Mąątɛ̨nɛ̨ 32 - Bible

Sɔnyɔ̂ŋ ƃóɔɔ da su-mɛni lɛ̂ɛ

Deeƃé ŋɔwulei

¹ Lûwa káa diai dîa Ɣâla a dí su mɛ̂ni lɛ̀ɛ zɔnyɔ̂ŋ-ŋai da gɛ̀i m̀ɛni ma, é ǹyée kúla gélee sui.

² Lûwa káa ǹúui ma nyii Yâwɛɛ a ŋɔsɔnyɔ̂ŋ su mɛ̂ni lɛ̀ɛi, vé wɛ́lini a wôya mɛni da kéleei.

³ Ŋá lɛ́ɛ pâi ŋásɔnyɔ̂ŋ ƃôi, ŋ́gao è kɛ̀ kpĩnanii ŋ́gbonôi, ŋ́gɛ nyĩɣɛ a ɣele kélee.

⁴ Yâwɛɛ, í ŋ́gùla maa kɛ̀ a kpíni da fólo. Kɔlɔ è kpɛ̀ɛ ḿâ, yɛ̂ɛ fólo a lɔii ma kpàla a fólo lá ƃóɔɔ.

⁵ M̀ɛni ma, ŋá ŋásɔnyɔ̂ŋ kélee ƃò yâ. M̀ɛni nyɔ́mɔɔ-ŋai ŋa gɛ̀i, fé da lòo ní yâ. Ŋá gbɛ̀tɛ a gɛɛ ŋá gélee ƃó yâ, ǹyaŋ í ńzu-mɛni lɛ̀ɛ.

⁶ M̀ɛni ma, fɛ̂ɛ diai kélee a Ɣâla-ƃelai, fɛ̂ɛ dí ífɛli tãi da gɔ̀lɔŋ la a gɛɛ da too sɔnyɔ̂ŋ sui. À kɛ̀ tí, mɛni kpɔ̂lu su kɛ́tɛ da à kɛ̀ pâi dîa yɛ̂ɛ ya-fɛ̂ɛ su kɛ́tɛ, va pɔ̂ri serîi dîa.

⁷ Yá ƃé ŋa ǹoo íninîŋ mu. Ya pâi ŋ́uŋ ma ƃôi ŋámɛni kpɔ̂lui su. Ŋa pâi wule toôi yâ a ŋ́oo su kɛ́tɛ, kpɛ́ni fêi, ya ŋ́uŋ ma ƃó.

⁸ Yâwɛɛ, Í m̀o ḿâ yɛ̂ɛi, “Ŋa pâi ísia pere lɛ̂i yâ. Ŋa pâi íteniŋ tɔɔ̂i, ŋá ília-woo ƃó.

⁹ Ífe kɛ̀ a íƃoɔɔ yɛ̂ɛ soo kpaa máŋ soo ƃóloŋ-maa, nyii fɛ̂ɛ dí deniŋ tɔ́ɔ a déniŋ tɔɔ-sɛŋ.”

¹⁰ Ŋ̀wana-lɔ̂ɔ-ƃelai da pâi mɔ̃lɛ̂i. Kɛ́lɛ diai díkili tɔɔ maai káa Yâwɛɛ mai, a dímaa kɔ̃ɔ ŋɔwɛli kɛ́ maa kpanaŋ sârai.

¹¹ M̀ɛni ma, káai a deniŋ ƃô-ƃelai, ka lii-nɛ̃ɛ kula ɣelêi pere m̀ɛni lɛ́lɛɛ-ŋai mɛ̂ni ma Yâwɛɛ a gɛ́ kâai. Káai ka Yâwɛɛ wóo mɛnii, ka láɣi ɣelêi pere a lii-nɛ̃ɛ kɛ́tɛ!