Mąątɛ̨nɛ̨ 25 - Bible

Ɣâla fɛ̀liɛɛ mɛi kâa-laa da maa kɔ̃ɔ mɛni ma

Deeƃé ŋɔwulei

¹ Ŋa ífɛlîi, óo Yâwɛɛ.

² Ŋáɣâlai, ńâai a yá. Ŋ́uŋ ma ƃó í ŋ́gula ŋ́gɔara-ƃelai yêei. Ífe nɛ̀ɛ naa díyee é tɛ́ɛ ḿâ.

³ Diai dí lâai a yái, da pâi díkpɔara-ƃelai yée mɛi ɣâlei. Kɛ́lɛ diai dí tɔɔ̂i yâi díyee fé pâi tɛɛ̂i díkpɔara-ƃelai dîa.

⁴ Yâwɛɛ, ítûa-perei lɛ́ ḿâ. Ye berei lɛ́ ḿâ ŋa pɔ̂ri siâi lai.

⁵ Gɛ́ ŋá ŋákɛ ɣéniɛi kɛ́ tɔ̃yâ-laa pere su yɛ̂ɛ berei ya ŋ̀wɛ̂lii lai, kpɛ́ni fêi, yá ƃa Ŋáɣâlai nyii a ŋ́uŋ ma ƃôi. Ńâai a yá a ɣele kélee.

⁶ Yâwɛɛ, ífe ǹia ímaloŋ kâai da íwɛli kɛ́ maa kpanaŋ mɛ̂ni ma nyii ya wɔ̂lɔ ǹɛ́ kûai.

⁷ Ńzu mɛ̂ni lɛɛ zɔnyɔ̂ŋ-ŋai da bɔara mɛni ma-ŋai ŋá gɛ̀ tãi ŋá kɛ̀ la a nyáŋkpai. Íwɛli kɛ́ maai da ítûa sɔŋ lɛ̂lɛɛi sarâi, ḿaa mɛ̂ni é lɛ́ɛ íkili ŋá Yâwɛɛ.

⁸ Yâwɛɛ sɔŋ lɛ̂lɛɛi, deniŋ ƃóɔɔ. M̀ɛni ƃé a pere lɛ̀ la sɔnyɔ̂ŋ nuu ma a gɛɛ é sía la.

⁹ Diai da dímaa yèŋ, a díteniŋ tɔ̀ɔ a tɔ̃yâ-pere, é ŋɔtûa-perei lɛ́ dîa.

¹⁰ Yâwɛɛ tûa-pere kélee káa a wɛli kɛ́ maa kpanaŋɔɔ da teniŋ ƃô-laa diai mɛni ma da ŋɔkpanaŋ-wooi mɛi kâa dí kɛ́ sìa a ŋɔtɔ̂ŋ-wooi.

¹¹ Ńzu mɛ̂ni lɛɛ ílaai mɛni ma zɔnyɔ̂ŋ-ŋai ŋa gɛ̂i mɛ̂ni ma, óo Yâwɛɛ, kpɛ̂ni fêi, dítâmaai.

¹² Diai da ƃaa kɛ́ maa tɛ̂ɛ Yâwɛɛ pɔ́i, a díteniŋ tɔ̀ɔ pere sîi lɛ́lɛɛ su.

¹³ Da pâi ƃûu ƃôi, dínîa-pɛlɛɛi dí ǹɔii láa fɛ́ɛ.

¹⁴ Diai da Yâwɛɛ wóo mɛnii, dia ƃa ŋɔwɛli kɛ́-maa-ƃelai. A tɔ̂ɔ ŋɔkpanaŋ-wooi pôlu díyêei.

¹⁵ Ŋ́ɛi káa Yâwɛɛ perêi a tãi kélee kpɔŋ mâa mɛni ma. A ŋ́uŋ ma ƃò, gɛ́ ŋ́gùla ƃáre ŋá.

¹⁶ Yâwɛɛ, tínaŋ ḿbɔ naa pere í ḿalôŋ káa, kpɛ́ni fêi, ŋ́gaa ńdɔnɔ kwaa ma, kɔlɔ a kpɛɛ ḿâ.

¹⁷ Ŋ́gula mɛni kpɔ̂lu su í lii-see tɛɛ ḿbɔ.

¹⁸ Ŋá mɛni kpɔ̂lui da ŋá lii too pôlu káa, í ńzu mɛni lɛɛ zɔnyɔ̂ŋ-ŋai mɛ̂ni ma ŋa gɛ̀i.

¹⁹ Gáa berei ŋ́gbɔara-ƃelai tâmaai la dítɔɔi ḿâ a ŋɛi-maa nɛ̃ɛ pere.

²⁰ Ŋ́uŋ ma ƃó í ḿaa kɔ̃ɔ. Ífe ǹɛɛ naa ŋ́gbɔara-nuu da yée é tɛ́ɛ ḿâ. Ŋa pá ípɔ ŋuŋ ma ƃô mɛni ma.

²¹ Ŋámɛni lɛ́lɛɛ kɛ́ɛi da ŋáteniŋ ƃô-laai maa mɛ̂ni dí gɛ́ ŋáfulu-laai su é kôya, kpɛ́ni fêi, ŋ́gili tɔɔ̂i nɔ́ yâ.

²² Óo Ɣála, Eezuɛ ŋuŋ ma ƃó ŋɔmɛni kpɔ̂lu-ŋai kélee su.