Mąątɛ̨nɛ̨ 31 - Bible

Núu láa a Ɣâla maa Ɣâla fɛliɛɛ

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Yâwɛɛ, ŋa pá ípɔ a gɛɛ í ḿaa kɔ̃ɔ. Ífe ǹɛɛ naa ŋ́gɔara-ƃelai da yée é tɛ́ɛ ḿâ. Íkaa a teniŋ ƃô Ɣala. Ŋa ífɛlîi a gɛɛ í ŋ́uŋ ma ƃó.

² Íwoli tɔ́ɔ ŋáfɛli-wooi ma, í ŋ́uŋ ma ƃó lonii ma! Kɛ́ a ḿaa kɔ̃ɔ nûu yɛ̂ɛ kɔni. Ƃɛ́i kélee ŋa kɛ̀ naai, kɛ́ naa a mɛi káa nuu!

³ Yá ƃa ŋ́uŋ ma ƃó nuu da ḿaa kɔ̃ɔ nûu yɛ̂ɛ kɔni. Ḿɛi káa í ńdeniŋ tɔ́ɔ yɛ̂ɛ berei í íkono tèe lai.

⁴ M̀áre-ŋai ŋ́gbɔara-ƃelai da dɛ́ ḿberêi dípɔara. Ḿɛi káa mɛni nyɔ́mɔɔ kélee su.

⁵ Ŋa ŋ́gbîŋ pú íwala-wala-laai mu. Ya pâi ŋ́uŋ ma ƃôi, Yâwɛɛ. Íkaa a teniŋ ƃô Ɣala.

⁶ Diai da díkpîŋ ma ɣala-ŋa kpɛtɛ, díkɛ dífɛ̂lii díƃɛlɛ fé íkoi. Kɛ́lɛ ńâai a yá.

⁷ Ńii a pâi nɛ̃ɛ̂i ŋá koi-nɛ̃ɛ kula íwɛli kɛ́ maa kpanaŋ mɛ̂ni ma. Í ŋámɔ̃lɛ-laai da ŋámɛni kpɔ̂lui kɔ́lɔŋ.

⁸ Ífe tá ǹɛɛ ní naa ŋ́gbɔara-ƃelai da yée é tɛ́ɛ ḿâ. Ya ŋuŋ ma ƃô tɛ̀ɛ ḿbɔ. Ƃɛ́i kélee ŋa ŋ̀wɛ̂li ŋá lí naai, ŋa lî naa.

⁹ Yâwɛɛ, ḿalôŋ káa, kpɛ́ni fêi, ŋ́gaa mɛni kpɔ̂lu su. Wɔ́lɔ a ŋ́ɛi-gao kpɔlu, kɔlɔ a kpɛ́ɛ ḿâ a ŋ̀ánaa.

¹⁰ Ŋa ŋákɛ-ɣeniɛi kɛ̂i mɛni kpɔ̂lu támaa su. Wɔ́lɔ a gɛ̂i ŋáfulu-laai su kɛ́ kpua. Mɛni kpɔ̂lu ŋánaa a kɔlɔ kpɛɛ̂i ḿâ, ŋ́gao kɛ́ sòli ŋ́gbonôi.

¹¹ Ŋ́gbɔara-ƃelai da kɛ̂ ńarânii, ŋ́gɔlɛ ma-ƃelai kpîŋ ƃa ŋ̀uŋ. Ḿbɛlɛ kpɛɛ̂i díkoi. Da yâo ḿâ. Ƃɛ́i kélee da ŋ́gàa naai, da pû.

¹² Gáa nɔ́ yɛ̂ɛ ǹyaa ƃé ŋa sàa. Ḿaa mɛ̂ni kíli fé ŋɔ́nɔ núu da kíli ŋá. Ŋa kɛ́ nɔ́ yɛ̂ɛ sɛŋ-folo nyii kɛ̂i fé ŋɔ́nɔ m̀ai.

¹³ Ŋ́gbɔara-ƃelai da kɛ̂ ninîŋ-woo ƃôi é pîlaŋ ḿâ. Mɛni kpɔ̂lu a tínaŋ ḿâ gwaa kélee. Nûa da mɛni kpɛtɛɛ nyɔ́mɔɔ támaa kɛ̂i é pîlaŋ ḿâ. Da gbɛtɛ̂i a gɛɛ dí ḿbaa.

¹⁴ Kɛ́lɛ ńâai a yá, óo Yâwɛɛ. Yá ƃa Ŋáɣâlai.

¹⁵ Yá ƃé ŋ́gaa íninîŋ mu. Ŋ́gula ŋ́gbɔara-ƃelai yêei, da diai ŋ̀wɛ̂lii dí ḿbaai.

¹⁶ Íŋɛi pîlaŋ ḿâ ńyãai a íyee mu-nuui, í ŋ́uŋ ma ƃó íwɛli kɛ́-maa kpanaŋ sârai.

¹⁷ Yâwɛɛ, ŋa ítôlii. Ífe ǹɛɛ naa ƃaa kula maa é sɛ̂lɛŋ ḿâ. Ǹɛɛ naa ƃaa é kula ŋ̀wana-lɔ̂ɔ-ƃelai dîa, í dítɛɛ saa táa.

¹⁸ Ǹɛɛ naa ǹɛ́ɛ-ƃelai lá é tɛ́, zu-mɛni kɛ̂tɛ-ƃelai, da diai dí deniŋ ƃô-ƃelai woo-nyɔŋ fei.

¹⁹ Íkɛ mɛni-ŋai káa a mɛni mĩli-mĩliɛɛ lɛ́lɛɛ-ŋa. Diai da yâo yâi, ya m̀ɛni lɛ́lɛɛ-ŋai ŋí tɛ̀ɛ dípɔ! Núu kélee è gɔ́lɔŋ berei ísɔŋ lɛ̂lɛɛi lai, da berei diai dílâai a yái, ya dímaa kɔ̃ɔ lai.

²⁰ Ya dílòo íkoôŋ mu, dí kúla díkpɔara-ƃelai dímɛni kpɛtɛɛ nyɔ́mɔɔ-ŋai perêi. Da kɛ̀ íninîŋ mu, díkpɔara-ƃelai da fa ŋɔ́nɔ dílàraŋ.

²¹ Yâwɛɛ, ŋa ílaa ma tɛ̂i, kpɛ́ni fêi, í íwɛli kɛ́ maa kpanaŋ lɛ̀ ḿâ a mĩli-mili pere tãi ŋ́gbɔara-ƃelai dí tìnaŋ la ḿâ, yɛ̂ɛ taa lêe ƃé zu-ƃela díkpɔara-ƃela da tínaŋ dîa, díkula yêei kɛ́ nuu fé mai.

²² Ŋá kɛ̀ yaôi, ŋ́gɛ ŋ́gili ŋá sìa ńyɛɛi, “Tãi da Yâwɛɛ fé ŋɔ́nɔ gíli ŋá siâi é pîlaŋ ḿâ.” Kɛ́lɛ ímarê kɛ́ɛ mî kpɔŋ mâa mɛni mai, í ŋáfɛli-wooi mɛ̂ni.

²³ Káai kélee kákili tɔɔ maai káa Yâwɛɛ mai, ká ŋ̀wɛ́li-ni. Yâwɛɛ a diai maa kɔ̃ɔ díkili tɔɔ̂i mai. Kɛ́lɛ diai dísu mɛ̂ni kɛ̂tɛi, a díkula maa kɛ̂.

²⁴ Káai kélee kákili tɔɔ̂i Yâwɛɛ mai, ka ká líi kpéle, ka tɔ́ɔ a gbanaŋɔɔ.