Mąątɛ̨nɛ̨ 27 - Bible

Laa maa tɛ̂ Ɣala fɛliɛɛ

Deeƃé ŋɔwulei

¹ Yâwɛɛ ƃa ŋá kwaa ponoɔɔi da ŋ́uŋ ma ƃó nuu. Fé pâi yaôi núu da kélee ma. Yâwɛɛ ƃa ḿaa kɔ̃ɔ mɛni nyɔ́mɔɔ sii kélee su. Gbɛ̂ɛ ƃé ŋa pɔ̂ri ŋɔ́nɔ yaôi mai?

² Ŋwana-lɔɔ-ƃela da pɛ̀lɛ ḿâ díkɛ ŋ̀wɛli a gɛɛ dí ḿbaa, da fôloŋ ḿâ dí tóo.

³ A nɛ̃ɛ ma kpîŋ kɔ-kuluƃa támaa dí tínaŋ ḿâ a gɛɛ dí kɔ́ pɛ́lɛ ḿâ, fé pâi yaôi a dɔnɔ kpîŋ. A nɛ̃ɛ ma kpîŋ ŋ́gbɔara-ƃela dí gbã tée ḿberêi, ŋa pâi ŋ́gili tɔɔ̂i kpɔ́ nɔ́ Ɣâla ma.

⁴ Ŋa Yâwɛɛ marê kɛ̂i mɛni tɔ̂nɔ mɛni ma. M̀ɛni tɔ̂nɔi kpɔ́ nɔ́ ŋa ŋ̀wɛ̂lii lai ǹyaa ƃa, ŋá kɛ́ nɔ́ Yâwɛɛ ŋɔpɛ́rɛi mu a tãi nɔ́ ŋ́gaa la ɣele mai, ŋ́gɛ ƃò naa ŋ́gɛ ŋɔsɔŋ lɛ̂lɛi kâa, ŋ́gɛ vɛ̀li.

⁵ A pâi ḿaa kɔ̃ɔ̂i mɛni kpɔ̂lu su, é gɛ́ ŋ́gɛ ƃò ŋɔpɛ́rɛi mu ŋuŋ ma ƃô su, é ńdɛ ɣelêi é ńzee kɔni kɛ́tɛ ŋá sɛŋ da kélee yée fa pɔ̂ri ḿâ.

⁶ Ŋa pâi ŋ́gbɔara-ƃelai yée mɛi ɣâlei. Ŋa pâi lâɣii a lii-nɛ̃ɛ-pere ŋá sâla kula m̀a ŋɔpɛ́rɛi mu. Ŋa pâi laa-maa tɛ̂ wule toôi Yâwɛɛ ma.

⁷ Óo Yâwɛɛ, ŋa ítòli, ŋ́oo mɛ́ni. Ḿalôŋ káa í ŋóo su too!

⁸ Tãi í m̀o la ńyɛ̂ɛi, “Pá í ḿvɛ̂lii,” ŋá íwoo su tòo ńyɛ̂ɛi, “Yâwɛɛ ŋa pâi pâi.

⁹ Ífe ílòo ḿâ!” Ífe ílii ŋ̀wana ḿâ. Ífe ípôlu tɔ̀ɔ íyee mu-nuui ma. Yá nɔ́ ƃé íkaa a ŋákpɔŋ-maa-nuui, ífe tèe ḿbôlu, ífe íyee kùla ḿû, óo Ɣâla yái íkaa a ḿƃalo-nuui.

¹⁰ Ńee da ńâŋ da pɔ̂ri díyee kulâi ḿû, kɛ́lɛ Yâwɛɛ a pâi ḿɛi kâai.

¹¹ Óo Yâwɛɛ, ítûa-perei lɛ́ ḿâ. Ye ńdeniŋ tɔ́ɔ bere lɛ́lɛɛi ma pere, kpɛ́ni fêi, ŋ́gbɔara-ƃelai tâmaai.

¹² Ífe ńdɛ̀ɛ ŋ́gbɔara-ƃelai pɔ́. Dí tɔɔ̂i ḿâ dí kɛ́ maa yâo woo-ŋa ƃò ḿâ, dí kɛ́ lɛ́ɛ kɛ̀ a ńaa.

¹³ Ŋá gɔ́lɔŋ a gɛɛ ŋa pâi lɛɛ̂i ɣele ma, ŋá Yâwɛɛ kɛ́ mɛni lɛ́lɛɛ-ŋai káa ŋ̀éniɛi ŋí su.

¹⁴ Láa a Yâwɛɛ maa mɛ̂ni. Kili kɛ-zu é kɛ́ íyêei, ílii fé tòo pôlu. Ye ílii kpéle í m̀aa kpɛ́ŋ.