Fé pâi wɔ́lɔ kperâi laa maa tɛ̂ tɛɛ̂i bɔ́.

² Ŋa pâi ǹáa maa tɛ̂i m̀ɛni-ŋai mɛni ma a gɛ̂i. Diai nûa da díluâni da m̀ɛni, dí lii-nɛ̃ɛ kula.

³ Kwaa kú Yâwɛɛ ŋɔkɛ́tɛ-laai maa mɛ̂ni ƃó. Kwaa ǹáa maa tɛ́ gîe ma.

⁴ Ŋá Yâwɛɛ fɛ̀li, ǹyaŋ è ŋ́oo su tòo. È gɛ̀ ǹyaoi kélee é kúla ŋ́gbonôi.

⁵ Diai nûa da dúluanîi, da díkili tɔ̀ɔ ma, lii-see a pâi kɛ̂i díyêei. Dílii fé pâi ŋɔ́nɔ toôi pôlu.

⁶ Diai pɔ̂ri mâa fé dîɛi, da vɛ̀li, a pâi díwoo mɛ̂nii. A díkùla dímɛni kpɔ̂lu-ŋai su.

⁷ Diai da ƃaa kɛ́ maa tɛ̀ɛ Yâwɛɛ pɔ́i, ŋɔkélai a dímaa kɔ̃ɔ, é díkula mɛni kpɔ̂lu su.

⁸ Yá kpîŋ ye gáa berei Yâwɛɛ sɔŋ lɛ̂lɛɛi lai. Lii-nɛ̃ɛ káa diai dîa da lâa lai.

⁹ Káai kélee a Yâwɛɛ ŋɔnûai, ka ƃaa kɛ́ maa tɛ́ɛ bɔ́. Diai kélee da ƃaa kɛ́ maa tɛ̂ɛ bɔ́i, sɛŋ da maa ƃalâŋ fa tôo dîa.

¹⁰ Puru a pɔ̂ri kpîŋ yala-sulu paâi, kɛ́lɛ diai da Yâwɛɛ wóo mɛnii, mɛni lɛ́lɛɛ da maa ƃalâŋ fé pâi wɔ́lɔ toôi dîa.

¹¹ Ŋánûa, ka pá ka káwoli tɔ́ɔ ḿâ. Ŋa pâi berei lɛ̂i kâa ka pɔ̂ri ƃaa kɛ́ maa tɛɛ̂i la Yâwɛɛ pɔ́i.

¹² Ka ŋ̀wɛ̂lii ka káŋ̀éniɛi ŋ̀aa-nɛ̃ɛ kula? Ka ŋ̀wɛ̂lii ka nâmu ɣele ma lii-see kɛ́ ƃò káyêei?

¹³ Gɛ̀ ní, ka ká lá kúla mɛni nyɔ́mɔɔ ƃóɔɔ su, ká kpéra nûa kîrii.

¹⁴ Ka kpera mɛni nyɔ́mɔɔ kɛ́ɛ ma ká mɛni lɛ́lɛɛ kɛ́-pere maa kɔ́ri. Ka lii-see kɔ́ri a kákílii kélee.

¹⁵ Yâwɛɛ káa deniŋ ƃô-ƃelai mɛi kâai, ŋ̀óli tɔ̂ɔ díwɔlɔ-wooi mâ.

¹⁶ Kɛ́lɛ dɔɔ̂i m̀ɛni nyɔ́mɔɔ kɛ́-ƃelai dîa. Da a sàa, m̀aa mɛ̂ni kíli fé pâi lɛɛ̂i núu da kíli ŋá.

¹⁷ Deniŋ ƃô-ƃelai da a wɔ̀lɔ, Yâwɛɛ a ŋ̀óo mɛni, é gúla ŋɔmɛni kpɔ̂lui su.

¹⁸ Diai dílii toɔ̂ɔi pôlui, Yâwɛɛ káa díkɔlɛ. A diai ŋuŋ ma ƃò kili kɛ-zu fé ŋɔ́nɔ díyêei.

¹⁹ Deniŋ ƃô-ƃelai dámaa da pɔ̂ri m̀ɔ̃lɛi, kɛ́lɛ Yâwɛɛ a díkùla maa mɔ̃lɛ-laai su.

²⁰ A dímɛi kâa kpɔ́ a ǹɛ́lɛɛ. Díkao dɔnɔ kpîŋ fé pâi ɣâlei.

²¹ Ŋ̀wana-lɔ̂ɔ-ƃelai da pâi saâi díkpîŋ tua-perei su. Diai dí tɔɔ̂i deniŋ ƃô-ƃelai dîai díŋuŋ lá a pâi pilîi.

²² Yâwɛɛ a pâi ŋɔnûai ŋuŋ ma ƃôi. Diai da lî bɔ́ naai, a pâi dísu mɛ̂ni lɛɛ̂i.