Mąątɛ̨nɛ̨ 30 - Bible

Sɛɣɛ̂-fei Ɣala fɛliɛɛ

Deeƃé ŋɔwulei Ŋ̀âla-pɛrɛi tɛɛ mɛ̂ni ma Ɣâla pɔ́

¹ Ŋa pâi ílaa maa tɛ̂i, óo Yâwɛɛ, kpɛ́ni fêi ya ŋuŋ maa ƃô, ǹyaŋ ífe pâi ǹɛɛ̂i naa ŋ́gbɔara-ƃelai dí ńyee mɛi ɣále.

² Óo Yâwɛɛ, Ŋáɣâlai, ŋa wɔ̀lɔ yâ kpɔŋ mâa mɛni ma, ya ḿbàlo.

³ Ya ŋ́gula saa wôlo lá. Ŋá kɛ̀ yênii ǹɔii kpóŋ ma saa táa, kɛ́lɛ í ŋ́gùla saa yêei.

⁴ Ka laa maa tɛ̂ wule too Yâwɛɛ ma, káai kélee a ŋɔteniŋ ƃô-ƃelai! M̀ɛni-ŋai Ǹuu maa waai a gɛ́ kâai dímaa mɛ̂ni kíli fé kpɛ̀ɛ kákili ŋá. Ka sɛɣɛ-fei támaa tɛ́ɛ bɔ́ m̀ɛni ma.

⁵ Ŋɔlii ŋwânai su fa kôya. Ŋɔmaloŋ kâai káa wɔ́lɔ-wɔlɔ da wɔ́lɔ-wɔ́lɔ mɛni ma. Kwa pɔ̂ri lɛɛ̂i wɔ̂lɔi a kpíni é lɛ́ɛ la zu ɣele é ƃɔ́. Kɛ́lɛ ɣele a ƃɔ̀, lii-see a pà kúpɔ, kú pɛ́lɛ lii-nɛ̃ɛ kulâi.

⁶ Ŋá kɛ̀ a ŋ́uŋ ma ƃóɔɔ ńaa kpɔ́ a ŋ́gbîŋ ńyɛɛ dîai, “Ŋ́gbɔara-nuu da kélee yée fa ŋɔ́nɔ pɔ̂ri ḿâ.”

⁷ Yâwɛɛ, ímaloŋ kâai sarâi, íwala-wala-laai è kɛ̀ a dínaŋɔɔ ḿâ yɛ̂ɛ yée kɛ́tɛ. Kɛ́lɛ í íloo ḿâ, ǹyaŋ è kɛ̀ tí, ŋá kɛ̀ yaôi.

⁸ Ŋá wɔ̀lɔ yâ, óo Yâwɛɛ, ŋá íkpera fè kpɔŋ mâa mɛni ma.

⁹ Ŋá ímarê kɛ̀ ńyɛɛ yâi, “Ŋà sàa, lé lɛ́lɛɛ ƃé ya pâi zɔlɔ ƃôi zui? Lé lɛ́lɛɛ ƃé ŋ́gɛɛ m̀olôŋ sui a pâi gɛ̂i yɛ̂i? Zaa-ƃelai da pɔ̂ri laa maa tɛ̂ tɛɛ̂i ípɔ? Da pɔ̂ri íwɔlɔ-wɔlɔ sɔŋ lɛlɛ-laai maa mɛ̂ni ƃôi nûa dîa?

¹⁰ Yâwɛɛ, ŋ́oo mɛ́ni í ḿalôŋ káa! Yâwɛɛ, kpɔŋ ḿâ!”

¹¹ Ya ŋámaloŋ too maai pene a koi-nɛ̃ɛ mãla. Ya gɛ́ ŋámaloŋ too maai kélee a pene a lii-nɛ̃ɛ. Ŋa kɛ̀ nɔ́ koi-nɛ̃ɛ kulâi a zu kɛ́tɛ.

¹² M̀ɛni ma, fé pâi wɔ́lɔ ḿɛi saâi. Ŋa pâi kɛ̂i nɔ́ laa maa tɛ̂ wule toôi yâ. Yâwɛɛ, Ŋáɣâlai nɔ́ ƃa yá. Ŋa pâi kɛ̂i sɛɣɛ-fei tɛɛ̂i ípɔ wɔ́lɔ-wɔlɔ da wɔ́lɔ-wɔlɔ.